Read Papantla Totonac Echonan di Apostel 8 Bible Online

Echonan di Apostel 8 - Papantla Totonac bible

Echonan di Apostel 8

¹I Saulo a konsenti di henter su kurason den e morto di Esteban. I riba e dia ei a surgi un persekushon grandi kontra e iglesia di Jerusalem; i nan tur a wordu plama den e regionnan di Judea i Samaria, ku eksepshon di e apostelnan.

²I algun homber deboto a bai dera Esteban i nan a yor'e masha.

³Ma Saulo a kuminsa destrui e iglesia, i tabata drenta kas pa kas i lastra homber i muhe bai kune i sera nan den prizon.

⁴Esnan anto ku a wordu plama a bai tur kaminda, predikando e palabra.

⁵I Felipe a baha bai na e stat di Samaria i a kuminsa predika Cristo na nan.

⁶I e multitutnan di un akuerdo tabata paga atenshon na loke Felipe tabata bisa, ora nan tabata tende i mira e milagernan ku e tabata hasi.

⁷Pasobra for di hopi ku tabatin spiritu impuru, esakinan tabata sali, gritando na bos haltu. I hopi ku tabata paralisa i lam a wordu kura.

⁸I tabatin hopi alegria den e stat ei.

⁹Awor tabatin un homber ku yama Simon, ku prome aya tabata praktika magia den e stat, i ku tabata hasi e pueblo di Samaria keda tur asombra, i ku tabata pretende di ta un gran homber;

¹⁰i nan tur, for di esun di mas chikitu te na esun di mas grandi, tabata dun'e atenshon, bisando: "E homber aki ta loke ta wordu yama e Gran Poder di Dios."

¹¹I nan tabata dun'e atenshon, pasobra pa hopi tempu e tabata asombra nan ku su magia.

¹²Ma ora nan a kere Felipe, kende tabata predika e bon nobo tokante di e reino di Dios i e nomber di Jesu-Cristo, nan tabata wordu batisa, tantu homber komo muhe.

¹³I Simon mes tambe a kere; i despues di a wordu batisa, el a keda serka Felipe. I mirando senalnan i milagernan grandi ta tuma luga, e tabata keda tur asombra.

¹⁴Awor ora ku e apostelnan na Jerusalem a tende ku Samaria a risibi e palabra di Dios, nan a manda Pedro i Juan serka nan,

¹⁵kendenan a bin i a hasi orashon pa nan, pa nan risibi Spiritu Santu.

¹⁶Pasobra ainda E no a baha riba ningun di nan; solamente nan a wordu batisa den e nomber di Senor Jesus.

¹⁷E ora ei nan a kuminsa pone man riba nan i nan tabata risibi Spiritu Santu.

¹⁸Awor ora Simon a mira ku dor di e ponementu di man di e apostelnan Spiritu Santu tabata wordu duna, el a ofrese nan plaka,

¹⁹bisando: "Duna ami tambe e outoridat aki, pa ken ku mi pone man riba dje por risibi Spiritu Santu."

²⁰Ma Pedro a bis'e: "Ku bo plaka perese huntu ku bo, pasobra bo a pensa ku bo por a optene e don di Dios ku plaka!

²¹Bo no tin arte ni parti den e asunto aki, pasobra bo kurason no ta bon dilanti di Dios.

²²Repenti anto di e maldat aki di bo i pidi Senor ku, si ta posibel, e intenshon di bo kurason wordu pordona.

²³Pasobra mi ta mira ku bo ta den e hal di amargura i den e kadenanan di inikidat."

²⁴Ma Simon a kontesta i a bisa: "Boso pidi Senor pa mi, pa nada di loke boso a bisa no bin riba mi."

²⁵I asina, despues ku nan a testifika i a papia e palabra di Senor, nan a bolbe bai Jerusalem i tabata predika e evangelio den hopi pueblito di e samaritanonan.

²⁶Awor un angel di Senor a papia ku Felipe, bisando: "Lanta i bai pasuit riba e kaminda ku ta baha bai di Jerusalem pa Gaza." Esaki ta un kaminda solitario.

²⁷I el a lanta i a bai. I mira, tabatin un eunuko di Etiopia, un ofisial di korte di Kandase, reina di e etiopenan, kende tabata enkarga ku tur Kandase su tesoronan. I e eunuko a bin Jerusalem pa adora Dios,

²⁸i e tabata bai bek, i sinta den su garoshi e tabata lesa profeta Isaias.

²⁹I e Spiritu a bisa Felipe: "Bai na e garoshi aki i keda banda di dje."

³⁰I ora Felipe a kore yega serka, el a tend'e ta lesa profeta Isaias i a puntra: "Bo ta komprende loke bo ta lesa?"

³¹I el a kontesta: "Kon mi por komprende, si un hende no guiami?" I el a invita Felipe pa subi bin sinta banda di dje.

³²Awor e parti di Skritura ku e tabata lesa, tabata esaki: "Manera un karne nan a hib'E pa wordu mata; i manera un lamchi ta ketu dilanti di su peladonan, asina E no ta habri Su boka.

³³Den Su umiyashon nan no a hasi hustisia p'E; ken lo konta di Su generashon? Pasobra Su bida a wordu kita for di riba tera."

³⁴I e eunuko a kontesta Felipe i a bisa: "Pa fabor, bisami, di ken e profeta ta bisa esaki? Di su mes of di un otro?"

³⁵I Felipe a habri su boka, i kuminsando for di e Skritura aki el a predik'e Jesus.

³⁶I siguiendo riba e kaminda, nan a yega na un luga ku tin awa, i e eunuko a bisa: "Ata awa! Kiko ta stroba pa mi wordu batisa?"

³⁷[I Felipe a kontesta: "Si bo ta kere ku henter bo kurason, ta permiti." I el a kontesta i a bisa: "Mi ta kere ku Jesu-Cristo ta e Yu di Dios."]

³⁸I el a duna ordu pa para e garoshi; i nan tur dos a baha bai den awa, tantu Felipe komo e eunuko; i Felipe a batis'e.

³⁹I ora nan a sali for di awa, e Spiritu di Senor a kohe Felipe bai kune; i e eunuko no a mir'e mas i a sigui su kaminda, regosihando.

⁴⁰Ma Felipe a hana su mes na Azoto; i pasando dor di tur e statnan, e tabata predika e evangelio te ora ku el a yega Cesarea.