Read Papantla Totonac Romanonan 14 Bible Online

Romanonan 14 - Papantla Totonac bible

Romanonan 14

¹Awor asepta esun ku ta debil den fe, ma no ku e proposito di huzga su opinionnan.

²Esun ta kere ku e por kome tur kos, mientras ku un otro ku ta debil ta kome berdura so.

³No laga esun ku ta kome despresia esun ku no ta kome, i no laga esun ku no ta kome huzga esun ku si ta kome, pasobra Dios a asept'e.

⁴Ken bo ta pa huzga sirbido di otro hende? Pa su mes shon e ta keda para of e ta kai; i e lo keda para, pasobra Senor tin poder pa hasie para.

⁵Esun ta konsidera un dia mas ku e otro; un otro ta konsidera tur dia meskos. Laga kada hende ta kompletamente konvensi den su mes mente.

⁶Esun ku ta warda un dia, ta warda esaki pa Senor, i esun ku ta kome, ta hasi esaki pa Senor, pasobra e ta duna gradisimentu na Dios; i esun ku no ta kome, ta pa Senor e no ta kome, i ta duna gradisimentu na Dios.

⁷Pasobra ni un di nos no ta biba pa su mes, i ni un no ta muri pa su mes;

⁸pasobra si nos biba, ta pa Senor nos ta biba, of si nos muri, ta pa Senor nos ta muri; pesei, sea ku nos biba of ku nos muri, ta di Senor nos ta.

⁹Pasobra pa e motibu aki Cristo a muri i a bolbe biba, pa E por ta Senor, tantu di e mortonan komo di e bibunan.

¹⁰Ma abo, pakiko bo ta huzga bo ruman? Of pakiko bo ta despresia bo ruman? Pasobra nos tur lo para dilanti di e trono di huisio di Dios.

¹¹Pasobra ta para skirbi: "Manera Mi ta biba, Senor ta bisa, tur rudia lo dobla pa Mi, i tur lenga lo duna alabansa na Dios."

¹²Asina anto, kada un di nos lo duna kuenta di su mes na Dios.

¹³Pesei, no laga nos huzga otro mas, ma mas bien disidi esaki: pa no pone ningun opstakulo of piedra di trompeka den un ruman su kaminda.

¹⁴Mi sa i ta konvensi den Senor Jesus, ku nada no ta impuru di su mes; ma pa esun ku ta kere ku algu ta impuru, p'e e ta impuru.

¹⁵Pasobra si pa motibu di kuminda bo ruman keda ofendi, bo no ta kana mas segun amor. No destrui pa motibu di bo kuminda esun pa kende Cristo a muri.

¹⁶Pesei, no laga loke ta bon pa boso wordu konsidera komo malu;

¹⁷pasobra e reino di Dios no ta komementu i bebementu, sino hustisia, pas i goso den Spiritu Santu.

¹⁸Pasobra esun ku di e manera aki ta sirbi Cristo ta aseptabel pa Dios i aproba pa hende.

¹⁹Asina anto, laga nos buska e kosnan ku ta trese pas i edifikashon di otro.

²⁰No destrui e trabou di Dios pa motibu di kuminda. Tur kos di berdat ta puru, ma nan ta malu pa e hende ku ta kome i ta ofende otro.

²¹Ta bon pa no kome karni ni bebe bina, of hasi kualkier kos ku ta hasi bo ruman trompeka.

²²E fe ku bo tin, tene esei pa bo mes dilanti di Dios. Felis ta esun ku no ta kondena su mes den loke e ta aproba.

²³Ma esun ku ta duda ta keda kondena si e kome, pasobra su komementu no ta bin di fe; i tur loke no ta bin di fe, ta pika.