Read Papantla Totonac Romanonan 10 Bible Online

Romanonan 10 - Papantla Totonac bible

Romanonan 10

¹Rumannan, e deseo di mi kurason i mi orashon na Dios pa Israel ta pa salbashon.

²Pasobra mi ta duna testimonio di nan, ku nan tin un zelo pa Dios, ma no segun konosementu.

³Pasobra sin konose e hustisia di Dios, i buskando pa stablese nan mes hustisia, nan no a somete nan mes na e hustisia di Dios.

⁴Pasobra Cristo ta e fin di lei pa hustisia na tur esnan ku ta kere.

⁵Pasobra Moises ta skirbi ku e hende ku ta praktika e hustisia ku ta basa riba lei lo biba pa medio di e hustisia ei.

⁶Ma e hustisia ku ta basa riba fe ta bisa asin'aki: "No bisa den bo kurason: 'Ken lo subi bai na shelu?' (esta, pa trese Cristo abou),

⁷of: 'Ken lo baha bai den e abismo?' (esta, pa trese Cristo ariba for di e mortonan)."

⁸Ma kiko e ta bisa? "E palabra ta serka di bo, den bo boka i den bo kurason"--esta, e palabra di fe, kual nos ta predika,

⁹ku si bo konfesa ku bo boka Jesus komo Senor, i kere den bo kurason ku Dios a lant'E for di e mortonan, lo bo ta salba;

¹⁰pasobra ku kurason hende ta kere pa hana hustisia, i ku boka e ta konfesa pa hana salbashon.

¹¹Pasobra Skritura ta bisa: "Ken ku kere den djé lo no keda brongosa."

¹²Pasobra no tin distinshon entre hudiu i griego; pasobra e mes Senor ta Senor di tur, ku rikesa abundante pa tur ku ta invok'E;

¹³pasobra: "Ken ku invoka e nomber di SENOR lo ta salba."

¹⁴Kon anto nan lo invoka Esun, den Kende nan no a kere? I kon nan lo kere den Esun, di Kende nan no a tende? I kon nan lo tende sin un predikado?

¹⁵I kon nan lo predika si nan no wordu manda? Manera ta para skirbi: "Ki bunita ta e pianan di esnan ku ta predika e evangelio di pas, esnan ku ta trese notisianan alegre di kosnan bon!"

¹⁶Sinembargo, no ta tur a obedese e evangelio; pasobra Isaias ta bisa: "SENOR, ta ken a kere nos mensahe?"

¹⁷Asina ta ku fe ta bin for di tendementu, i tendementu pa medio di e palabra di Cristo.

¹⁸Ma mi ta puntra: Nan no a tende nunka? Sigur ku si: "Nan bos a sali bai den henter e tera, i nan palabranan te na e finnan di mundu."

¹⁹Ma mi ta puntra: Akaso Israel no tabata sa? Na prome luga Moises ta bisa: "Lo Mi hasi boso yalurs ku loke no ta un nashon, ku un nashon sin komprendementu lo Mi hasi boso rabia."

²⁰I Isaias, ku tur frankesa, ta bisa: "Mi a wordu hana dor di esnan ku no tabata buskaMi, Mi a manifesta Mi mes na esnan ku no a puntra pa Mi."

²¹Ma tokante di Israel E ta bisa: "Henter dia Mi a ekstende Mi mannan na un pueblo desobedesido i opstina."