Read Papantla Totonac Echonan di Apostel 7 Bible Online

Echonan di Apostel 7 - Papantla Totonac bible

Echonan di Apostel 7

¹I e sumosaserdote a puntra: "E kosnan aki ta berdat?"

²I el a bisa: "Boso, ruman hombernan i tatanan, tendemi! E Dios di gloria a parese na nos tata Abraham, tempu ku e tabata na Mesopotamia, prome ku el a bai biba na Haran,

³i El a bis'e: 'Sali for di bo tera i for di bo famianan i bin na e tera ku Ami lo mustrabo.'

⁴"E ora ei el a sali for di e tera di e kaldeonan i a bai biba na Haran. I for di einan, despues ku su tata a muri, Dios a tres'e na e tera aki, kaminda boso ta biba awor.

⁵I E no a dun'e ningun erensia den dje, ni sikiera un pia di tereno; i tog, asta tempu ku e no tabatin yu ainda, El a priminti di duna e tera ei na dje, i na su desendensia despues di dje, komo propiedat.

⁶I Dios a bisa asin'aki, ku su desendensia lo ta stranhero na un tera strano, i ku nan lo a wordu esklabisa i maltrata kuater shen ana largu.

⁷'I e nashon, kaminda nan lo ta den sklabitut, Ami mes lo huzga,' Dios a bisa, 'i despues di esei nan lo sali bai i sirbiMi den e luga aki.'

⁸I El a dun'e e aliansa di sirkumsishon; i asina Abraham a engendra Isaak, i a sirkumsid'e riba e di ocho dia; i Isaak a engendra Jakob i Jakob a engendra e diesdos patriarkanan.

⁹"I e patriarkanan a bira yalurs riba Jose i a bend'e pa wordu hiba Egipto. Ma Dios tabata kune

¹⁰i a reskat'e for di tur su aflikshonnan, i a dun'e grasia i sabiduria den bista di Farao, rei di Egipto; i Farao a hasie gobernado di Egipto i di henter su kas.

¹¹"Awor a lanta un hamber den henter Egipto i Kanaan, i gran aflikshon; i nos tatanan no por a hana kuminda.

¹²Ma ora Jakob a tende ku tabatin mainshi na Egipto, el a manda nos tatanan ayanan e prome biaha.

¹³I e di dos biaha Jose a laga su ruman hombernan sa ken e ta, i Farao a hana sa di Jose su famia.

¹⁴I Jose a manda yama su tata Jakob i tur su parientenan pa bin serka dje, setent'i sinku persona na tur.

¹⁵I Jakob a baha bai Egipto i a muri ayanan, e i nos tatanan.

¹⁶I nan restunan a wordu hiba bek na Sikem i poni den e tumba ku Abraham a kumpra pa un suma di plaka serka e yunan di Hamor na Sikem.

¹⁷"Ma segun ku e tempu di promesa ku Dios a hura na Abraham tabata aserkando, e pueblo tabata oumenta i multiplika na Egipto,

¹⁸te ora ku a lanta un otro rei na Egipto ku no tabata sa nada di Jose.

¹⁹Esaki a uza astusia kontra nos rasa i a maltrata nos tatanan, asina ku nan tabata bandona nan yunan resien nasi, i nan no tabata sobrebibi.

²⁰"I na e tempu aki Moises a nase; i e tabata bunita den bista di Dios; i el a wordu kria tres luna largu den e kas di su tata.

²¹I despues ku el a wordu poni pafo, Farao su yu muhe a koh'e bai kune, i a kri'e komo su mes yu.

²²I Moises a wordu eduka den tur e sinansa di e egipsionan, i e tabata un homber di poder den palabra i echo.

²³"Ma ora ku el a kumpli kuarenta ana, e idea a bin den su kurason pa bishita su rumannan, e yunan di Israel.

²⁴I ora ku el a mira un di nan ta wordu trata inhustamente, el a defend'd i a venga esun oprimi dor di dal e egipsio mata.

²⁵I el a supone ku su rumannan lo a komprende ku ta pa medio di dje Dios tabata bai duna nan liberashon; ma nan no a komprende.

²⁶I e siguiente dia el a presenta su mes na nan na momento ku nan tabata bringa ku otro, i el a purba di rekonsilia nan ku otro, bisando: 'Hombernan, ta ruman boso ta, pakiko boso ta maltrata otro?'

²⁷"I esun ku tabata maltrata su prohimo a push'e un banda, bisando: 'Ta ken a hasibo gobernante i hues riba nos?

²⁸Ta intenshon di matami bo tin, meskos ku bo a mata e egipsio ayera?'

²⁹I ora Moises a tende esaki, el a hui i a bira un stranhero na tera di Madian, kaminda el a engendra dos yu homber.

³⁰"I ora kuarenta ana a pasa, un angel a parese na dje den e desierto di Seru Sinai, den flam di un mata di sumpina na kandela.

