Read Papantla Totonac 1 Korintionan 9 Bible Online

1 Korintionan 9 - Papantla Totonac bible

1 Korintionan 9

¹Mi no ta liber? Mi no ta un apostel? Mi no a mira Jesus nos Senor? Boso no ta mi obra den Senor?

²Si pa otronan mi no ta un apostel, pa boso sigur ku sf pasobra boso ta e seyo di mi apostolado den Senor.

³Mi defensa kontra esnan ku ta huzgami ta esaki:

⁴Nos no tin derecho di kome i bebe?

⁵Nos no tin derecho di hiba ku nos un esposa kreyente, meskos ku e otro apostelnan, i e rumannan di Senor i Sefas?

⁶Of ta Barnabas i ami so no tin derecho di keda sin traha?

⁷Ken a yega di sirbi komo solda riba su mes gastu? Ken ta planta un kunuku di wendruif sin kome di su fruta? Of ken ta kuida un tou sin uza lechi di e tou?

⁸Akaso ta for di punto di bista humano mi ta papia e kosnan aki? Of Lei tambe no ta bisa e kosnan aki?

⁹Pasobra ta para skirbi den e Lei di Moises: "No pone bosal pa buey ora ku e ta trapa mainshi." Ta pa buey Dios ta preokupa anto?

¹⁰Siguramente, ta pa nos motibu E ta bisa esaki, no t'asina? Si, ta pa nos motibu esaki a wordu skirbi, pasobra e plugdo mester plug ku speransa, i e batido-di-mainshi mester bati mainshi ku speransa di hana parti di e kosecha.

¹¹Si nos a sembra kosnan spiritual den boso, ta algu di mas si nos kosecha kosnan material for di boso?

¹²Si otronan tin e derecho aki riba boso, nos no tin mas ainda? Sinembargo, nos no a hasi uzo di e derecho aki, ma nos ta soporta tur kos, pa nos no kousa strobashon na e evangelio di Cristo.

¹³Boso no sa ku esnan ku ta ministra den e sirbishinan santu ta kome e kuminda di e tempel, i ku esnan ku ta sirbi regularmente na e altar ta hana nan parti for di e altar?

¹⁴Asina tambe Senor a ordena pa esnan ku ta predika evangelio biba di evangelio.

¹⁵Ma ami no a hasi uzo di ningun di e kosnan aki. I mi no ta skirbi e kosnan aki pa esaki wordu hasi asina den mi kaso; pasobra mi ta prefera di muri ku laga un hende hasi mi gabamentu bira algu bano.

¹⁶Pasobra si mi ta predika evangelio, mi no tin nada pa gaba di dje, pasobra ta mi obligashon; pasobra ai di mi si mi no predika evangelio!

¹⁷Pasobra si mi hasi esaki boluntariamente, mi tin un rekompensa; ma si ta kontra mi boluntat, mi tin un mayordomia ku a wordu konfia na mi.

¹⁸Kiko anto ta mi rekompensa? Ku ora mi predika evangelio mi por ofrese evangelio pornada, pa mi no hasi uzo kompleto di mi derecho den evangelio.

¹⁹Pasobra ounke mi ta liber di tur hende, mi a hasi mi mes esklabu di tur, pa mi por gana mas ainda.

²⁰I pa e hudiunan mi a bira manera un hudiu, pa mi por gana e hudiunan; pa esnan ku ta bou di Lei mi a bira manera bou di Lei, maske mi mes no ta bou di Lei, pa mi por gana esnan ku ta bou di Lei.

²¹Pa esnan ku ta sin lei, mi a bira manera un hende sin lei, ounke mi no ta sin lei di Dios, ma bou di lei di Cristo, pa mi por gana esnan ku ta sin lei.

²²Pa e debilnan mi a bira debil, pa mi por gana e debilnan; mi a bira tur kos pa tur hende, pa di tur manera mi por salba algun.

²³I mi ta hasi tur kos pa kousa di evangelio, pa mi por tuma parti den dje.

²⁴Boso no sa ku esnan ku ta kore un kareda, ta tur ta kore, ma ku ta un so ta risibi e premio? Kore di tal manera anto pa boso por gana.

²⁵I tur ku ta kompeti den e weganan ta eherse dominio propio den tur kos. Nan anto ta hasi esaki pa risibi un korona ku no ta dura, ma nos ta hasie pa risibi un korona ku ta dura pa semper.

²⁶Pesei mi no ta kore manera un hende sin meta; mi no ta boks manera un hende ku ta dal den bashi,

²⁷ma mi ta golpia mi kurpa i ta hasie mi esklabu, pa no sosode ku, despues ku mi a predika na otronan, mi mes wordu deskualifika.