Read Papantla Totonac Romanonan 11 Bible Online

Romanonan 11 - Papantla Totonac bible

Romanonan 11

¹Mi ta puntra anto: Akaso Dios a rechasa Su pueblo? Di ningun manera! Pasobra ami tambe ta un israelita, un desendiente di Abraham, di e tribu di Benjamin.

²Dios no a rechasa Su pueblo ku E tabata konose di antemano. Of boso no sa kiko Skritura ta bisa den e porshon tokante di Elias, kon e ta keha Israel dilanti di Dios?

³"Senor, nan a mata Bo profetanan, nan a basha Bo altarnan abou, i ta ami so a keda, i nan ta buska pa kita mi bida."

⁴Ma kiko ta e kontesta divino na dje? "Mi a warda pa Mi mes shete mil homber ku no a dobla rudia pa Baal."

⁵Asina anto, tambe den e tempu presente aki a keda un restante segun Dios Su elekshon di grasia.

⁶Ma si ta pa grasia, anto no ta a base di obra mas, sino grasia no ta grasia mas.

⁷Kiko anto? Loke Israel ta buska e no a hana, ma esnan ku a wordu skohi a han'e, i e otronan a wordu enduresi;

⁸manera ta para skirbi: "Dios a duna nan un spiritu di sono profundo, wowo pa nan no mira i orea pa nan no tende, te na e dia djawe."

⁹I David ta bisa: "Laga nan mesa bira un laso i un trampa, i un piedra di trompeka i un retribushon pa nan.

¹⁰Laga nan wowo bira skur, pa nan no mira, i hasi nan lomba dobla pa semper."

¹¹Mi ta puntra anto: akaso Israel a trompeka asina ku nan a kai? Di ningun manera! Ma dor di nan transgreshon salbashon a yega na e paganonan, pa hasi nan yalurs.

¹²Awor si nan transgreshon ta nifika rikesa pa mundu i nan fayo rikesa pa e paganonan, kuantu mas nan restorashon kompleto!

¹³Ma mi ta papia ku boso ku ta pagano. Komo ku mi ta apostel di e paganonan, mi ta gloria den mi ministerio,

¹⁴ku di algun manera mi por hasi mi kompatriotanan bira yalurs i salba algun di nan.

¹⁵Pasobra si nan rechaso ta e rekonsiliashon di mundu, kiko nan aseptashon lo ta, sino bida for di e mortonan?

¹⁶I si e prome pida mansa ta santu, henter e klompi tambe ta; i si e rais ta santu, e ramanan tambe ta.

¹⁷Ma si algun di e ramanan a wordu kibra kita afo, i abo, siendo palu di oleifi shimaron, a wordu geenter meimei di nan i a bira partisipante huntu ku nan di e rais nutritivo di e palu di oleifi,

¹⁸no sea arogante pa ku e ramanan; ma si bo ta arogante, korda ku no ta abo ta esun ku ta sostene e rais, ma ku ta e rais ta sostenebo.

¹⁹Lo bo bisa anto: "E ramanan a wordu kibra kita afo pa ami por a wordu geenter."

²⁰Eksaktamente! Nan a wordu kibra kita afo pa kousa di nan inkredulidat, i bo ta para dor di bo fe. No sea soberbe, ma teme;

²¹pasobra si Dios no a spar e ramanan natural, E lo no spar abo tampoko.

²²Mira anto e bondat i e severidat di Dios; pa esnan ku a kai, severidat, ma pa bo, Dios Su bondat, si bo permanese den Su bondat; sino bo tambe lo wordu korta kita afo.

²³I nan tambe, si nan no permanese den nan inkredulidat, nan lo wordu geenter atrobe; pasobra Dios tin poder pa bolbe enter nan.

²⁴Pasobra si abo a wordu korta kita for di loke di naturalesa ta un palu di oleifi shimaron, i kontra naturalesa a wordu geenter den un palu di oleifi kultiva, kuantu mas esakinan, ku ta e ramanan natural, lo wordu geenter den nan mes palu di oleifi.

²⁵Pasobra mi no kier, rumannan, pa boso keda ignorante di e misterio aki, pa boso no kere boso mes sabi, ku Israel a eksperensia un enduresimentu parsial te ora ku e plenitut di e paganonan a drenta paden;

²⁶i asina henter Israel lo ta salba; manera ta para skirbi: "E Libertador lo bin for di Sion; E lo kita impiedat for di Jakob."

²⁷"I esaki ta Mi aliansa ku nan, ora Mi kita nan pikanan."

²⁸For di punto di bista di e evangelio nan ta enemigu pa boso motibu, ma for di punto di bista di Dios Su skohementu nan ta stima pa motibu di e tatanan;

²⁹pasobra e donnan i e yamada di Dios ta irevokabel.

³⁰Pasobra meskos ku un tempu boso tabata desobedesido na Dios, ma awor miserikordia a wordu demostra na boso pa motibu di nan desobedensia,

³¹asina esakinan tambe awor a bira desobedesido, pa dor di e miserikordia demostra na boso, na nan tambe miserikordia por wordu demostra awor.

³²Pasobra Dios a entrega tur hende na desobedensia pa E por demostra miserikordia na tur.

³³O profundidat di e rikesanan, tantu di e sabiduria komo di e konosementu di Dios! Ki inskudrinabel Su huisionan ta i insondabel Su kamindanan!

³⁴Pasobra ta ken a konose e mente di SENOR, of ta ken a bira Su konsehero?

³⁵Of ta ken a dun'E prome, pa esaki wordu paga bek na dje atrobe?

³⁶Pasobra di djé i dor di djé i p'E tur kos ta. Na E sea gloria pa semper. Amen.