Read Papantla Totonac 1 Korintionan 8 Bible Online

1 Korintionan 8 - Papantla Totonac bible

1 Korintionan 8

¹Awor tokante di kosnan sakrifika na ldolo, nos sa ku nos tur tin konosementu. Konosementu ta hasi arogante, ma amor ta edifika.

²Si un hende ta kere ku e sa algu, ainda e no sa manera e mester sa;

³ma si un hende ta stima Dios, e ta konosi pa Dios.

⁴Pesei, tokante di e komementu di kosnan sakrifika na idolo, nos sa ku no ta eksisti idolo den mundu, i ku no tin ningun otro Dios, sino Un so.

⁵Pasobra maske tin loke nan ta yama dios, sea den shelu of riba tera, manera di berdat tin hopi dios i hopi shon,

⁶tog pa nos tin un Dios so, e Tata, for di Kende tur kos ta bin, i nos ta eksisti p'E; i un Senor, Jesu-Cristo, pa medio di Kende tur kos ta eksisti, i nos ta eksisti pa medio di djé.

⁷Sinembargo, no ta tur hende tin e konosementu aki; pasobra algun hende, ku ainda ta kustumbra ku idolo, ta kome kuminda komo algu sakrifika na idolo; i nan konsenshi, siendo debil, ta wordu kontamina.

⁸Ma kuminda lo no hasi nos mas aseptabel pa Dios; nos no ta ni pio si nos no kome, ni miho si nos wel kome.

⁹Ma tene kuidou pa e libertat aki di boso, di un manera of otro, no bira un piedra di trompeka pa esnan ku ta debil.

¹⁰Pasobra si un hende mira abo, ku tin konosementu, ta sinta kome den un tempel di idolo, su konsenshi, si e ta debil, lo no wordu enkurasha pa kome kosnan sakrifika na idolo?

¹¹Pasobra pa motibu di bo konosementu esun ku ta debil ta keda destrui, e ruman pa kende Cristo a muri.

¹²I asina, dor di peka kontra e rumannan i dor di herida nan konsenshi debil, boso ta peka kontra Cristo.

¹³Pesei, si kuminda ta hasi mi ruman trompeka, lo mi no kome karni nunka mas, pa mi no hasi mi ruman trompeka.