Read Papantla Totonac Romanonan 12 Bible Online

Romanonan 12 - Papantla Totonac bible

Romanonan 12

¹Pesei mi ta roga boso, rumannan, pa medio di e miserikordianan di Dios, pa presenta boso kurpanan komo sakrifisionan bibu i santu, aseptabel pa Dios, kual ta boso sirbishi spiritual di adorashon.

²I no sea konforme e mundu aki, ma sea transforma pa medio di e renobamentu di boso mente, pa boso por komproba kiko ta e bon i agradabel i perfekto boluntat di Dios.

³Pasobra dor di e grasia duna na mi, mi ta bisa kada un di boso pa no pensa mas haltu di su mes ku e mester pensa; ma pa mas bien pensa di su mes ku sano huisio, di akuerdo ku e midi di fe ku Dios a dunabo.

⁴Pasobra meskos ku nos tin hopi miembro den un kurpa i tur e miembronan no tin e mesun funshon,

⁵asina nos, siendo hopi, ta un kurpa den Cristo, i kada un en partikular miembro di otro.

⁶I komo ku nos tin donnan ku ta diferente segun e grasia duna na nos, laga kada un uza nan: si ta profesia, segun e midi di su fe;

⁷si ta sirbishi, den su sirbimentu; of esun ku ta sina hende, den su sinansa;

⁸of esun ku ta eksorta, den su eksortashon; esun ku ta duna, ku generosidat; esun ku ta dirigi, ku diligensia; esun ku ta demostra miserikordia, ku alegria.

⁹Laga amor ta sin hipokresia. Aborese loke ta malu; tene firme na loke ta bon.

¹⁰Stima otro ku amor fraternal; duna preferensia na otro den onor;

¹¹no flakia den diligensia, ma sea ferviente den spiritu, sirbiendo Senor;

¹²regosihando den speransa, perseverando den tribulashon, dedika na orashon,

¹³kontribuiendo na e nesesidatnan di e santunan, praktikando hospitalidat.

¹⁴Bendishona esnan ku ta persigui boso; bendishona i no maldishona.

¹⁵Regosiha ku esnan ku ta regosiha, i yora ku esnan ku ta yora.

¹⁶Sea di e mesun pensamentu pa ku otro; no sea orguyoso den boso pensamentu, ma asosia ku e umildenan. No kere boso mes sabi.

¹⁷Nunka paga malu ku malu na ningun hende. Respeta loke ta korekto den bista di tur hende.

¹⁸Si ta posibel, asina leu ku ta depende di boso, sea na pas ku tur hende.

¹⁹Nunka no venga boso mes, stimanan, ma laga luga pa e furia di Dios, pasobra ta para skirbi: "'Ta di Mi vengansa ta, Ami lo paga bek,' Senor ta bisa."

²⁰"Ma si bo enemigu tin hamber, dun'e di kome, i si e tin set, dun'e di bebe; pasobra hasiendo asina lo bo montona karbon sendi riba su kabes."

²¹No laga malu vensebo, ma mas bien vense malu ku bon.