³¹I ora Moises a mira esei, el a keda strana di e bista ei. I ora ku el a yega serka pa wak mas miho, el a tende e bos di Senor:

³²'Ami ta e Dios di bo tatanan, e Dios di Abraham, Isaak i Jakob.' I Moises tabata tembla di miedu i no a tribi wak.

³³"Ma SENOR a bis'e: 'Kita bo sandalia for di bo pia, pasobra e luga kaminda bo ta para ta tera santu.

³⁴Di berdat Mi a mira e opreshon di Mi pueblo na Egipto; Mi a tende nan kehamentu i Mi a baha pa libra nan; bin awor i lo Mi mandabo Egipto.'

³⁵"E Moises aki ku nan a rechasa, bisando: 'Ken a hasibo gobernante i hues?' ta esun ku Dios a manda komo gobernante i libertador, ku yudansa di e Angel ku a parese na dje den e mata di sumpina.

³⁶E homber aki a saka nan, hasiendo maraviyanan i milagernan den tera di Egipto, den laman Kora i den desierto, kuarenta ana largu.

³⁷"Esaki ta e Moises ku a bisa e yunan di Israel: 'Dios lo lanta pa boso un profeta manera ami for di boso rumannan.'

³⁸Esaki ta esun ku tabata den e kongregashon den desierto huntu ku e Angel ku tabata papia kune riba Seru Sinai, i ku tabata ku nos tatanan; i el a risibi palabranan bibu pa duna boso.

³⁹"I nos tatanan no tabata kier a obedes'e, ma a rechas'e i den nan kurason a bolbe Egipto,

⁴⁰bisando Aaron: 'Traha diosnan pa nos ku lo bai nos dilanti; pasobra e Moises aki ku a saka nos for di tera di Egipto, nos no sa kiko a sosode kune.'

⁴¹I den e dianan ei nan a traha un bishe i a ofrese sakrifisio na e ldolo, i tabata regosiha den e obranan di nan man.

⁴²Ma Dios a bira lomba pa nan i a entrega nan pa sirbi e ehersito di shelu; manera ta para skirbi den e buki di e profetanan: 'Ta na Mi anto boso a ofrese bestianan mata i sakrifisionan den desierto kuarenta ana largu, O kas di Israel?

⁴³Si, boso a hiba e tabernakel di Molok i e strea di e dios Renfan, e imagennan ku boso a traha pa adora nan. I Ami lo hiba boso mas leu ku Babilonia.'

⁴⁴"Nos tatanan tabatin e tabernakel di testimonio den desierto, manera Dios, Kende a papia ku Moises, a dirigie pa trah'e segun e patronchi ku el a mira.

⁴⁵I nos tatanan a risibie i, huntu ku Josue, a hib'e na e tera ku tabata pertenese na e paganonan, kendenan Dios a kore ku nan saka nan afo dilanti di nos tatanan, te na e dianan di David.

⁴⁶I David a hana grasia den bista di Dios i a pidi pa e por a hana un luga di biba pa e Dios di Jakob.

⁴⁷Ma tabata Salomon ku a traha un kas p'E.

⁴⁸"Sinembargo, e Haltisimo no ta biba den kasnan traha pa man di hende, manera e profeta ta bisa:

⁴⁹'Shelu ta Mi trono, i tera ta e banki pa Mi pianan; ki sorto di kas lo bo traha pa Mi?' SENOR ta bisa; 'Of ta kual ta e luga di Mi sosiegu?

⁵⁰No ta Mi man a traha tur e kosnan aki?'

⁵¹"Boso, hombernan kabesura i insirkumsida di kurason i orea, semper ta resisti Spiritu Santu; boso ta hasi meskos ku boso tatanan a hasi.

⁵²Ta kual di e profetanan boso tatanan no a persigui? I nan a mata esnan ku a anunsia di padilanti e binida di Esun Hustu, Kende Su traidonan i matadonan boso a bira awor,

⁵³boso ku a risibi e lei manera angelnan a ordena i tog no a ward'e."

⁵⁴Awor ora nan a tende esaki, nan a bira furioso i nan a sera djente kontra dje.

⁵⁵Ma siendo yen di Spiritu Santu, el a fiha su bista na shelu i a mira e gloria di Dios, i Jesus para na man drechi di Dios;

⁵⁶i el a bisa: "Ata, mi ta mira e shelunan habri i e Yu di Hende para na man drechi di Dios."

⁵⁷Ma nan a grita na bos haltu i a tapa nan orea, i nan tur huntu a kore bai riba dje.

⁵⁸I ora nan a sak'e for di stat, nan a kuminsa piedr'e. I e testigunan a pone nan pananan un banda na pia di un hoben ku yama Saulo.

⁵⁹I nan a sigui piedra Esteban, mientras ku e tabata invoka Dios i bisa: "Senor Jesus, risibi mi spiritu!"

⁶⁰I el a kai na rudia i a grita na bos haltu: "Senor, no tuma e pika aki di nan na kuenta!" I ora ku el a kaba di bisa esaki, el a muri.