Read Papantla Totonac 1 Korintionan 7 Bible Online

1 Korintionan 7 - Papantla Totonac bible

1 Korintionan 7

¹Awor tokante di e kosnan di kual boso a skirbi, ta bon pa un homber no kasa.

²Ma pa motibu di inmoralidat, laga kada homber tin su mes esposa, i laga kada muhe tin su mes esposo.

³Laga e esposo kumpli ku su deber di matrimonio pa ku su esposa, i meskos tambe e esposa pa ku su esposo.

⁴E esposa no tin outoridat riba su mes kurpa, sino e esposo; i meskos tambe e esposo no tin outoridat riba su mes kurpa, sino e esposa.

⁵Stop di nenga otro, si no ta pa un tempu, ku konsentimentu di otro, pa boso por dedika boso mes na orashon; i bin huntu atrobe, pa Satanas no tenta boso pa motibu di boso falta di dominio propio.

⁶Ma esaki mi ta bisa komo algu ku ta permit!, no komo ordu.

⁷Pasobra mi ta desea ku tur hende tabata manera ami. Sinembargo, kada hende tin su mes don di Dios, un na e manera aki, i otro na e manera aya.

⁸Ma mi ta bisa e solteronan i e biudanan, ku ta bon pa nan, si nan keda manera ami.

⁹Ma si nan no tin dominio propio, laga nan kasa; pasobra ta miho kasa ku kima di pashon.

¹⁰Ma na esnan kasa mi ta duna instrukshon, no ami, sino Senor, ku e esposa no mester bai laga su esposo

¹¹(ma si e bai tog, lagu'e keda sin kasa, of rekonsilia ku su esposo), i ku e esposo no mester manda su esposa bai.

¹²Ma na e otronan ami ta bisa, no Senor, ku si un ruman tin un esposa ku no ta un kreyente, i e ta bai di akuerdo pa biba huntu kune, e esposo no mester mand'e bai.

¹³I un muhe ku tin un esposo ku no ta un kreyente, i e ta bai di akuerdo pa biba huntu kune, e no mester manda su esposo bai.

¹⁴Pasobra e esposo ku no ta un kreyente ta santifika dor di su esposa, i e esposa ku no ta un kreyente ta santifika dor di su esposo ku ta un kreyente; pasobra di otro manera boso yunan ta impuru, ma awor nan ta santu.

¹⁵Ma si esun ku no ta un kreyente ta bai, lagu'e bai; e ruman homber of ruman muhe den kasonan asina no ta mara, ma Dios a yama nos pa pas.

¹⁶Pasobra kon bo sa, esposa, ku kisas lo bo salba bo esposo? Of kon bo sa, esposo, ku kisas lo bo salba bo esposa?

¹⁷Solamente, manera Senor a determina pa kada un, manera Dios a yama kada un, lagu'e kana di e manera aki. I asina mi ta ordena den tur e iglesianan.

¹⁸Tin hende ku a wordu yama, siendo sirkumsida? No lagu'e bira insirkumsida. Tin hende ku a wordu yama, siendo insirkumsida? No lagu'e wordu sirkumsida.

¹⁹Sirkumsishon no ta nada, ni insirkumsishon no ta nada, ma loke si ta importante ta e kumplimentu di e mandamentunan di Dios.

²⁰Laga kada hende keda den e kondishon ku el a wordu yama.

²¹Bo a wordu yama, siendo esklabu? No preokupa pa esei; ma si akaso bo por bira liber, hasi esei anto.

²²Pasobra esun ku a wordu yama den Senor siendo esklabu, ta un hende liber den Senor; meskos, esun ku a wordu yama siendo liber, ta esklabu di Cristo.

²³Boso a wordu kumpra pa un preis; no bira esklabu di hende.

²⁴Rumannan, laga kada hende keda dilanti di Dios den e kondishon den kual el a wordu yama.

²⁵Awor tokante di birgennan mi no tin ordu di Senor, ma mi ta duna un opinion komo un hende ku pa e miserikordia di Senor ta di konfia.

²⁶Mi ta pensa anto ku esaki ta bon pa motibu di e kalamidat aktual, ku ta bon pa un hende keda manera e ta.

²⁷Bo ta mara na un esposa? No buska separashon. Bo ta liber di un esposa? No buska un esposa.

²⁸Ma si bo kasa, bo no a peka; i si un birgen kasa, e no a peka. Ma eseinan lo sufri tribulashon den e bida aki, i mi ta trata di spar boso di esei.

²⁹Ma esaki mi ta bisa, rumannan, tempu ta kortiku, asina ta ku for di awor esnan ku tin esposa mester ta komo si fuera nan no tin esposa;

³⁰i esnan ku ta yora, komo si fuera nan no a yora; i esnan ku ta regosiha, komo si fuera nan no a regosiha; i esnan ku ta kumpra, komo si fuera nan no tabatin nada;

³¹i esnan ku ta hasi uzo di e kosnan di mundu, komo si fuera nan no a hasi uzo kompleto di nan; pasobra e mundu aki den su forma aktual ta pasando.

³²Ma mi no kier pa boso tin kibramentu di kabes. Esun ku no ta kasa ta okupa su mes ku e kosnan di Senor, kon e por agrada Senor;

³³ma esun ku ta kasa ta kibra su kabes ku e kosnan di mundu, kon e por agrada su esposa,

³⁴i su interesnan ta keda dividi. I e muhe ku no ta kasa i e birgen ta okupa su mes ku e kosnan di Senor, pa e por ta santu tantu den kurpa komo den spiritu; ma esun ku ta kasa ta okupa su mes ku e kosnan di mundu, kon e por agrada su esposo.

³⁵I esaki mi ta bisa pa boso mes bon; no pa pone restrikshon riba boso, ma pa boso biba na un manera apropia, kompletamente dedika na Senor.

³⁶Ma si un homber ta kere ku e ta aktua na un manera inapropia pa ku su yu muhe birgen, si e yu muhe a pasa flor di su hubentut, i e ta sinti ku e yu muhe mester kasa, laga e homber hasi manera ku e ta desea. E no ta hasi pika; laga e birgen kasa.

³⁷Ma e homber ku a bin na un konklushon definitivo den su kurason, ku no ta bou di ningun preshon, ma ku tin kontrol riba su mes boluntat, i ku a disidi den su kurason pa no kasa su yu muhe birgen--e homber aki tambe ta hasi bon.

³⁸Asina anto, esun ku duna su birgen pa kasa ta hasi bon, ma esun ku no dun'e pa kasa ta hasi miho ainda.

³⁹Un esposa ta mara na su esposo tanten ku su esposo ta na bida; ma si su esposo muri, e ta liber pa kasa ku ken ku e ta desea, basta ta den Senor.

⁴⁰Ma den mi opinion e ta mas felis si e keda manera e ta; i mi ta kere ku ami tambe tin e Spiritu di Dios.