Read Papantla Totonac Echonan di Apostel 27 Bible Online

Echonan di Apostel 27 - Papantla Totonac bible

Echonan di Apostel 27

¹I ora ku a wordu disidi ku nos lo a nabega bai Italia, nan a entrega Pablo i algun otro prizonero na un senturion ku yama Julio, di e batayon Augusta.

²I nos a subi na bordo di un barku adramiteno, ku tabata kla pa sali bai na e regionnan na kosta di Asia, i nos a subi laman, i Aristarko, un masedonio di Tesalonika, tabata kompana nos.

³I su manise nos a yega Sidon; i Julio a trata Pablo ku konsiderashon i a permitie bai serka su amigunan pa nan perkura p'e.

⁴I for di einan nos a subi laman i a nabega bou di kosta di Cyprus, pasobra e bientunan tabata kontrario.

⁵I nos a pasa e laman banda di kosta di Silisia i Pamfilia, i ora nos a yega Mira, un stat na Lisia, nos a baha na tera.

⁶I ayanan e senturion a hana un barku alehandrino ku tabata nabega bai Italia, i el a pone nos na bordo.

⁷I ora nos tabatin basta dia kaba ta nabega poko-poko asina i ku difikultat a yega dilanti di Snido, komo ku bientu no tabata permiti nos sigui bai mas leu, nos a nabega bou di kosta di Kreta, dilanti di Salmon;

⁸i ku difikultat nos a nabega pas'e, i nos a yega na un luga ku yama Bon Hafnan, pega ku e stat Lasea.

⁹I ora basta tempu a pasa i ku awor si a bira peligroso pa sigui nabega, komo ku tempu di ayuno tambe a pasa kaba, Pablo a kuminsa spierta nan,

¹⁰i a bisa nan: "Hombernan, mi ta mira ku sigur-sigur e biahe aki lo termina ku dano i ku hopi pierde, no solamente di karga i barku, ma tambe di nos bidanan."

¹¹Ma e senturion tabatin mas konfiansa den e sturman i e kapitan di e barku ku den loke Pablo tabata bisa.

¹²I pasobra e haf no tabata adekuado pa pasa wenter, e mayoria a yega na un desishon pa subi laman for di einan, pa mira si na un of otro manera nan por a yega Fenise, un haf na Kreta, ku ta situa kara pa suit-west i nort-west, pa pasa wenter ayanan.

¹³I ora ku un bientu suave for di suit a lanta, i nan a supone ku nan a logra nan proposito, nan a hisa anker i a kuminsa nabega pega-pega ku Kreta.

¹⁴Ma no muchu despues un bientu di orkan ku yama Euroklidon a kuminsa supla for di kosta;

¹⁵i ora ku e barku a wordu gara i no por a bai kontra bientu, nos a lagu'e bai pa su kuenta i a laga nos mes keda drif.

¹⁶I nabegando bou di kosta di un isla chikitu ku yama Klouda, apenas nos por a hana e boto di salbabida bou di kontrol.

¹⁷I despues ku nan a hal'e trese ariba, nan a uza kabel pa mara ront di e barku pa sosten'e; i komo ku nan tabatin miedu pa nan no pega riba e refnan di Sirtis, nan a baha bela i a laga nan mes keda drif.

¹⁸I su manise nan a kuminsa tira karga na awa, komo ku nos tabata wordu violentamente suta dor di tempestat;

¹⁹i e di tres dia, ku nan mes man, nan a tira e ekiponan di e barku na awa.

²⁰I komo ku ni solo ni strea no a parese pa hopi dia, i un tempestat pisa tabata menasa nos, a lo largu tur speransa di wordu salba a bai laga nos.

²¹I despues ku nan tabatin basta tempu sin kome nada, Pablo a lanta para meimei di nan i a bisa: "Hombernan, boso mester a sigui mi konseho i no nabega sali for di Kreta, i sufri e dano i e pierde aki.

²²Ma awor mi ta anima boso pa tene kurashi, pasobra lo no tin pierde di bida meimei di boso, sino solamente di e barku.

²³Pasobra awe nochi mes un angel di e Dios, na Kende mi ta pertenese i Kende mi ta sirbi, tabata para mi dilanti,

²⁴bisando: 'No tene miedu, Pablo; bo mester para dilanti di Cesar; i mira, Dios a dunabo tur esnan ku ta nabega huntu ku bo.'

²⁵Pesei, tene kurashi, hombernan, pasobra mi ta kere Dios, ku lo sosode eksaktamente manera a wordu bisa na mi.

²⁶Ma nos mester noufraga riba un sierto isla."

²⁷Ma ora ku e di dieskuater anochi a yega, ku nos tabata wordu tira di un banda pa otro den Laman Adriatiko, e marineronan a kuminsa sospecha banda di mei anochi ku nan tabata aserkando un tera.

²⁸I nan a tira e lina di sonda i a hana ku laman tabata midi trintishete meter; i un poko mas leu nan a bolbe tira e lina di sonda i a hana ku laman tabata midi bintiocho meter.

²⁹I komo ku nan tabatin miedu ku nos lo a pega riba baranka, nan a tira kuater anker for di popa, i a keda spera pa dia habri.

³⁰I ora ku e marineronan tabata trata di bandona e barku i a baha e boto di salbabida den laman ku e preteksto ku ta e ankernan nan kier a tira for di proa,

³¹Pablo a bisa e senturion i e soldanan: "Si e hombernan aki no keda den e barku, boso tampoko no por skapa."

³²E ora ei e soldanan a korta e kabuyanan di e boto di salbabida i a lagu'e kai den awa.

³³I ora ku dia tabata bai habri, Pablo tabata enkurasha nan tur pa kome algu, bisando: "Awe ta hasi dieskuater dia ku boso ta vigila konstantemente sin kome ni gasta nada.

³⁴Pesei mi ta enkurasha boso pa kome algu, pasobra esaki ta pa boso sobrebibi, pasobra ni un drachi di kabei riba ningun di boso su kabes lo no kai."

³⁵I despues di a bisa esaki, el a kohe pan i a gradisi Dios den presensia di nan tur; i el a kibr'e i a kuminsa kome.

³⁶I nan tur a hana animo i nan mes tambe a kuminsa kome.

³⁷I na tur nos tabata dos shent'i setent'i seis persona na bordo.

³⁸I ora nan a kome basta, nan a kuminsa hasi e barku mas lihe dor di tira e trigo na laman.

³⁹I ora dia a habri nan no por a rekonose e tera; ma si nan a ripara un bahia ku tabatin un playa, (i nan a disidi di hasi tur nan posibel pa pone e barku pega riba dje.)

⁴⁰I nan a korta kabuya di e ankernan i a laga nan den laman, mientras ku na e mesun tempu nan tabata los e kabuyanan di timon, i hisando e bela di proa den direkshon di bientu, nan tabata bai rumbo pa e playa.

⁴¹Ma nan a dal riba un ref kaminda dos laman tabata topa otro, i nan a pega e barku ei riba; i e proa a pega duru-duru sin por a move, ma e popa a kuminsa habri for di otro dor di e forsa di e olanan.

⁴²I e plan di e soldanan tabata pa mata e prizoneronan, pa ningun di nan no landa bai i skapa;

⁴³ma e senturion, kende kier a salba Pablo, a stroba nan den nan intenshon i a duna ordu pa esnan ku sa landa bula na awa prome i bai tera,

⁴⁴i pa e otronan sigui, algun riba tabla i otronan riba diferente kosnan for di e barku. I asina a sosode ku nan lgj tur a yega tera sano i salvo.