Read Papantla Totonac Romanonan 15 Bible Online

Romanonan 15 - Papantla Totonac bible

Romanonan 15

¹Awor nos ku ta fuerte mester soporta e debilidatnan di esnan ku ta sin forsa, i no djis agrada nos mes.

²Laga kada un di nos agrada su prohimo pa su bon, pa su edifikashon.

³Pasobra ni Cristo no a agrada Su mes; ma manera ta para skirbi: "E reprochenan di esnan ku a reprochaBo a kai riba Mi."

⁴Pasobra tur loke a wordu skirbi prome aya a wordu skirbi pa nos instrukshon, pa dor di perseveransia i e enkurashamentu di Skrituranan nos por tin speransa.

⁵Awor, ku e Dios di perseveransia i di enkurashamentu konsede pa boso ta di akuerdo ku otro segun Cristo Jesus;

⁶pa di un akuerdo boso, den un solo bos, por glorifika e Dios i Tata di nos Senor Jesu-Cristo.

⁷Pesei, asepta otro, meskos ku Cristo tambe a asepta nos pa e gloria di Dios.

⁸Pasobra mi ta bisa ku Cristo a bira un sirbido di e sirkumsishon pa kousa di e berdat di Dios, pa konfirma e promesanan duna na e tatanan,

⁹i pa e paganonan glorifika Dios pa Su miserikordia; manera ta para skirbi: "Pesei lo mi duna alabansa na Bo meimei di e paganonan, i lo mi kanta na Bo nomber."

¹⁰I atrobe e ta bisa: "Regosiha, O paganonan, huntu ku Su pueblo."

¹¹I atrobe: "Alaba Senor, boso tur, paganonan, i laga tur pueblo alab'E."

¹²I atrobe Isaias ta bisa: "E rais di Isai lo bin, i Esun ku ta lanta pa goberna e paganonan, den djé e paganonan lo spera."

¹³Awor, ku e Dios di speransa yena boso ku tur goso i pas den kerementu, pa boso por abunda den speransa pa medio di e poder di Spiritu Santu.

¹⁴I tokante di boso, mi rumannan, ami mes tambe ta konvensi ku boso mes ta yen di bondat, yena ku tur konosementu, i kapas tambe pa spierta otro.

¹⁵Ma mi a skirbi boso ku tur frankesa tokante di algun punto, pa rekorda boso atrobe, pa motibu di e grasia ku Dios a dunami,

¹⁶pa ta sirbido di Cristo Jesus pa e paganonan, sirbiendo komo saserdote di e evangelio di Dios, pa e sakrifisio di e paganonan por bira aseptabel, santifika dor di Spiritu Santu.

¹⁷Pesei, den Cristo Jesus mi a hana motibu pa gaba tokante di kosnan ku ta pertenese na Dios.

¹⁸Pasobra mi no ta tribi papia di nada sino di loke Cristo a hasi pa medio di mi, ku a resulta den e obedensia di e paganonan pa medio di palabra i echo,

¹⁹den e poder di senalnan i maraviyanan, den e poder di e Spiritu; asina ku for di Jerusalem i tur ront te na Iliriko mi a predika e evangelio di Cristo kompletamente.

²⁰I di e manera aki mi tabata aspira pa predika e evangelio, no kaminda Cristo a wordu menta kaba, pa mi no traha riba e fundeshi di otro hende;

²¹ma manera ta para skirbi: "Esnan na kende E no a wordu anunsia lo mira, i esnan ku no a tende lo komprende."

²²Pa e motibu aki hopi biaha mi a wordu stroba pa bin serka boso.

²³Ma awor ku no tin luga mas pa mi den e regionnan aki, i komo ku pa hopi ana kaba mi tabatin un anhelo pa bin serka boso,

²⁴dia ku mi bai Spana, lo mi bin serka boso. Pasobra mi ta spera di mira boso ora mi pasa, i pa boso yudami pa yega ayanan, despues ku mi a disfruta prome di boso kompania pa un tempu.

²⁵Ma awor mi ta bai Jerusalem pa sirbi e santunan.

²⁶Pasobra Masedonia i Akaya a hana ta bon pa hasi un kontribushon pa e pobernan ku tin entre e santunan na Jerusalem.

²⁷Si, nan a hana ta bon pa hasi esaki, i di berdat, nan ta nan debedonan. Pasobra si e paganonan a hana parti den nan kosnan spiritual, nan tin e deber pa sirbi nan tambe den kosnan material.

²⁸Pesei, ora mi kaba ku esaki i a pone mi seyo riba e fruta di nan aki, lo mi pasa via boso bai Spana.

²⁹I mi sa ku ora mi bin serka boso, lo mi bin den e plenitut di e bendishon di Cristo.

³⁰Awor mi ta roga boso, rumannan, pa medio di nos Senor Jesu-Cristo i pa medio di e amor di e Spiritu, pa boso lucha huntu ku mi den boso orashonnan na Dios pa mi,

³¹pa mi wordu libra di esnan na Judea ku ta desobedesido, i pa mi sirbishi na Jerusalem ta aseptabel pa e santunan;

³²pa mi bin serka boso ku goso segun e boluntat di Dios, i wordu refreska huntu ku boso.

³³Awor e Dios di pas sea ku boso tur. Amen.