Read Papantla Totonac 1 Korintionan 11 Bible Online

1 Korintionan 11 - Papantla Totonac bible

1 Korintionan 11

¹Sea imitadonan di mi, meskos ku ami tambe ta di Cristo.

²Awor mi ta elogia boso, pasobra boso ta korda riba mi den tur kos, i ta tene firme na e tradishonnan, manera mi a entrega nan na boso.

³Ma mi kier pa boso komprende ku Cristo ta e kabes di tur homber, i e homber ta e kabes di e muhe, i Dios ta e kabes di Cristo.

⁴Tur homber ku ta hasi orashon of ta profetisa kabes tapa, ta desonra su kabes.

⁵Ma tur muhe ku ta hasi orashon of ta profetisa sin tapa kabes, ta desonra su kabes; pasobra e ta igual ku esun ku su kabes ta feita.

⁶Pasobra si un muhe no ta tapa su kabes, lagu'e korta su kabei tambe; ma si ta un berguensa pa un muhe tin su kabei korta of tin su kabes feita, lagu'e tapa su kabes.

⁷Pasobra un homber no mester tapa su kabes, komo ku e ta e imagen i gloria di Dios; ma e muhe ta e gloria di homber.

⁸Pasobra homber no ta origina for di muhe, ma muhe for di homber;

⁹pasobra di berdat homber no a wordu krea pa muhe, ma muhe pa homber.

¹⁰Pesei e muhe mester tin un simbolo di outoridat riba su kabes, pa motibu di e angelnan.

¹¹Sinembargo, den Senor ni muhe no ta independiente di homber, ni homber no ta independiente di muhe.

¹²Pasobra meskos ku muhe ta origina for di homber, asina tambe homber ta nasi di muhe; i tur kos ta origina for di Dios.

¹³Huzga pa boso mes: ta pas pa un muhe hasi orashon na Dios kabes sunu?

¹⁴Naturalesa mes no ta sina boso ku si un homber tin kabei largu, esei ta un berguensa p'e,

¹⁵ma si un muhe tin kabei largu, esei ta un gloria p'e? Pasobra su kabei a wordu duna na dje komo un velo.

¹⁶Ma si tin hende ku tin gana di pleita, nos no tin tal kustumber, ni e iglesianan di Dios tampoko.

¹⁷Ma no ta elogia mi ta elogia boso dor di duna e instrukshon aki, pasobra boso no ta bin huntu pa bira miho, sino pa bira pio.

¹⁸Pasobra pa kuminsa, mi ta tende ku ora boso bin huntu komo iglesia tin divishon entre boso, i pa un parti mi ta kere esaki.

¹⁹Pasobra tambe mester tin divishon entre boso, pa esnan ku tin e aprobashon di Dios por wordu rekonosi meimei di boso.

²⁰Pesei, ora boso ta reuni, no ta pa kome e Sena di Senor,

²¹pasobra na boso komementu kada un ta kohe su mes kuminda prome; i esun tin hamber i e otro ta burachi.

²²Kiko! Boso no tin kas pa kome i bebe aden? Of boso ta despresia e iglesia di Dios, i ta brongosa esnan ku no tin nada? Kiko lo mi bisa boso? Boso kier mi elogia boso? Den esaki mi no ta elogia boso.

²³Pasobra mi a risibi di Senor loke mi a entrega na boso tambe, ku Senor Jesus, riba e anochi ku El a wordu traishona, a kohe pan;

²⁴i ora ku El a kaba di duna gradisimentu, El a kibr'e, i a bisa: "Esaki ta Mi kurpa ku ta wordu kibra pa boso; hasi esaki na Mi rekuerdo."

²⁵Di e mesun manera El a kohe e kopa tambe, despues di a kaba di sena, bisando: "E kopa aki ta e aliansa nobo den Mi sanger; hasi esaki, kada bes ku boso beb'e, na Mi rekuerdo."

²⁶Pasobra kada bes ku boso kome e pan aki i bebe e kopa aki, boso ta proklama e morto di Senor te ora ku E bin.

²⁷Pesei, ken ku kome e pan aki of bebe e kopa di Senor na un manera indigno lo ta kulpabel di e kurpa i sanger di Senor.

²⁸Ma laga kada hende samina su mes, i asina lagu'e kome di e pan i bebe di e kopa.

²⁹Pasobra esun ku kome i bebe ta kome i bebe huisio pa su mes, si e no huzga e kurpa korektamente.

³⁰Pa e motibu aki hopi meimei di boso ta debil i malu, i un kantidat a muri.

³¹Pasobra si nos a huzga nos mes korektamente, nos lo no a wordu huzga.

³²Ma ora nos wordu huzga, nos ta wordu disiplina dor di Senor, pa nos no wordu kondena huntu ku e mundu.

³³Asina anto, mi rumannan, ora boso bin huntu pa kome, boso un warda riba otro.

³⁴Si un hende tin hamber, lagu'e kome na kas, pa boso no bin huntu pa huisio. I e otro asuntonan lo mi regla ora mi bin.