Read Papantla Totonac Echonan di Apostel 5 Bible Online

Echonan di Apostel 5 - Papantla Totonac bible

Echonan di Apostel 5

¹Ma un homber ku yama Ananias, huntu ku su esposa Safira, a bende un pida propiedat,

²i ku tur konsentimentu di su esposa el a tene algu atras di e plaka pa su mes, i a trese un parti di e plaka i a pone esaki na pia di e apostelnan.

³Ma Pedro a bisa: "Ananias, pakiko Satanas a yena bo kurason pa gana Spiritu Santu, i pa tene algu atras di e plaka di e tereno?

⁴Si el a keda sin wordu bendi, lo e no a keda di bo? I despues di a wordu bendi, e plaka no tabata den bo poder? Pakiko bo a pone e kos aki den bo kurason? No ta hende bo a gana, sino Dios."

⁵I ora ku el a tende e palabranan aki, Ananias a kai abou i a hala su ultimo rosea; i gran temor a bin riba tur esnan ku a tende di esaki.

⁶I e hobennan a lanta para i a tap'e, i despues di a hib'e pafo, nan a der'e.

⁷I komo tres ora despues su esposa a drenta sin sa kiko a sosode.

⁸I Pedro a puntr'e: "Bisami si boso a bende e tereno pa asina tantu?" I el a kontesta: "Si, pa asina tantu."

⁹I Pedro a bis'e: "Pakiko boso a kumbini ku otro pa pone Spiritu di Senor na prueba? At'e pianan di esnan ku a dera bo esposo ta na porta, i nan lo karga abo tambe hiba pafo."

¹⁰I mesora el a kai abou na Pedro su pianan i a hala su ultimo rosea; i e hobennan a drenta i a han'e morto, i nan a kargu'e hiba pafo i a der'e banda di su esposo.

¹¹I gran temor a bin riba henter e iglesia i riba tur esnan ku a tende e kosnan aki.

¹²I pa medio di man di e apostelnan hopi milager i maraviya tabata tuma luga den e pueblo; i nan tur tabata di un akuerdo den e veranda-di-pilar di Salomon.

¹³Ma ningun di e otronan no tabata tribi asosia ku nan; sinembargo, e pueblo tabatin gran apresio pa nan.

¹⁴I konstantemente tabata bin mas i mas hende aserka ku tabata kere den Senor, multitutnan di homber i muhe,

¹⁵asina tantu ku asta nan tabata karga e hendenan malu hiba pafo riba kaya i tabata pone nan riba kot i riba matras, pa ora Pedro pasa, maske ta su sombra por a kai riba un di nan.

¹⁶I tambe tabata bin un multitut di hende for di e statnan ront di Jerusalem ku tabata trese hende malu of afligi dor di spiritunan impuru, i nan tur tabata wordu kura.

¹⁷Ma e sumosaserdote a lanta para, huntu ku tur esnan ku tabata serka dje (esta, e sekta di e saduseonan), i nan tabata yen di envidia;

¹⁸i nan a tira man riba e apostelnan i a sera nan den un prizon publiko.

¹⁹Ma den anochi un angel di Senor a habri e portanan di prizon i a hiba nan pafo i a bisa:

²⁰"Boso bai para den tempel i papia ku e pueblo tur e palabranan di e Bida aki."

²¹I ora nan a tende esaki, nan a bai den tempel mainta bon tempran i tabata sina e hendenan. Awor ora ku e sumosaserdote i esnan ku tabata serka dje a bin, nan a yama e Konsilio huntu i tur e ansianonan di e yunan di Israel, i a manda ordu na prizon pa trese nan.

²²Ma e ofisialnan ku a bin no a hana nan den prizon, i nan a bolbe i a trese e notisia,

²³bisando: "Nos a hana prizon bon sera i e guardianan para na porta; ma ora nos a habri e portanan, nos no a hana ni un hende paden."

²⁴Awor ora ku e kapitan di e guardia di tempel i e saserdotenan prinsipal a tende e palabranan aki, nan a keda tur konfundi enkuanto kiko lo bai para di esaki.

²⁵Ma un hende a bin bisa nan: "Mira, e hombernan ku boso a sera den prizon ta para den tempel i ta sina e pueblo!"

²⁶E ora ei e kapitan a bai huntu ku e ofisialnan i a trese nan bek sin violensia, pasobra nan tabatin miedu di e pueblo, pa nan no wordu piedra.

²⁷I ora nan a trese nan, nan a pone nan para dilanti di e Konsilio. I e sumosaserdote a puntra nan,

²⁸bisando: "Nos a taha boso striktamente pa no sigui sina den e nomber aki, i mira, boso a yena Jerusalem ku boso sinansa, i boso tin intenshon di trese sanger di e homber aki riba nos."

²⁹Ma Pedro i e apostelnan a kontesta i a bisa: "Nos mester obedese Dios mas ku hende.

³⁰E Dios di nos tatanan a lanta Jesus, Kende boso a laga mata dor di kologu'E na krus.

³¹E ta Esun ku Dios a halsa na Su man drechi komo un Prens i un Salbador, pa duna Israel repentimentu i pordon di pika.

³²I nos ta testigu di e kosnan aki; i Spiritu Santu tambe, Kende Dios a duna na esnan ku ta obedes'E."

³³Ma ora nan a tende esaki, nan a bira furioso i tabatin intenshon di mata nan.

³⁴Ma un fariseo ku yama Gamaliel, un sinado di Lei, kende henter e pueblo tabata respeta, a lanta para den e Konsilio i a duna ordu pa saka e hombernan un ratu asina pafo.

³⁵I el a bisa nan: "Hombernan di Israel, tene kuidou ku loke boso tin idea di hasi ku e hombernan aki.

³⁶Pasobra algun tempu pasa Teudas a lanta, keriendo ku e ta masha kos; i un grupo di mas o menos kuater shen homber a siguie. I el a wordu mata; i tur ku tabata siguie a wordu plama i a kaba na nada.

³⁷Despues di dje Judas di Galilea a lanta den e dianan di senso i a hasi algun hende bai su tras; i e tambe a perese i tur esnan ku tabata siguie a wordu plama.

³⁸I awor enkuanto e kaso aki, mi ta bisa boso, keda leu di e hombernan aki i laga nan na pas; pasobra si e plan of trabou aki ta di hende, e lo wordu destrui,

³⁹ma si ta di Dios e ta, boso lo no por tumba nan; asta boso por hana boso ta bringa kontra Dios."

⁴⁰I nan a sigui su konseho; i despues di a yama e apostelnan bin paden, nan a suta nan i a taha nan pa no papia mas den e nomber di Jesus, i a pone nan den libertat.

⁴¹Asina nan a bai for di presensia di e Konsilio, regosihando ku nan a wordu konsidera digno pa sufri berguensa pa Su nomber.

⁴²I tur dia, den tempel i di kas pa kas, nan tabata sigui sina hende i predika Jesus komo e Cristo.