Read Papantla Totonac 1 Korintionan 6 Bible Online

1 Korintionan 6 - Papantla Totonac bible

1 Korintionan 6

¹Ken di boso, ora ku e tin un kaso kontra un otro ruman, ta tribi bai korte dilanti di e inhustunan i no dilanti di e santunan?

²Of boso no sa ku ta e santunan lo huzga mundu? I si ta boso ta huzga mundu, boso no ta kompetente pa huzga e kasonan hudisial di mas chikitu?

³Boso no sa ku nos lo huzga angelnan? Kuantu mas anto asuntonan di e bida aki?

⁴Si boso anto tin kasonan hudisial ku ta trata asuntonan di e bida aki, boso lo a apunta komo hues esnan ku no ta konta den iglesia?

⁵Mi ta bisa esaki pa brongosa boso. T'asina ku no tin ni un homber sabi meimei di boso ku ta kapas pa disidi entre su rumannan,

⁶ma ku ruman ta hiba ruman dilanti di hues, i esei dilanti di inkredulonan?

⁷E echo ku boso tin kasonan hudisial kontra otro ya ta un tremendo fayo pa boso. Pakiko boso no ta prefera di sufri inhustisia? Pakiko boso no ta prefera di wordu perhudika?

⁸Alkontrario, boso mes ta komete inhustisia i ta defrouda otro, anto boso mes rumannan.

⁹Of boso no sa ku e inhustunan lo no ereda e reino di Dios? No laga nan gana boso; ni fornikado, ni adorado di dios falsu, ni adultero, ni sodomita, ni homoseksual,

¹⁰ni ladron, ni esnan golos pa plaka, ni burache, ni blasfemado, ni estafado lo no ereda e reino di Dios.

¹¹I asina algun di boso tabata; ma boso a wordu laba, ma boso a wordu santifika, ma boso a wordu hustifika den e nomber di Senor Jesu-Cristo i den e Spiritu di nos Dios.

¹²Tur kos ta permit! pa mi, ma tur kos no ta kumbini; tur kos ta permit! pa mi, ma lo mi no laga nada dominami.

¹³Kuminda ta pa stoma, i stoma ta pa kuminda; ma Dios lo kaba ku tur dos. Sinembargo, e kurpa no ta pa inmoralidat, ma pa Senor; i Senor ta pa e kurpa.

¹⁴Awor Dios no solamente a lanta Senor, ma lo lanta nos tambe dor di Su poder.

¹⁵Boso no sa ku boso kurpanan ta miembronan di Cristo? Lo mi kita e miembronan di Cristo anto i hasi nan bira miembro di un prostituta? Di ningun manera!

¹⁶Of boso no sa ku esun ku uni su mes ku un prostituta ta un kurpa kune? Pasobra E ta bisa: "E dosnan lo bira un karni."

¹⁷Ma esun ku uni su mes ku Senor ta un spiritu kuné.

¹⁸Hui for di inmoralidat. Tur otro pika ku un hende komete ta pafo di e kurpa, ma e hende inmoral ta peka kontra su mes kurpa.

¹⁹Of boso no sa ku boso kurpa ta e tempel di Spiritu Santu, Kende ta den boso, Kende boso tin di Dios, i ku boso no ta pertenese na boso mes?

²⁰Pasobra boso a wordu kumpra pa un preis: pesei glorifika Dios den boso kurpa.