Read Papantla Totonac 1 Korintionan 3 Bible Online

1 Korintionan 3 - Papantla Totonac bible

1 Korintionan 3

¹I ami, rumannan, no por a papia ku boso manera ta papia ku hende spiritual, sino manera ta papia ku hende karnal, manera ku mucha chikitu den Cristo.

²Mi a duna boso lechi pa bebe, no kuminda solido; pasobra boso no tabata por a risibi esaki ainda. Si, te ainda boso no por,

³pasobra ainda boso ta karnal. Pasobra komo ku ta eksisti envidia, pleitu i divishon entre boso, no ta karnal boso ta, i no ta manera tur hende boso ta kana?

⁴Pasobra ora esun ta bisa: "Ami ta di Pablo," i un otro: "Ami ta di Apolos," no ta manera tur hende boso ta?

⁵Kiko Apolos ta anto? I kiko Pablo ta? Sirbidonan pa medio di kendenan boso a kere, manera Senor a duna oportunidat na kada un.

⁶Ami a planta, Apolos a muha, ma ta Dios a duna kresementu.

⁷Asina anto, ni esun ku ta planta ni esun ku ta muha no ta nifika nada, sino Dios, Kende ta duna kresementu.

⁸Awor esun ku ta planta i esun ku ta muha ta un; ma kada un lo risibi su mes rekompensa segun su mes trabou.

⁹Pasobra nos ta Dios Su kolaboradornan; boso ta Dios Su kunuku, Dios Su edifisio.

¹⁰Segun e grasia di Dios ku a wordu duna na mi, mi a pone un fundeshi manera un arkitekto sabi, i un otro ta trahando riba dje. Ma laga kada hende tene kuidou kon e ta traha riba dje.

¹¹Pasobra ningun hende no por pone otro fundeshi ku esun ku ta poni kaba, kual ta Jesu-Cristo.

¹²Awor si un hende traha riba e fundeshi aki, uzando oro, plata, piedra presioso, palu, yerba seku, palu di mainshi seku,

¹³lo sali na kla ki sorto di trabou e ta hasi; pasobra e dia lo demostra esaki, pasobra e lo wordu revela pa medio di kandela; i e kandela mes lo proba e kalidat di kada hende su trabou.

¹⁴Si un hende su trabou ku el a traha riba dje permanese, e lo risibi un rekompensa.

¹⁵Si un hende su trabou kima, e lo sufri pierde; e mes lo ta salba, ma komo un ku a pasa dor di kandela.

¹⁶Boso no sa ku boso ta e tempel di Dios, i ku e Spiritu di Dios ta biba den boso?

¹⁷Si un hende destrui e tempel di Dios, Dios lo destruie. Pasobra e tempel di Dios ta santu, i esei ta loke boso ta.

¹⁸No laga ningun hende gana su mes. Si un hende entre boso kere ku e ta sabi den e siglo aki, lagu'e bira bobo, pa e por bira sabi.

¹⁹Pasobra e sabiduria di e mundu aki ta bobedat dilanti di Dios. Pasobra ta para skirbi: "E ta Esun ku ta kohe e sabinan den nan astusia";

²⁰i atrobe: "SENOR konose e rasonamentunan di e sabinan, ku nan ta inutil."

²¹Asina anto, no laga ni un hende gloria den hende. Pasobra tur kos ta pertenese na boso,

²²sea Pablo of Apolos of Sefas of e mundu of bida of morto of kosnan presente of kosnan ku ta bin; tur kos ta pertenese na boso,

²³i boso ta pertenese na Cristo; i Cristo ta pertenese na Dios.