Read Papantla Totonac Echonan di Apostel 9 Bible Online

Echonan di Apostel 9 - Papantla Totonac bible

Echonan di Apostel 9

¹Awor Saulo, ainda yen di amenasa i gustu pa mata e disipelnan di Senor, a bai serka e sumosaserdote,

²i a pidie kartanan pa e snoanan na Damasko, pa si e hana kualkier hende ku ta pertenese na e Kaminda, tantu homber komo muhe, e por trese nan mara na Jerusalem.

³I a sosode ku, siguiendo su kaminda, el a yega serka di Damasko, i direpiente un lus for di shelu a resplandese tur ront di dje;

⁴i el a kai abou na suela i a tende un bos ta bis'e: "Saulo, Saulo, pakiko bo ta persiguiMi?"

⁵I el a bisa: "Ken Bo ta, Senor?" I El a bisa: "Ami ta Jesus, Kende bo ta persigui. Ta duru pa bo skop kontra e puntanan di heru."

⁶I e, temblando i tur spanta, a puntra: "Senor, kiko Bo kier pa mi hasi?" I Senor a bis'e: "Lanta i bai den stat, i lo wordu bisa na bo kiko bo mester hasi."

⁷I e hombernan ku tabata biaha huntu kune a keda sin por bisa nada, ora nan a tende e bos sin mira ningun hende.

⁸I Saulo a lanta for di suela i ounke su wowonan tabata habri, e no por a mira nada; i nan a gui'e na su man hib'e Damasko.

⁹I el a keda tres dia sin por a mira, i tampoko e no a kome ni bebe.

¹⁰Awor na Damasko tabatin un disipel ku yama Ananias; i Senor a bis'e den un vishon: "Ananias." I el a kontesta: "At'ami aki, Senor."

¹¹I Senor a bis'e: "Lanta bai den e kaya ku yama Stret, i puntra na kas di Judas pa un homber for di Tarso, ku yama Saulo, pasobra mira, e ta hasiendo orashon,

¹²i den un vishon el a mira un homber ku yama Ananias ta drenta i ta pone su mannan riba dje pa e por hana su bista bek."

¹³Ma Ananias a kontesta: "Senor, mi a tende di hopi hende tokante di e homber aki, kuantu dano el a hasi na Bo santunan na Jerusalem;

¹⁴i aki e tin outoridat di e saserdotenan prinsipal pa mara tur esnan ku ta invoka Bo nomber."

¹⁵Ma Senor a bis'e: "Bai, pasobra esaki ta un instrument skohi di Mi pa hiba Mi nomber na e paganonan i reinan i e yunan di Israel;

¹⁶pasobra Ami lo mustr'e kuantu e tin di sufri pa kousa di Mi nomber."

¹⁷I Ananias a bai i a drenta e kas, i despues di a pone su mannan riba dje, el a bisa: "Ruman Saulo, Senor Jesus, Kende a parese na bo riba e kaminda ku bo a bin, a mandami pa bo hana bo bista bek i wordu yena ku Spiritu Santu."

¹⁸I mesora algu manera skama a kai for di su wowonan i el a hana su bista bek, i el a lanta i a wordu batisa;

¹⁹i el a kome algu i a rekobra forsa. Awor Saulo tabata pa algun dia serka e disipelnan ku tabata na Damasko,

²⁰i mesora el a kuminsa proklama Jesus den e snoanan, bisando: "E ta e Yu di Dios."

²¹I tur esnan ku a tend'e a keda strana i tabata bisa: "No ta esaki ta esun ku na Jerusalem a destrui esnan ku tabata invoka e nomber aki, i ku a bin aki ku e proposito di hiba nan mara dilanti di e saserdotenan prinsipal?"

²²Ma Saulo a sigui hana mas i mas poder, i tabata konfundi e hudiunan ku tabata biba na Damasko dor di proba ku e Jesus aki ta e Cristo.

²³I despues ku hopi dia a pasa, e hudiunan a traha komplot pa mat'e,

²⁴ma Saulo a hana sa di nan komplot. I tambe nan tabata tene warda na e portanan di stat di dia i anochi pa nan mat'e;

²⁵ma su disipelnan a koh'e den anochi i a bah'e den un makutu dor di un habri den muraya.

²⁶I ora ku el a yega Jerusalem, e tabata kier ta huntu ku e disipelnan; ma nan tur tabatin miedu di dje i no tabata kere ku e tabata un disipel.

²⁷Ma Barnabas a tum'e na su enkargo i a hib'e serka e apostelnan. I el a konta nan kon na kaminda el a mira Senor, i ku El a papia kune, i kon na Damasko el a papia ku tur frankesa den e nomber di Jesus.

²⁸I e tabata drenta i sali libremente na Jerusalem huntu ku nan, i tabata papia ku tur frankesa den e nomber di Senor.

²⁹I e tabata papia i argumenta ku e hudiunan griego; ma esakinan tabata trata di mat'e.

³⁰Ma e rumannan, ora nan a hana sa di esaki, a hib'e Cesarea i a mand'e bai Tarso.

³¹Asina e iglesia den henter Judea i Galilea i Samaria tabatin pas, i tabata wordu edifika; i kanando den e temor di Senor i den e konsuelo di Spiritu Santu e iglesia a sigui oumenta.

³²Awor a sosode ku ora Pedro tabata biaha dor di tur e partinan ei, el a bai tambe serka e santunan ku tabata biba na Lida.

³³I ayanan el a hana un homber ku yama Eneas, kende tabata ocho ana largu na kama, pasobra e tabata paralisa.

³⁴I Pedro a bis'e: "Eneas, Jesu-Cristo ta kurabo; lanta i drecha bo kama." I mesora el a lanta.

³⁵I tur esnan ku tabata biba na Lida i Saron a mir'e i a komberti na Senor.

³⁶Awor na Jope tabatin un disipel ku yama Tabita, loke tradusi na griego ta nifika Dorkas; e muhe aki tabata abunda den echonan di karidat i bon obra, ku e tabata hasi kontinuamente.

³⁷I a sosode na e tempu ei ku el a bira malu i a muri; i despues ku nan a kaba di laba e morto, nan a pon'e den un sala ariba.

³⁸I komo ku Lida tabata keda pega ku Jope, e disipelnan, ora nan a tende ku Pedro tabata einan, a manda dos homber serka dje, kendenan a rogu'e: "No tarda pa bin serka nos."

³⁹I Pedro a lanta i a bai ku nan. I ora ku el a yega, nan a hib'e den e sala ariba; i tur e biudanan a bin para banda di dje ta yora, i tabata mustra tur e tunikanan i bistinan ku Dorkas a traha tempu ku e tabata serka nan.

⁴⁰Ma Pedro a manda nan tur sali pafo, anto el a hinka rudia i a hasi orashon, i el a bira su kara pa e morto i a bisa: "Tabita, lanta." I Tabita a habri su wowo, i ora ku el a mira Pedro el a lanta sinta.

⁴¹I Pedro a dun'e un man i a pon'e para riba su pia; i despues di a yama e santunan i e biudanan, el a present'd bibu na nan.

⁴²I henter Jope a hana sa esaki i hopi a kere den Senor.

⁴³I a sosode ku el a keda hopi dia na Jope serka un tal Simon, kurtido-di-kueru.