Read Papantla Totonac Romanonan 1 Bible Online

Romanonan 1 - Papantla Totonac bible

Romanonan 1

¹Pablo, un sirbido di Cristo Jesus, yama pa ta apostel, aparta pa e evangelio di Dios,

²lokual El a priminti di antemano pa medio di Su profetanan den e Skrituranan santu,

³tokante di Su Yu, Kende a nase di un desendiente di David segun karni,

⁴Kende a wordu deklara di ta e Yu di Dios ku poder pa medio di resurekshon for di e mortonan, segun e Spiritu di santidat: Jesu-Cristo, nos Senor.

⁵Dor di djé nos a risibl grasia i apostolado pa trese obedensia di fe meimei di tur e paganonan pa kousa di Su nomber,

⁶den kendenan boso tambe ta e yamanan di Jesu-Cristo.

⁷Na tur Dios Su stimanan na Roma, yama pa ta santunan: Grasia na boso i pas for di Dios nos Tata i di Senor Jesu-Cristo.

⁸Na prome luga mi ta gradisi mi Dios pa medio di Jesu-Cristo pa boso tur, pasobra boso fe ta wordu proklama den henter mundu.

⁹Pasobra Dios, Kende mi ta sirbi den mi spiritu den predikamentu di e evangelio di Su Yu, ta mi testigu kon konstantemente mi ta korda riba boso,

¹⁰semper hasiendo petishon den mi orashon, ku podise awor porfin, segun e boluntat di Dios, mi por hana okashon pa bin serka boso.

¹¹Pasobra mi ta anhela di mira boso, pa mi por komparti algun don spiritual ku boso, pa boso por keda stablest-

¹²esta, pa mi por wordu enkurasha huntu ku boso, mientras ku mi ta serka boso, kada un di nos dor di fe di e otro, tantu e fe di boso komo e fe di mi.

¹³I mi no kier pa boso keda sin sa, rumannan, ku hopi biaha mi tabatin plan di bin serka boso (ma mi a wordu stroba te awor) pa mi por tin algun fruta meimei di boso tambe, meskos ku meimei di e otro paganonan.

¹⁴Mi ta debedo tantu di griego komo di barbaro, tantu di e sabinan komo di esnan ku no ta sabi.

¹⁵Pesei, di mi parti, mi ta ansioso pa predika e evangelio na boso tambe ku ta na Roma.

¹⁶Pasobra mi no tin berguensa di e evangelio, pasobra esaki ta e poder di Dios pa salbashon pa tur ku ta kere, pa e hudiu prome i tambe pa e griego.

¹⁷Pasobra den esaki e hustisia di Dios ta keda revela di fe pa fe; manera ta para skirbi: "Ma e hende hustu lo biba pa medio di fe."

¹⁸Pasobra e furia di Dios ta keda revela for di shelu kontra tur impiedat i inhustisia di hende ku ta oprimi e berdat pa medio di inhustisia;

¹⁹pasobra loke ta konosi tokante di Dios ta manifesta den nan; pasobra Dios a hasi esaki konosi na nan.

²⁰Pasobra desde kreashon di mundu Su atributonan invisibel, Su poder eterno i naturalesa divino, a wordu mira klaramente, siendo komprendi dor di loke a wordu traha, asina ku nan no tin ekskus.

²¹Pasobra maske nan tabata konose Dios, nan no a onr'E komo Dios, ni a duna gradisimentu, ma a bira inutil den nan spekulashonnan, i nan kurason bobo a bira skur.

²²Profesando di ta sabi, nan a bira bobo,

²³i a kambia e gloria di e Dios inkoruptibel pa un imagen den forma di hende koruptibel--i di parha i animal di kuater pia i bestia ku ta lastra.

²⁴Pesei tambe Dios a entrega nan na impuresa, den e pashonnan di nan kurason, pa nan ku nan desonra nan mes kurpa.

²⁵Pasobra nan a kambia e berdat di Dios pa un mentira i a adora i sirbi e kriatura enbes di e Kreador, Kende ta bendishona pa semper. Amen.

²⁶Pa e motibu aki Dios a entrega nan na pashonnan bergonsoso, pasobra nan muhenan a kambia nan funshon natural pa loke ta kontra naturalesa,

²⁷i di e mesun manera tambe e hombernan a bandona e funshon natural di muhe i a kima den nan pashon un pa otro; homber ku homber ta komete aktonan indesente i ta risibl den nan mes persona e kastigu meresi pa nan eror.

²⁸I meskos ku nan no a hana nesesario mas pa rekonose Dios, Dios a entrega nan na un mente perverso, pa hasi kosnan ku no ta kumbini;

²⁹nan ta yen di tur inhustisia, maldat, golosidat, perversidat; yen di envidia, matamentu, pleitu, engano, malisia; nan ta hasido di redu,

³⁰kalumniado, odiado di Dios, grosero, arogante, gabado, inventado di maldat, desobedesido na mayornan,

³¹sin komprendementu, inkonfiabel, sin amor, sin miserikordia;

³²i maske nan konose e ordenansa di Dios, ku esnan ku ta praktika kosnan asina merese morto, nan no solamente ta hasi meskos, ma ku gustu nan ta duna aprobashon tambe na esnan ku ta praktika e kosnan aki.