Read Papantla Totonac Romanonan 8 Bible Online

Romanonan 8 - Papantla Totonac bible

Romanonan 8

¹Pesei awor no tin kondenashon pa esnan ku ta den Cristo Jesus.

²Pasobra e lei di e Spiritu di bida den Cristo Jesus a hasimi liber di e lei di pika i di morto.

³Pasobra loke Lei no por a hasi, komo ku e tabata debil dor di e karni, Dios a hasi: mandando Su mes Yu den e semehansa di karni di pika i komo un ofrenda pa pika, El a kondena pika den karni,

⁴pa e eksigensia di Lei por wordu kumpli den nos, kendenan no ta kana segun e karni, ma segun e Spiritu.

⁵Pasobra esnan ku ta segun e karni ta fiha nan mente riba e kosnan di karni, ma esnan ku ta segun e Spiritu, riba e kosnan di e Spiritu.

⁶Pasobra e mente fiha riba e karni ta morto, ma e mente fiha riba e Spiritu ta bida i pas,

⁷pasobra e mente fiha riba e karni ta enemistat kontra Dios; pasobra e no ta somete su mes na e lei di Dios, komo ku e no ta kapas pa hasi esei tampoko;

⁸i esnan ku ta den karni no por agrada Dios.

⁹Sinembargo, boso no ta den karni, sino den e Spiritu, si di berdat e Spiritu di Dios ta biba den boso. Ma si un hende no tin e Spiritu di Cristo, e no ta pertenese na djé.

¹⁰I si Cristo ta den boso, ounke e kurpa ta morto pa motibu di pika, tog e spiritu ta bibu pa motibu di hustisia.

¹¹Ma si e Spiritu di Esun ku a lanta Jesus for di e mortonan ta biba den boso, Esun ku a lanta Cristo Jesus for di e mortonan tambe lo duna bida na boso kurpanan mortal dor di Su Spiritu, Kende ta biba den boso.

¹²Asina anto, rumannan, nos ta debedo, no na e karni pa biba segun e karni--

¹³pasobra si boso ta biba segun e karni, boso mester muri; ma si dor di e Spiritu boso ta mata e obranan di e kurpa, boso lo biba.

¹⁴Pasobra tur esnan ku ta wordu guia dor di e Spiritu di Dios, esakinan ta yunan di Dios.

¹⁵Pasobra boso no a risibi un spiritu ku ta hasi boso esklabu di temor atrobe, ma boso a risibi e Spiritu di adopshon komo yunan, pa medio di kual nos ta sklama: "Abba, Tata!"

¹⁶E Spiritu mes ta duna testimonio huntu ku nos spiritu ku nos ta yu di Dios,

¹⁷i si nos ta yu, nos ta eredero tambe, eredero di Dios i ko-eredero ku Cristo, si di berdat nos ta sufri huntu kuné, pa nos wordu glorifika tambe huntu kuné.

¹⁸Pasobra mi ta konsidera ku e sufrimentunan di e tempu presente aki no ta digno di wordu kompara ku e gloria ku lo wordu revela na nos.

¹⁹Pasobra e kreashon ta spera ku gran antisipashon riba e revelashon di e yunan di Dios.

²⁰Pasobra e kreashon a wordu someti na banidat, no di su mes boluntat, ma pa motibu di Esun ku a somet'e, den speransa

²¹ku e kreashon mes tambe lo wordu libra for di su sklabitut na korupshon pa drenta den e libertat glorioso di e yunan di Dios.

²²Pasobra nos sa ku henter e kreashon ta keha i ta sufri e dolonan di parto huntu, te awor.

²³I no solamente esaki, ma nos mes tambe ku tin e prome frutanan di e Spiritu, nos mes tambe ta keha den nos mes, sperando ku gran antisipashon riba nos adopshon komo yu, e redenshon di nos kurpa.

²⁴Pasobra den speransa nos a wordu salba, ma speransa ku ta wordu mira no ta speransa; pasobra pakiko un hende ta sigui spera riba loke e ta mira kaba?

²⁵Ma si nos ta spera riba loke nos no ta mira, e ora ei ku perseveransia nos ta spera ku gran antisipashon riba dje.

²⁶I di e mesun manera e Spiritu tambe ta bin na yudansa di nos debilidat; pasobra nos no sa kon pa hasi orashon manera mester, ma e Spiritu mes ta intersede pa nos ku kehamentu ku no por wordu ekspresa,

²⁷i Esun ku ta skudrina e kurasonnan konose e mente di e Spiritu, pasobra E ta intersede pa e santunan konforme e boluntat di Dios.

²⁸I nos sa ku Dios ta hasi tur kos obra huntu pa bon pa esnan ku ta stima Dios, pa esnan ku ta yama segun Su proposito.

²⁹Pasobra esnan ku E tabata konose di antemano, El a predestina tambe pa bira konforme e imagen di Su Yu, pa E por ta e primogenito den hopi ruman;

³⁰i esnan ku El a predestina, esakinan El a yama tambe; i esnan ku El a yama, esakinan El a hustifika tambe; i esnan ku El a hustifika, esakinan El a glorifika tambe.

³¹Kiko nos lo bisa di e kosnan aki anto? Si Dios ta pa nos, ken por ta kontra nos?

³²Esun ku no a spar ni Su mes Yu, ma a entregu'E pa nos tur, lo E no duna nos tur-tur kos tambe huntu kuné?

³³Ken lo trese un akusashon kontra Dios Su skohinan? Ta Dios ta Esun ku ta hustifika;

³⁴ta ken ta esun ku ta kondena? Cristo Jesus ta Esun ku a muri, si, Kende a wordu lanta for di e mortonan, Kende ta na man drechi di Dios, Kende tambe ta intersede pa nos.

³⁵Ken lo separa nos for di e amor di Cristo? Tribulashon, angustia, persekushon, hamber, sunu, peliger of spada?

³⁶Manera ta para skirbi: "Pa Bo kousa nos ta wordu mata henter dia; nos a wordu konsidera komo karne pa wordu mata."

³⁷Ma den tur e kosnan aki nos ta mas ku vensedor dor di Esun ku a stima nos.

³⁸Pasobra mi ta konvensi ku ni morto, ni bida, ni angelnan, ni prinsipadonan, ni kosnan presente, ni kosnan futuro, ni podernan,

³⁹ni haltura, ni profundidat, ni ningun otro kos krea, lo por separa nos for di e amor di Dios ku ta den Cristo Jesus nos Senor.