Read Papantla Totonac Echonan di Apostel 24 Bible Online

Echonan di Apostel 24 - Papantla Totonac bible

Echonan di Apostel 24

¹I sinku dia despues e sumosaserdote Ananias a bin ku algun ansiano, huntu ku un abogado ku yama Tertulo; i nan a trese akusashonnan kontra Pablo serka gobernado.

²I despues ku nan a manda yama Pablo, Tertulo a kuminsa akus'e, bisando e gobernado: "Komo ku pa medio di bo nos ta gosa di gran pas, i dor di bo providensia hopi kos ta wordu hasi na bienestar di e pueblo aki,

³nos ta rekonose esaki semper i na tur parti, ekselentisimo Felix, ku tur gradisimentu.

⁴Ma pa mi no tin mester di molestiabo mas, mi ta rogabo, konforme bo bondat, pa skucha nos un ratu.

⁵"Pasobra nos a hana ku e homber aki ta un berdadero pest i un tersio ku ta kousa lantamentu den tur e hudiunan den henter mundu, i un kabesante di e sekta di e nazarenonan.

⁶I asta el a purba di profana tempel; asina nos a arest'e. [I nos kier a huzgu'e segun nos mes Lei.

⁷Ma Lisias, e komandante, a bin i ku hopi violensia a sak'e for di nos man,

⁸i a duna ordu pa su akusadonan bin bo dilanti.] I dor di interogu'e bo mes tokante di tur e asuntonan aki, lo bo por komproba tur e kosnan di kualnan nos ta akus'e."

⁹I e hudiunan tambe a bai di akuerdo, sigurando ku e kosnan aki tabata berdat.

¹⁰I ora ku e gobernado a duna sena pa e papia, Pablo a kontesta: "Sabiendo ku pa hopi ana kaba bo ta hues di e nashon aki, mi ta defende mi kousa ku bon animo,

¹¹komo ku bo por ta sigur ku no ta mas ku diesdos dia pasa ku mi a bai Jerusalem pa adora Dios.

¹²I ni den tempel, ni den snoa, ni den stat nan no a hanami ta diskuti ku ningun hende, ni kousa un lantamentu.

¹³Ni nan no por dunabo ningun prueba di e kosnan ku nan ta akusami di dje awor.

¹⁴Ma esaki mi ta rekonose bo dilanti, ku segun e Kaminda ku nan ta yama un sekta mi ta sirbi e Dios di nos tatanan, i ta kere tur kos ku ta di akuerdo ku Lei i ku ta para skirbi den e Profetanan,

¹⁵teniendo speransa den Dios, meskos ku e hombernan aki tambe ta spera, ku siguramente lo tin un resurekshon di tantu e hustunan komo e malbadonan.

¹⁶I pesei mi ta perkura di mantene semper un konsenshi limpi dilanti di Dios i dilanti di hende.

¹⁷"Awor despues di hopi ana mi a bin pa trese limosna pa mi pueblo i pa presenta algun ofrenda,

¹⁸ku kual, despues ku mi a wordu purifika, nan a hanami ta okupa mi mes den tempel, sin multitut di hende ni boroto. Ma tabatin algun hudiu for di Asia,

¹⁹kendenan mester a bin aki bo dilanti i akusami, si nan tabatin algu kontra mi.

²⁰Of laga e hombernan aki mes bisa ki mal echo nan a hana den mi ora mi tabata para dilanti di Konsilio,

²¹of si ta pa motibu di esun palabra aki ku mi a papia na bos haltu ora mi tabata para meimei di nan: 'Tokante di resurekshon di e mortonan mi ta wordu huzga dilanti di boso awe.'"

²²Ma Felix, kende tabatin un miho konosementu di e Kaminda, a manda nan bolbe un otro dia, bisando: "Dia komandante Lisias bin, lo mi tuma un desishon den boso kaso."

²³I el a duna e senturion ordu pa tene Pablo prezo i pa tog e tin poko libertat, i pa no stroba ningun di su amigunan di bin atend'e.

²⁴Ma algun dia despues Felix a yega huntu ku su esposa Drusila, kende tabata hudiu, i el a manda yama Pablo i a skuch'e ora ku e tabata papia di fe den Cristo Jesus.

²⁵I ora ku e tabata papia tokante di hustisia, dominio propio i e huisio ku ta bin, Felix a spanta i a bisa: "Bai pa awor aki, i ora mi tin tempu lo mi manda yamabo."

²⁶Mientras tantu e tabata spera tambe ku Pablo lo a dun'e plaka pa e pon'e den libertat; pesei tambe e tabata manda yam'e hopi biaha i tabata kombersa kune.

²⁷Ma despues di dos ana Porsio Festo a bira susesor di Felix; i komo ku Felix kier a hasi e hudiunan un fabor, el a laga Pablo keda den prizon.