Read Papantla Totonac Echonan di Apostel 25 Bible Online

Echonan di Apostel 25 - Papantla Totonac bible

Echonan di Apostel 25

¹Awor tres dia despues ku Festo a yega na e provinsia, el a biaha di Cesarea pa Jerusalem.

²I e saserdotenan prinsipal i e hombernan lider di e hudiunan a trese akusashonnan kontra Pablo; i nan tabata roga Festo,

³pidiendo un fabor kontra Pablo, pa laga tres'e Jerusalem--mientras ku nan ta skonde warda pa nan mat'e na kaminda.

⁴Ma Festo a kontesta ku Pablo tabata wordu tern prezo na Cesarea i ku e mes tabata di bai ayanan pronto.

⁵"Pesei," el a bisa, "laga e hombernan di influensia entre boso bai ayanan ku mi i, si tin algu malu den e homber aki, laga nan akus'e."

⁶I despues ku el a pasa no mas ku ocho of dies dia serka nan, el a bai Cesarea; i su manise el a tuma su asiento den tribunal i a duna ordu pa laga trese Pablo.

⁷I despues ku el a yega, e hudiunan ku a bin for di Jerusalem a bai para ront di dje i tabata trese hopi akusashon serio kontra dje, ku nan no tabatin prueba p'e.

⁸E ora ei Pablo a defende su mes, bisando: "Mi no a hasi nada malu kontra e Lei di e hudiunan, ni kontra e tempel, ni kontra Cesar."

⁹Ma Festo, kende kier a hasi e hudiunan un fabor, a kontesta Pablo i a bisa: "Bo ta dispuesto pa bai Jerusalem i wordu huzga mi dilanti enkuanto e akusashonnan aki?"

¹⁰Ma Pablo a bisa: "Mi ta para dilanti di tribunal di Cesar, kaminda mi mester wordu huzga. Mi no a hasi e hudiunan nada malu, manera bo mes sa masha bon.

¹¹Si mi ta un hasido di maldat anto i a komete algu ku merese morto, mi no ta nenga di muri; ma si ningun di e kosnan ei, di kualnan e hombernan aki ta akusami, no ta berdat, ningun hende no por entregami na nan. Mi ta apela na Cesar."

¹²Anto despues ku Festo a konsulta ku su konseheronan, el a kontesta: "Na Cesar bo a apela, serka Cesar lo bo bai."

¹³Awor despues ku algun dia a pasa, rei Agripa i Berenise a yega Cesarea, i a bai pa kuminda Festo.

¹⁴I durante di nan estadia di basta tempu einan, Festo a trese e kaso di Pablo dilanti di rei, bisando: "Tin un homber aki ku Felix a laga komo prezo;

¹⁵i tempu ku mi tabata na Jerusalem e saserdotenan prinsipal i e ansianonan di e hudiunan a trese akusashonnan kontra dje i a pidi sentensia di kondenashon p'e.

¹⁶"I mi a kontesta nan ku no ta kustumber di e romanonan di entrega ningun hende prome ku esun ku wordu akusa topa kara-kara ku su akusadonan i hana oportunidat pa defende su mes kontra e akusashonnan.

¹⁷I asina, despues ku nan a reuni aki, mi no a perde tempu, ma su manise mi a tuma mi asiento den tribunal i a duna ordu pa laga trese e homber.

¹⁸I ora ku e akusadonan a lanta para, nan a kuminsa trese akusashon kontra dje, ma no di e sorto di krimennan ku mi tabata spera,

¹⁹sino ku nan tabatin algun punto di desakuerdo kune tokante di nan mes religion i tokante di un tal homber ku a muri, Jesus, di Kende Pablo a insisti ku E ta bibu.

²⁰I komo ku mi no tabata sa kon pa investiga e asuntonan aki, mi a puntr'e si e tabata dispuesto pa bai Jerusalem i wordu huzga ayanan enkuanto e asuntonan aki.

²¹Ma ora Pablo a apela pa wordu teni prezo pa e desishon di Emperador, mi a duna ordu pa ten'e prezo te ora mi mand'e pa Cesar."

²²I Agripa a bisa Festo: "Ami mes tambe lo kier a tende e homber ei." El a bisa: "Manan lo bo tend'e."

²³I asina, su manise, ora ku Agripa i Berenise a bin, tur rondona di luho i grandesa, i a drenta e sala di oudiensia, akompana pa e komandantenan i e hombernan prominente di stat, Pablo a wordu tresi riba ordu di Festo.

²⁴I Festo a bisa: "Rei Agripa i boso tur, kabayeronan aki presente ku nos, boso ta mira e homber aki tokante di kende henter e pueblo hudiu a apela na mi, tantu na Jerusalem komo aki, deklarando na bos haltu ku e no mester keda biba mas.

²⁵Ma ami a hana ku e no a hasi nada ku merese morto; i komo ku e mes a apela na Emperador, mi a disidi di mand'e.

²⁶Sinembargo, mi no tin nada definitivo tokante di dje pa skirbi mi senor. Pesei mi a tres'e boso dilanti, i spesialmente dilanti di abo, rei Agripa, pa despues ku e investigashon a tuma luga, mi por tin algu di skirbi.

²⁷Pasobra ta parsemi apsurdo pa manda un prezo sin skirbi tambe e akusashonnan ku tin kontra dje."