Read Papantla Totonac Romanonan 9 Bible Online

Romanonan 9 - Papantla Totonac bible

Romanonan 9

¹Mi ta papia e berdat den Cristo, mi no ta gana; mi konsenshi ta konfirma esaki den Spiritu Santu,

²ku mi tin gran tristesa i un dolo kontinuo den mi kurason.

³Pasobra lo mi a desea ku ami mes tabata maldishona, separa for di Cristo pa motibu di mi rumannan, mi famianan segun karni,

⁴kendenan ta israelita, na kendenan ta pertenese e adopshon komo yu i e gloria, e aliansanan i e dunamentu di Lei, e sirbishi den tempel i e promesanan,

⁵di kendenan e tatanan ta, i for di kendenan, segun karni, e Cristo a bin, Kende ta riba tur kos, e Dios bendishona pa semper. Amen.

⁶Ma no ta komo si fuera e palabra di Dios a faya. Pasobra no ta tur ku ta desendiente di Israel ta Israel,

⁷ni no ta tur ta yu pasobra nan ta desendiente di Abraham, ma: "Ta dor di Isaak bo desendientenan lo wordu konta."

⁸Esta, no ta e yunan di karni ta yunan di Dios, ma ta e yunan di promesa ta wordu konta komo desendiente.

⁹Pasobra esaki ta un palabra di promesa: "Na e tempu aki lo Mi bin, i Sara lo hana un yu homber."

¹⁰I no esaki so, ma tambe Rebeka, ora ku el a konsebi yu morocho pa medio di un homber, nos tata Isaak;

¹¹pasobra maske e yunan morocho no a nase ainda, ni a hasi ni bon ni malu--pa Dios Su proposito, di akuerdo ku Su skohementu, por a keda para, no pa motibu di obranan, ma pa motibu di Esun ku ta yama--

¹²a wordu bisa na Rebeka: "Esun mayo lo sirbi esun mas chikitu."

¹³Manera ta para skirbi: "Jakob Mi a stima, ma Esau Mi a odia."

¹⁴Kiko nos lo bisa anto? Akaso tin inhustisia serka Dios? Di ningun manera!

¹⁵Pasobra E ta bisa Moises: "Lo Mi tin miserikordia di esun ku Mi tin miserikordia, i lo Mi tin kompashon di esun ku Mi tin kompashon."

¹⁶Asina anto, no ta depende di e hende ku kier ni di e hende ku ta kore, sino di Dios, Kende tin miserikordia.

¹⁷Pasobra Skritura ta bisa Farao: "Ta pa e proposito aki Mi a lantabo, pa demostra Mi poder den bo i pa Mi nomber por wordu proklama den henter mundu."

¹⁸Asina anto E tin miserikordia di esun ku E kier, i E ta endurese esun ku E kier.

¹⁹Lo bo puntrami anto: "Pakiko Dios ta sigui kulpa nos anto? Pasobra ta ken ta resisti Su boluntat?"

²⁰Alkontrario, ta ken abo ta, O hende, pa kontradisi Dios? Akaso loke ta forma lo puntra esun ku a form'e: "Pakiko bo a trahami asina?"

²¹Of e alfarero no tin derecho riba e klei, pa traha for di e mesun klompi un opheto pa uzo onorabel, i un otro pa uzo komun?

²²Kiko anto si Dios, ounke dispuesto pa demostra Su furia i pa hasi Su poder konosi, a soporta ku hopi pasenshi e ophetonan di furia, prepara pa destrukshon?

²³I El a hasi asina pa E por hasi konosi e rikesa di Su gloria riba e ophetonan di miserikordia, kualnan El a prepara di antemano pa gloria,

²⁴kendenan El a yama tambe, esta nos, no for di entre e hudiunan so, ma tambe for di entre e paganonan.

²⁵Manera E ta bisa tambe den Oseas: "Lo Mi yama esnan ku no tabata Mi pueblo: 'Mi pueblo,' i esun ku no tabata stima: 'Stima.'"

²⁶"I lo sosode ku na e luga na unda a wordu bisa na nan: 'Boso no ta Mi pueblo,' einan nan lo wordu yama yunan di e Dios bibu."

²⁷I Isaias ta sklama tokante di Israel: "Maske e kantidat di e yunan di Israel ta manera santu di laman, ta e restante lo wordu salba;

²⁸pasobra SENOR lo ehekuta Su palabra riba tera, kabalmente i masha lihe mes."

²⁹I meskos ku Isaias a bisa di antemano: "Si e SENOR di ehersitonan no a laga simia pa nos, nos lo a bira manera Sodoma i lo a parse Gomora."

³⁰Kiko nos lo bisa anto? Ku paganonan, ku no a buska hustisia, a logra hana hustisia, esta, e hustisia ku ta pa medio di fe;

³¹ma Israel, ku tabata buska un lei di hustisia, no a alkansa e lei ei.

³²Pakiko? Pasobra nan no a busk'e pa medio di fe, ma komo si fuera e tabata pa medio di obranan. Nan a trompeka riba e piedra di trompeka,

³³manera ta para skirbi: "Mira, Mi ta pone na Sion un piedra di trompeka i un baranka di ofensa, i esun ku kere den djé lo no keda brongosa."