Read Papantla Totonac 1 Korintionan 14 Bible Online

1 Korintionan 14 - Papantla Totonac bible

1 Korintionan 14

¹Aspira na amor, i anhela na donnan spiritual, ma spesialmente pa boso por profetisa.

²Pasobra esun ku ta papia den lenga no ta papia ku hende, sino ku Dios; pasobra ningun hende no ta komprende, ma den spiritu e ta papia misterionan.

³Ma esun ku ta profetisa ta papia ku hende pa edifikashon, eksortashon i konsuelo.

⁴Esun ku ta papia den lenga ta edifika su mes; ma esun ku ta profetisa ta edifika iglesia.

⁵Awor mi ta desea ku boso tur tabata papia den lenga, ma mas ainda ku boso lo a profetisa; i mas grandi ta esun ku ta profetisa ku esun ku ta papia den lenga, a menos ku e splik'e, pa e iglesia por risibi edifikashon.

⁶Ma awor, rumannan, si mi bin serka boso papiando den lenga, ki probecho lo mi ta pa boso, a menos ku mi papia ku boso pa medio di revelashon of di konosementu of di profesia of di sinansa?

⁷Asina asta kosnan sin bida, sea fluit of arpa, ora nan ta produsi zonidu, si nan no produsi un diferensia den tono, kon hende lo sa kiko ta wordu toka riba e fluit of e arpa?

⁸Pasobra si e trompet no produsi un zonidu kla, ken lo prepara su mes pa guera?

⁹Asina boso tambe, si boso no papia ku boso lenga palabranan bon komprendibel, kon hende por sa kiko ta wordu papia? Pasobra boso lo papia komo si fuera ta den aire boso ta papia.

¹⁰Siguramente tin hopi sorto di idioma den mundu, i ningun no ta sin nifikashon.

¹¹Si ami anto no sa e nifikashon di e idioma, lo mi ta un stranhero pa esun ku ta papia, i esun ku ta papia lo ta un stranhero pa mi.

¹²Asina boso tambe, komo ku boso ta anhela na donnan spiritual, trata di abunda den esakinan pa edifikashon di e iglesia.

¹³Pesei, laga esun ku ta papia den lenga hasi orashon pa e por interpret'd.

¹⁴Pasobra si mi hasi orashon den lenga, mi spiritu ta hasi orashon, ma mi komprendementu no ta partisipa.

¹⁵Kiko anto? Lo mi hasi orashon ku mi spiritu, i lo mi hasi orashon ku mi mente tambe; lo mi kanta ku mi spiritu i lo mi kanta ku mi mente tambe.

¹⁶Pasobra si bo bendishona den spiritu so, kon esun ku ta okupa luga di esnan sin don por bisa "Amen" ora bo ta duna gradisimentu, siendo ku e no sa kiko bo ta bisa?

¹⁷Pasobra di berdat bo ta gradisi bon, ma e otro hende no ta wordu edifika.

¹⁸Mi ta gradisi Dios ku mi ta papia den lenga mas ku boso tur;

¹⁹sinembargo, den iglesia mi ta prefera di papia sinku palabra ku mi mente, pa mi por sina otronan tambe, ku dies mil palabra den lenga.

²⁰Rumannan, no sea mucha den boso pensamentu; sinembargo, sea mucha chikitu den maldat, ma madura den boso pensamentu.

²¹Den e Lei ta para skirbi: "Pa medio di hende di lenga strano i pa medio di lep di stranhero lo Mi papia ku e pueblo aki, i asina mes nan lo no skucha na Mi," Senor ta bisa.

²²Asina anto, lenganan ta un senal, no pa esnan ku ta kere, sino pa inkredulonan; ma profesia ta un senal, no pa inkredulonan, sino pa esnan ku ta kere.

²³Pesei anto, si henter iglesia reuni i tur ta papia den lenga, i ta drenta hendenan ku no ta komprende of inkredulonan, nan lo no bisa ku boso ta loko?

²⁴Ma si tur ta profetisa, i un inkredulo of un hende ku no ta komprende drenta, e ta wordu konvensi dor di tur, e ta wordu huzga dor di tur;

²⁵e sekretonan di su kurason ta sali na kla; i asina e lo tira su kurpa abou ku su kara te na suela i adora Dios, deklarando ku sigur-sigur Dios ta meimei di boso.

²⁶Kiko anto, rumannan? Ora boso ta reuni, kada un tin un salmo, un sinansa, un revelashon, un lenga, un interpretashon. Laga tur kos wordu hasi pa edifikashon.

²⁷Si tin hende ta papia den lenga, laga esei sosode pa dos of di mas tantu tres, i kada un na su turno, i laga un duna interpretashon;

²⁸ma si no tin interprete, lagu'e keda ketu den iglesia; i lagu'e papia ku su mes i ku Dios.

²⁹I laga dos of tres profeta papia, i laga e otronan huzga.

³⁰Ma si un revelashon wordu duna na un otro ku ta sinta einan, laga esun prome keda ketu.

³¹Pasobra boso tur por profetisa un pa un, pa tur por sina i tur por wordu eksorta;

³²i e spiritunan di e profetanan ta someti na e profetanan;

³³pasobra Dios no ta un Dios di konfushon, sino di pas. Manera den tur e iglesianan di e santunan,

³⁴laga e muhenan keda ketu den e iglesianan; pasobra no ta permit! pa nan papia, ma laga nan somete nan mes, manera Lei ta bisa tambe.

³⁵I si nan ta desea di sina algu, laga nan puntra nan mes esposonan na kas; pasobra ta para mahos pa un muhe papia den iglesia.

³⁶Ta for di boso e palabra di Dios a sali prome? Of ta serka boso so el a yega?

³⁷Si tin un hende ta kere ku e ta un profeta of ku e ta spiritual, lagu'e rekonose ku e kosnan ku mi ta skirbi boso ta e mandamentu di Senor.

³⁸Ma si un hende no rekonose esaki, e tampoko no ta wordu rekonosi.

³⁹Pesei, mi rumannan, anhela pa profetisa i no prohibi pa papia den lenga.

⁴⁰Ma laga tur kos sosode korektamente i na un manera ordena.