Read Papantla Totonac 1 Korintionan 4 Bible Online

1 Korintionan 4 - Papantla Totonac bible

1 Korintionan 4

¹Laga hende konsidera nos asin'aki: manera sirbidonan di Cristo i mayordomonan di e misterionan di Dios.

²Ademas, ta wordu rekeri di mayordomo ku kada un ta wordu hana fiel.

³Ma pa mi ta di poko importansia si mi wordu huzga dor di boso of dor di un tribunal humano; en realidat, ni ami mes no ta huzga mi mes.

⁴Mi konsenshi no ta akusami di nada, sinembargo, mi no ta wordu hustifika dor di esaki; ma Esun ku ta huzgami ta Senor.

⁵Pesei, no sigui huzga prome ku tempu, ma warda te ora Senor bin, Kende tambe lo trese na kla e kosnan skondi den skuridat i deskubri e intenshonnan di kurason di hende; i e ora ei kada hende lo risibi su elogio for di Dios.

⁶Awor e kosnan aki, rumannan, mi a aplika na mi mes i na Apolos pa boso benefisio, pa boso por a sina for di nos di no pensa mas di loke ta skirbi, pa ni un di boso no bira arogante un kontra otro.

⁷Pasobra ta ken ta konsiderabo superior? I kiko bo tin ku bo no a risibi? Ma si bo a risibie, pakiko bo ta gaba komo si fuera bo no a risibie?

⁸Ya boso ta yen kaba, boso a bira riku kaba, boso a bira rei sin nos; ai, mara berde ku boso a bira rei, pa nos tambe por a reina huntu ku boso.

⁹Pasobra mi ta pensa ku Dios a pone nos, apostelnan, komo ultimo, komo hombernan sentensia na morto; pasobra nos a bira un spetakel pa mundu, tantu pa angel komo pa hende.

¹⁰Nos ta bobonan pa kousa di Cristo, ma boso ta sabi den Cristo. Nos ta debil, ma boso ta fuerte; boso ta distingui, ma nos ta sin onor.

¹¹Te na e momento aki nos ta padese hamber i set, nos ta kasi sunu, nos ta wordu trata brutu i nos no tin luga di biba;

¹²i nos ta traha mata kurpa, trahando ku nos mes mannan; ora nos wordu insulta, nos ta bendishona; ora nos wordu persigui, nos ta soporta;

¹³ora nos wordu kalumnia, nos ta purba di rekonsilia; nos a bira meskos ku basura di mundu, e sushedat di tur kos, te awor aki.

¹⁴Mi no ta skirbi e kosnan aki pa brongosa boso, ma pa spierta boso komo mi yunan stima.

¹⁵Pasobra maske boso lo tabatin dies mil edukado den Cristo, tog boso lo no tin hopi tata, pasobra den Cristo Jesus t'ami a bira boso tata pa medio di e evangelio.

¹⁶Pesei mi ta eksorta boso, sea imitadonan di mi.

¹⁷Pa e motibu aki mi a manda Timoteo serka boso, kende ta mi yu stima i fiel den Senor, i e lo hasi boso korda mi kamindanan ku ta den Cristo, manera mi ta sina tur parti den tur iglesia.

¹⁸Awor algun a bira arogante, keriendo ku mi no ta bin serka boso.

¹⁹Ma pronto lo mi bin serka boso, si Senor kier, i lo mi hana sa, no e palabranan di esnan ku ta arogante, ma nan poder.

²⁰Pasobra e reino di Dios no ta konsisti di palabra, sino di poder.

²¹Kiko boso kier? Ta ku bara mi mester bin serka boso of ku amor i un spiritu di suavidat?