Read Papantla Totonac Romanonan 7 Bible Online

Romanonan 7 - Papantla Totonac bible

Romanonan 7

¹Of boso no sa, rumannan (pasobra mi ta papia ku esnan ku konose lei), ku lei tin dominio riba un hende tanten ku e ta na bida?

²Pasobra e muhe kasa, segun lei, ta mara na su esposo tanten ku su esposo ta na bida; ma si su esposo muri, e ta liber di e lei di matrimonio.

³Asina anto, si e uni su mes ku un otro homber, mientras ku su esposo ta na bida, e lo wordu yama un adultera; ma si su esposo muri, e ta liber di e lei, asina ku e no ta un adultera, maske e ta uni ku un otro homber.

⁴Pesei, mi rumannan, boso tambe a muri pa Lei dor di e kurpa di Cristo, pa boso por wordu uni ku un otro, ku Esun ku a wordu lanta for di e mortonan, pa nos por karga fruta pa Dios.

⁵Pasobra tempu ku nos tabata den karni, e pashonnan pekaminoso, ku a wordu lanta pa medio di Lei, tabata obra den e miembronan di nos kurpa pa karga fruta pa morto.

⁶Ma awor nos a wordu libra di Lei, siendo ku nos ta morto pa e lei ku tabatin nos mara, asina ku nos ta sirbi den e estado nobo di e Spiritu i no den e estado bieu di e leter.

⁷Kiko nos lo bisa anto? Lei ta pika? Di ningun manera! Alkontrario, lo mi no a sina konose pika si no ta pa medio di Lei; pasobra lo mi no tabata sa kiko ta kudishi, si Lei no a bisa: "No kudisha."

⁸Ma pika, probechando e oportunidat ku e mandamentu a duna, a produsi den mi tur sorto di kudishi; pasobra fuera di Lei pika ta morto.

⁹I un tempu mi tabata bibu fuera di Lei; ma ora ku e mandamentu a bin, pika a rebiba i ami a muri;

¹⁰i e mandamentu aki, ku mester a kondusi na bida, a kondusi na morto pa mi;

¹¹pasobra pika, probechando e oportunidat ku e mandamentu ta duna, a ganami, i dor di dje a matami.

¹²Asina anto Lei ta santu, i e mandamentu ta santu i hustu i bon.

¹³Loke ta bon a bira kousa di morto pa mi anto? Di ningun manera! Ma pika, pa e por a demostra ku e ta pika, tabata produsi morto den mi pa medio di loke ta bon, asina ku pa medio di e mandamentu pika por a bira totalmente pekaminoso.

¹⁴Pasobra nos sa ku Lei ta spiritual; ma ami ta di karni, bendi komo esklabu na pika.

¹⁵Pasobra loke mi ta hasi, mi no ta komprende; pasobra mi no ta praktika loke mi kier hasi, ma mi ta hasi eksaktamente loke mi ta aborese.

¹⁶Ma si mi ta hasi eksaktamente loke mi no ta desea di hasi, mi ta bai di akuerdo ku Lei, ku e si ta bon.

¹⁷Ma awor, no ta ami ta esun mas ku ta hasie, ma pika ku ta biba den mi.

¹⁸Pasobra mi sa ku no tin nada bon ta biba den mi, esta, den mi karni; pasobra e deseo ta presente den mi, ma e hasimentu di bon si no t'ei.

¹⁹Pasobra e bon ku mi ta desea di hasi, mi no ta hasi; ma mi ta praktika eksaktamente e maldat ku mi no ta desea di hasi.

²⁰Ma si mi ta hasi eksaktamente loke mi no ta desea di hasi, anto no ta ami ta esun mas ku ta hasie, sino pika ku ta biba den mi.

²¹Asina mi ta deskubri e lei aki: ora mi ta desea di hasi loke ta bon, maldat ta presente den mi.

²²Pasobra segun e hende interior mi ta deleita mi mes den e lei di Dios,

²³ma den e miembronan di mi kurpa mi ta mira un otro lei ku ta bataya kontra e lei di mi mente i ta hasimi prezo di e lei di pika, kual ta den mi miembronan.

²⁴Hende miserabel ku mi ta! Ken lo librami di e kurpa di morto aki?

²⁵Mi ta duna gradisimentu na Dios dor di Jesu-Cristo, nos Senor! Asina anto, ami mes, di un banda, ku mi mente mi ta sirbi e lei di Dios, ma di otro banda, ku mi karni e lei di pika.