Read Papantla Totonac 1 Korintionan 1 Bible Online

1 Korintionan 1 - Papantla Totonac bible

1 Korintionan 1

¹Pablo, yama pa ta un apostel di Jesu-Cristo, pa e boluntat di Dios, i nos ruman Sostenes,

²Na e iglesia di Dios ku ta na Korinto, na esnan ku a wordu santifika den Cristo Jesus, yama pa ta santu, huntu ku tur esnan ku tur kaminda ta invoka e nomber di nos Senor Jesu-Cristo, nan Senor i di nos:

³Grasia sea ku boso i pas di Dios nos Tata i di Senor Jesu-Cristo.

⁴Mi ta gradisi mi Dios semper pa boso, pa e grasia di Dios ku a wordu duna na boso den Cristo Jesus,

⁵ku den tur kos boso a wordu enrikesi den djé, den tur palabra i tur konosementu,

⁶meskos ku e testimonio tokante di Cristo a wordu konfirma den boso,

⁷pa boso no tin falta di ningun don, sperando e revelashon di nos Senor Jesu-Cristo,

⁸Kende tambe lo konfirma boso te na fin, sin kulpa den e dia di nos Senor Jesu-Cristo.

⁹Dios ta fiel, dor di Kende boso a wordu yama pa tin komunion ku Su Yu, Jesu-Cristo nos Senor.

¹⁰Awor mi ta eksorta boso, rumannan, pa medio di e nomber di nos Senor Jesu-Cristo, pa boso tur papia e mesun kos, i pa no tin divishon entre boso, ma pa boso ta perfektamente uni den e mesun mente i den e mesun opinion.

¹¹Pasobra di e hendenan di kas di Cloe mi a tende, mi rumannan, ku tin pleitu entre boso.

¹²Awor esaki ta loke mi kier men, ku kada un di boso ta bisa: "Ami ta disipel di Pablo," i "Ami di Apolos," i "Ami di Sefas," i "Ami di Cristo."

¹³Cristo a wordu dividi anto? Ta Pablo a wordu krusifika pa boso? Of ta den e nomber di Pablo boso a wordu batisa?

¹⁴Mi ta gradisi Dios ku mi no a batisa ningun di boso, ku eksepshon di Krispo i Gayo,

¹⁵pa ningun hende no bisa ku boso a wordu batisa den mi nomber.

¹⁶Awor e hendenan di kas di Stefanas si mi a batisa; fuera di esei mi no sa si mi por a batisa ningun otro.

¹⁷Pasobra Cristo no a mandami pa batisa, ma pa predika e evangelio, no ku sabiduria di palabra, pa e krus di Cristo no perde su poder.

¹⁸Pasobra e mensahe di e krus ta lokura pa esnan ku ta perese, ma pa nos ku ta wordu salba e ta e poder di Dios.

¹⁹Pasobra ta para skirbi: "Lo Mi destrui e sabiduria di e sabinan, i e inteligensia di e inteligentenan lo Mi pone un banda."

²⁰Unda e hende sabi ta? Unda e eskriba ta? Unda e disputador di e siglo aki ta? Dios no a hasi sabiduria di e mundu aki bira lokura?

²¹Pasobra komo ku den e sabiduria di Dios, mundu dor di su mes sabiduria no a konose Dios, a agrada Dios di salba esnan ku ta kere dor di e lokura di e mensahe predika.

²²Pasobra di berdat hudiunan ta pidi senalnan i griegonan ta buska sabiduria;

²³ma nos ta predika Cristo krusifika, pa hudiu un piedra di trompeka, i pa pagano, lokura,

²⁴ma pa esnan ku ta e yamanan, tantu hudiu komo griego, Cristo, e poder di Dios i e sabiduria di Dios.

²⁵Pasobra e lokura di Dios ta mas sabi ku hende, i e debilidat di Dios ta mas fuerte ku hende.

²⁶Pasobra konsidera boso yamada, rumannan, ku no tabatin hopi hende sabi segun karni, ni hopi hende poderoso, ni hopi hende nobel;

²⁷ma Dios a skohe e kosnan bobo di mundu pa brongosa e sabinan. I Dios a skohe e kosnan debil di mundu pa brongosa e kosnan ku ta fuerte,

²⁸i e kosnan baho di mundu i esnan despresia, Dios a skohe, e kosnan ku no ta nada, pa E hasi e kosnan ku ta algu bira nada,

²⁹pa ningun hende no gaba dilanti di Dios.

³⁰Pasobra dor di djé boso ta den Cristo Jesus, Kende a bira pa nos sabiduria for di Dios--i hustisia i santifikashon i redenshon.

³¹Pesei, manera ta para skirbi: "Laga esun ku ta gaba, gaba den SENOR."