Read Papantla Totonac Echonan di Apostel 6 Bible Online

Echonan di Apostel 6 - Papantla Totonac bible

Echonan di Apostel 6

¹Awor den e dianan ei, tempu ku e kantidat di disipel tabata oumenta, a surgi un reklamo di parti di e hudiunan griego kontra e hebreonan, pasobra nan tabata salta nan biudanan den partimentu di e kuminda di tur dia.

²I e diesdosnan a manda yama e multitut di e disipelnan i a bisa: "No ta hustu pa nos neglisha e palabra di Dios pa bai sirbi mesa.

³Buska anto for di meimei di boso, rumannan, shete homber di bon reputashon, yen di Spiritu Santu i di sabiduria, ku nos por enkarga ku e tarea aki.

⁴Ma nos lo dedika nos mes na orashon i na e ministerio di e palabra."

⁵I e proposishon a hana aprobashon di henter e kongregashon; i nan a skohe Esteban, un homber yen di fe i di Spiritu Santu, i Felipe, Prokoro, Nikanor, Timon, Parmenas i Nikolas, un proselito for di Antiokia.

⁶I esakinan nan a trese dilanti di e apostelnan; i despues di a hasi orashon, nan a pone man riba nan.

⁷I e palabra di Dios a sigui plama; i e kantidat di disipel a sigui oumenta masha hopi mes na Jerusalem, i un kantidat grandi di e saserdotenan tabata bira obedesido na e fe.

⁸I Esteban, yen di fe i poder, tabata hasi maraviyanan i milagernan grandi den e pueblo.

⁹Ma a lanta algun homber for di e asina yama Snoa di e libertinonan, di e sirenonan i e alehandrinonan i di esnan for di Silisia i Asia, i nan tabata diskuti ku Esteban.

¹⁰I nan no tabata por a resist! e sabiduria i e Spiritu pa medio di kual e tabata papia.

¹¹E ora ei na sekreto nan a instiga hombernan pa bisa: "Nos a tend'e papia palabranan di blasfemia kontra Moises i kontra Dios."

¹²I nan a agita e pueblo, e ansianonan i e eskribanan, i nan a bin riba dje, a lastr'e bai kune i a hib'e dilanti di e Konsilio.

¹³I nan a bin ku testigunan falsu ku tabata bisa: "E homber aki no ta stop di papia palabranan di blasfemia kontra e luga santu aki i kontra Lei;

¹⁴pasobra nos a tend'e bisa ku e Jesus aki di Nazaret lo destrui e luga aki i kambia e kustumbernan ku Moises a entrega na nos."

¹⁵I fihando nan bista riba dje, tur esnan ku tabata sinta den e Konsilio a mira su kara manera kara di angel.