Read Papantla Totonac Romanonan 5 Bible Online

Romanonan 5 - Papantla Totonac bible

Romanonan 5

¹Pesei, siendo hustifika pa medio di fe, nos tin pas ku Dios dor di nos Senor Jesu-Cristo,

²dor di Kende tambe nos a hana entrada pa medio di fe den e grasia aki, den kual nos ta para; i nos ta regosiha den speransa di e gloria di Dios.

³I no solamente esaki, ma nos ta regosiha tambe den nos tribulashonnan, sabiendo ku tribulashon ta produsi perseveransia;

⁴i perseveransia, karakter; i karakter, speransa;

⁵i speransa no ta desapunta, pasobra e amor di Dios a wordu drama den nos kurason dor di Spiritu Santu, Kende a wordu duna na nos.

⁶Pasobra tempu ku nos tabata sin forsa ainda, na e tempu apropia, Cristo a muri pa e impionan.

⁷Pasobra apenas un hende lo muri pa un hende hustu; ounke ku kisas pa un bon hende un hende por riska muri

⁸Ma Dios ta demostra Su mes amor pa ku nos den esaki, ku tempu nos tabata pekado ainda, Cristo a muri pa nos.

⁹Muchu mas anto, siendo hustifika awor pa medio di Su sanger, nos lo ta salba for di e furia di Dios dor di djé.

¹⁰Pasobra si tempu ku nos tabata enemigu, nos a wordu rekonsilia ku Dios dor di morto di Su Yu, kuantu mas, siendo rekonsilia, nos lo ta salba pa medio di Su bida.

¹¹I no solamente esaki, ma tambe nos ta regosiha den Dios dor di nos Senor Jesu-Cristo, dor di Kende awor nos a risibi rekonsiliashon.

¹²Pesei, meskos ku dor di un hende pika a drenta den mundu, i morto dor di pika, i asina morto a pasa pa tur hende, pasobra tur a peka--

¹³pasobra prome ku Lei pika tabata den mundu; ma pika no ta wordu konta ora no tin lei.

¹⁴Sinembargo, morto a reina for di Adam te na Moises, asta riba esnan ku no a peka na mes manera di e transgreshon di Adam, kende ta un figura di Esun ku mester a bin.

¹⁵Ma e don di grasia no ta manera e transgreshon. Pasobra si dor di transgreshon di esun hende hopi hende a muri, kuantu mas e grasia di Dios i e don ku a bin pa medio di e grasia di esun Hende, Jesu-Cristo, a abunda pa hopi hende.

¹⁶I e don no ta manera loke a bin dor di esun ku a peka; pasobra di un banda huisio a bin dor di un transgreshon ku a resulta den kondenashon, ma di otro banda e don di grasia a bin dor di hopi transgreshon ku a resulta den hustifikashon.

¹⁷Pasobra si dor di transgreshon di esun morto tabata reina dor di esun ei, muchu mas esnan ku risibi e abundansia di grasia i e don di hustisia lo reina den bida dor di Esun, Jesu-Cristo.

¹⁸Asina anto, meskos ku un transgreshon a trese kondenashon pa tur hende, asina tambe un echo di hustisia a trese hustifikashon di bida pa tur hende.

¹⁹Pasobra meskos ku dor di desobedensia di esun hende hopi a wordu hasi pekado, asina tambe dor di obedensia di Esun hopi lo wordu hasi hustu.

²⁰I Lei a bin pa transgreshon por oumenta; ma kaminda pika a oumenta, grasia a abunda muchu mas,

²¹pa meskos ku pika tabata reina den morto, asina tambe grasia por reina dor di hustisia pa bida eterno dor di Jesu-Cristo, nos Senor.