Read Papantla Totonac 1 Korintionan 15 Bible Online

1 Korintionan 15 - Papantla Totonac bible

1 Korintionan 15

¹Awor, rumannan, mi ta deklara na boso e evangelio ku mi a predika na boso, kual tambe boso a risibi, den kual tambe boso ta para,

²pa medio di kual tambe boso ta salba, si boso tene firme na e palabra ku mi a predika na boso, a menos ku boso a kere en bano.

³Pasobra na prome luga mi a duna boso loke mi tambe a risibi, ku Cristo a muri pa nos pikanan segun e Skrituranan

⁴i ku El a wordu dera, i ku El a wordu lanta riba e di tres dia segun e Skrituranan,

⁵i ku El a parese na Sefas, despues na e diesdosnan.

⁶Despues di esei El a parese na mas ku sinku shen ruman na e mesun tempu, di kualnan mayoria ta na bida te ainda, ma algun a muri;

⁷despues El a parese na Santiago, despues na tur e apostelnan;

⁸i por ultimo El a parese na mi tambe, manera na un ku a nase for di tempu.

⁹Pasobra ami ta esun di mas menos di e apostelnan, kende no ta digno pa wordu yama apostel, pasobra mi a persigui e iglesia di Dios.

¹⁰Ma pa medio di e grasia di Dios mi ta loke mi ta, i Su grasia pa ku mi no tabata en bano; ma mi a traha mas ku nan tur, ma no ami mes, sino e grasia di Dios ku tabata ku mi.

¹¹Asina anto, sea ku tabata ami of nan, asina nos ta predika i asina boso a kere.

¹²Awor si Cristo ta wordu predika, ku El a wordu lanta for di e mortonan, kon algun di boso ta bisa ku no tin resurekshon di e mortonan?

¹³Ma si no tin resurekshon di e mortonan, anto ni Cristo tampoko no a wordu lanta;

¹⁴i si Cristo no a wordu lanta, e ora ei nos predikamentu ta bano, i boso fe tambe ta bano.

¹⁵Ademas, nos ta resulta di ta testigunan falsu di Dios, pasobra nos a duna testimonio kontra Dios ku El a lanta Cristo, Kende E no a lanta, si di berdat e mortonan no ta wordu lanta.

¹⁶Pasobra si e mortonan no ta wordu lanta, Cristo tampoko no a wordu lanta;

¹⁷i si Cristo no a wordu lanta, boso fe ta sin balor; ainda boso ta den boso pikanan.

¹⁸E ora ei tambe esnan ku a muri den Cristo a perese.

¹⁹Si ta den e bida aki so nos a spera den Cristo, e ora ei di tur hende nos ta esnan mas di kompadese.

²⁰Ma awor Cristo a wordu lanta for di e mortonan, e prome fruta di esnan ku a muri.

²¹Pasobra komo ku morto a bin pa medio di un hende, asina tambe pa medio di un hende a bin e resurekshon di e mortonan.

²²Pasobra meskos ku den Adam tur ta muri, asina tambe tur lo wordu has! bibu den Cristo.

²³Ma kada un segun su mes orden: Cristo e prome fruta, despues di esei, esnan ku ta di Cristo na Su binida;

²⁴despues e fin ta yega, ora ku E ta entrega e reino na Dios Tata, ora ku El a pone un fin na tur dominio i na tur outoridat i poder.

²⁵Pasobra E mester reina te ora ku El a pone tur Su enemigunan bou di Su pia.

²⁶E delaster enemigu ku lo wordu destrui ta morto.

²⁷Pasobra El a somete tur kos bou di Su pia. Ma ora ku E bisa: "Tur kos ta wordu someti," ta klaro ku ta ku eksepshon di Esun, Kende a somete tur kos na djé.

²⁸I ora tur kos ta wordu someti na djé, e ora ei e Yu mes tambe lo wordu someti na Esun, Kende a somete tur kos na djé, pa Dios por ta tur den tur.

²⁹Sino, kiko esnan ku ta wordu batisa pa e mortonan lo hasi? Si di ningun manera e mortonan no ta wordu lanta, pakiko nan ta wordu batisa pa e mortonan anto?

³⁰Pakiko nos tambe ta den peliger tur ora bai?

