Read Papantla Totonac Echonan di Apostel 26 Bible Online

Echonan di Apostel 26 - Papantla Totonac bible

Echonan di Apostel 26

¹I Agripa a bisa Pablo: "Bo tin mag di papia pa bo mes." E ora ei Pablo a ekstende su man i a kuminsa ku su defensa:

²"Mi ta konsidera mi mes dichoso, O rei Agripa, ku mi por defende mi mes bo dilanti awe kontra tur loke e hudiunan ta akusami di dje;

³spesialmente pasobra bo ta un eksperto den tur kustumber i kuestion ku tin den e hudiunan; pesei mi ta rogabo pa skuchami ku pasenshi.

⁴"Asina anto, tur hudiu sa di mi manera di biba desde mi hubentut, for di prinsipio di mi bida na mi mes pais, i tambe na Jerusalem.

⁵Nan a konosemi pa hopi tempu kaba i por duna testimonio, si nan ta dispuesto pa hasi esaki, ku mi a biba manera un fariseo, di akuerdo ku e sekta di mas strikto di nos religion.

⁶I awor mi ta wordu huzga pa e speransa di e promesa ku Dios a hasi na nos tatanan,

⁷e promesa ku nos diesdos tribunan ta spera di hana, sirbiendo Dios di dia i anochi ku onestidat. I ta pa e speransa aki, O Rei, e hudiunan ta akusami.

⁸Pakiko boso ta konsidera esaki inkreibel, ku Dios ta lanta e mortonan?

⁹"Ami sigur-sigur tabata pensa ku mi mester a hasi tur mi posibel pa opone e nomber di Jesus di Nazaret.

¹⁰I esaki ta loke mi a hasi tambe na Jerusalem; no solamente mi a sera hopi di e santunan den prizon, ku outoridat risibi for di e saserdotenan prinsipal, ma tambe ora nan tabata wordu mata, mi a duna mi voto kontra nan.

¹¹I hopi biaha mi tabata bai di snoa pa snoa pa kastiga nan, i mi a purba di obliga nan pa blasfema; i siendo masha furioso mes riba nan, mi a bai te na statnan stranhero pa persigui nan.

¹²"Mientras ku mi tabata okupa mi mes ku esaki, biahando pa Damasko ku outoridat i konsentimentu di e saserdotenan prinsipal,

¹³mi a mira, O Rei, na ora di merdia na kaminda, un lus for di shelu, mas kla ku solo, ku tabata lusa tur ront di mi i di esnan ku tabata biaha huntu ku mi.

¹⁴I ora nos tur a kai abou na suela, mi a tende un bos ta bisami den lenga hebreo: 'Saulo, Saulo, pakiko bo ta persiguiMi? Ta duru pa bo skop kontra e puntanan di heru.'

¹⁵"I mi a kontesta: 'Ta ken bo ta, Senor?' "I Senor a bisa: 'Ami ta Jesus, Kende bo ta persigui.

¹⁶Ma lanta para riba bo pia; pa e motibu aki Mi a parese na bo, pa nombrabo komo sirbido i testigu no solamente di e kosnan ku bo a mira, ma tambe di e kosnan den kualnan lo Mi parese na bo,

¹⁷librando bo for di e pueblo hudiu i for di e paganonan, serka kendenan mi ta mandabo,

¹⁸pa habri nan wowo pa nan bira for di skuridat na lus i for di e dominio di Satanas na Dios, pa nan risibi pordon di pika i un erensia entre esnan ku a wordu santifika pa medio di fe den Mi.'

¹⁹"Pesei, rei Agripa, mi no tabata desobedesido na e vishon selestial,

²⁰ma a deklara prome na esnan na Damasko, despues na Jerusalem i den henter e region di Judea i na e paganonan, ku nan mester repenti i komberti na Dios, i hasi obranan ku ta kuadra ku repentimentu.

²¹Pa e motibu aki e hudiunan a garami den tempel i a buskami pa mata.

²²I asina, ku yudansa di Dios, mi ta para te dia djawe dunando testimonio tantu na chikitu komo na grandi, sin bisa nada mas sino loke e Profetanan i Moises a bisa ku lo a bai sosode:

²³ku e Cristo mester a sufri, i ku pa motibu di Su resurekshon for di e mortonan E lo mester tabata e prome pa proklama lus tantu na e pueblo hudiu komo na e paganonan."

²⁴I mientras ku Pablo tabata bisa esaki na su defensa, Festo a bisa na bos haltu: "Bo ta loko, Pablo! E tantu studia di bo ei ta hasibo bira loko."

²⁵Ma Pablo a bisa: "Mi no ta loko, ekselentisimo Festo, ma mi ta papia palabranan di berdat i di sano huisio.

²⁶Pasobra rei ta na haltura di e asuntonan aki i kune mi ta papia ku konfiansa tambe, komo ku mi ta sigur ku ningun di e kosnan aki no ta skapa su atenshon; pasobra e kos aki no a sosode den un huki skondi.

²⁷Rei Agripa, bo ta kere e Profetanan? Mi sa ku bo ta kere."

²⁸I Agripa a kontesta Pablo: "Kasi bo ta konvensemi pa bira Cristian."

²⁹I Pablo a bisa: "Mi ta pidi Dios ku, tardi of tempran, no solamente abo, ma tambe tur esnan ku ta tendemi awe, por bira meskos ku ami ta, ku eksepshon di e kadenanan aki."

³⁰I rei a lanta i gobernado i Berenise i esnan ku tabata sinta huntu ku nan,

³¹i nan a hala un banda i a kuminsa papia ku otro, bisando: "E homber aki no ta hasiendo nada ku merese morto ni prizon."

³²I Agripa a bisa Festo: "E homber aki por a wordu poni den libertat, si e no a apela na Cesar."