³¹Mi ta sigura boso, rumannan, pa e orguyo ku mi tin den boso den Cristo Jesus nos Senor, ku mi ta muri diariamente.

³²Si komo hende mi a bringa ku bestianan di mondi na Efeso, ki probecho mi tin di esei? Si e mortonan no ta wordu lanta, "Laga nos kome i bebe, pasobra manan nos ta muri."

³³No laga hende gana boso: "Mal kompania ta dana bon kustumber."

³⁴Uza boso sano huisio manera mester ta, i stop di hasi pika; pasobra algun no tin konosementu di Dios. Mi ta bisa esaki pa brongosa boso.

³⁵Ma algun hende lo bisa: "Kon e mortonan ta wordu lanta? I ku ki sorto di kurpa nan ta bin?"

³⁶Boso, bobonan! Loke bo sembra no ta hana bida si e no muri;

³⁷i loke bo sembra, no ta e kurpa ku e lo bira bo ta sembra, ma un simpel simia, sea di trigo of di algu otro.

³⁸Ma Dios ta dun'e un kurpa manera El a desea, i na kada un di e simianan un kurpa di su mes.

³⁹Tur karni no ta e mesun karni, ma tin un karni di hende, i otro karni di bestia, i otro karni di parha, i otro di piska.

⁴⁰Tin tambe kurpanan selestial i kurpanan terenal, ma e gloria di esnan selestial ta un, i e gloria di esnan terenal ta otro.

⁴¹Tin un gloria di e solo, i un otro gloria di e luna, i un otro gloria di e streanan; pasobra esun strea ta diferente di e otro strea den gloria.

⁴²Asina e resurekshon di e mortonan tambe ta. Kurpa ta wordu sembra den korupshon i ta wordu lanta den inkorupshon;

⁴³ta wordu sembra den desonor, ta wordu lanta den gloria; ta wordu sembra den debilidat, ta wordu lanta den poder;

⁴⁴ta wordu sembra un kurpa natural, ta wordu lanta un kurpa spiritual. Si tin un kurpa natural, tin un kurpa spiritual tambe.

⁴⁵Asina tambe ta para skirbi: "E prome hende, Adam, a bira un alma bibu." E ultimo Adam a bira un spiritu ku ta duna bida.

⁴⁶Sinembargo, loke ta spiritual no ta prome, sino loke ta natural; despues loke ta spiritual.

⁴⁷E prome hende ta di tera, traha di stof; e di dos hende ta di shelu.

⁴⁸Manera esun traha di stof, esnan ku ta traha di stof tambe ta; i manera Esun selestial, esnan ku ta selestial tambe ta.

⁴⁹I meskos ku nos a karga e semehansa di e hende traha di stof, nos lo karga e semehansa di e Hende selestial tambe.

⁵⁰Awor mi ta bisa esaki, rumannan, ku karni i sanger no por ereda e reino di Dios; ni korupshon no ta ereda inkorupshon.

⁵¹Mira, mi ta konta boso un misterio; nos tur lo no muri, ma nos tur lo wordu transforma,

⁵²den un momento, den un frega di wowo, na e ultimo zonidu di trompet; pasobra e trompet lo zona, i e mortonan lo wordu lanta den inkorupshon, i nos lo wordu transforma.

⁵³Pasobra e loke ta koruptibel aki mester wordu bisti ku loke ta inkoruptibel, i e loke ta mortal aki mester wordu bisti ku loke ta inmortal.

⁵⁴Ma ora e loke ta koruptibel aki bisti loke ta inkoruptibel, i e loke ta mortal aki bisti loke ta inmortal, e ora ei e palabra ku ta para skirbi lo keda kumpli: "Morto ta traga den viktoria.

⁵⁵O morto, unda bo viktoria ta? O morto, unda bo pui ta?"

⁵⁶E pui di morto ta pika, i e poder di pika ta lei;

⁵⁷ma grasia sea na Dios, Kende ta duna nos e viktoria pa medio di nos Senor Jesu-Cristo.

⁵⁸Pesei, mi rumannan stima, sea firme, konstante, semper abundando den e trabou di Senor, sabiendo ku boso trabou no ta en bano den Senor.