Read Papantla Totonac 2 Korintionan 1 Bible Online

2 Korintionan 1 - Papantla Totonac bible

2 Korintionan 1

¹Pablo, un apostel di Cristo Jesus pa e boluntat di Dios, i Timoteo nos ruman. Na e iglesia di Dios ku ta na Korinto, huntu ku tur e santunan ku ta den henter Akaya:

²Grasia sea ku boso i pas di Dios nos Tata i di Senor Jesu-Cristo.

³Bendishona sea e Dios i Tata di nos Senor Jesu-Cristo, e Tata di miserikordianan i Dios di tur konsuelo,

⁴Kende ta konsola nos den tur nos aflikshon, pa asina nos tambe por konsola esnan ku ta den kualke aflikshon ku e mesun konsuelo ku Dios a konsola nos kune.

⁵Pasobra meskos ku e sufrimentunan di Cristo ta abunda den nos, asina nos konsuelo tambe ta abunda dor di Cristo.

⁶Ma si nos ta wordu afligi, ta pa boso konsuelo i salbashon; of si nos ta wordu konsola, ta pa boso konsuelo, kual ta efektivo pa soporta e mesun sufrimentunan ku nos tambe ta sufri;

⁷i nos speransa pa boso ta firmemente funda, sabiendo ku meskos ku boso tin parti den nos sufrimentunan, boso tin parti tambe den nos konsuelo.

⁸Pasobra, rumannan, nos no kier pa boso keda sin sa di nos aflikshon ku a bin riba nos na Asia, ku nos tabatin un karga masha pisa mes, mas ku nos por a soporta, asina ku asta nos tabata desespera di nos bida;

⁹si, nos tabatin e sentensia di morto den nos mes, pa nos no konfia den nos mes, sino den Dios, Kende ta lanta e mortonan,

¹⁰Kende a libra nos di un peliger di morto asina grandi, i lo libra nos, Esun den Kende nos a pone nos speransa. I E lo sigui libra nos,

¹¹mientras ku boso tambe ta yuda nos ku boso orashonnan, pa hopi hende por duna gradisimentu pa nos, pa e bendishon duna na nos pa medio di e orashonnan di hopi hende.

¹²Pasobra nos gloria ta esaki, e testimonio di nos konsenshi, ku den santidat i sinseridat di Dios, no den e sabiduria di hende, sino den e grasia di Dios, nos a komporta nos mes den mundu, i spesialmente pa ku boso.

¹³Pasobra nos no ta skirbi boso nada otro sino loke boso ta lesa i komprende, i mi ta spera ku boso lo komprende te na fin,

¹⁴meskos ku boso tambe a komprende nos pa un parti, ku nos ta boso motibu pa gloria, meskos ku boso tambe ta di nos, den e dia di nos Senor Jesus.

¹⁵I den e konfiansa aki mi tabatin intenshon di bin serka boso prome, pa un biaha mas boso risibi un bendishon,

¹⁶esta, pa mi pasa via boso bai Masedonia, i bolbe pasa serka boso ora mi bin for di Masedonia, i pa boso yudami riba mi biahe pa Judea.

¹⁷Pesei, ora mi a plania esaki, ta ariba-ariba mi a hasie anto? Of loke mi plania, ta segun karni mi ta plania, ku na e mesun momento mi ta bisa: si, si, i no, no?

¹⁸Ma meskos ku Dios ta fiel, nos palabra na boso no ta si i no.

¹⁹Pasobra e Yu di Dios, Cristo Jesus, Kende a wordu predika meimei di boso dor di nos--dor di mi, Silvano i Timoteo--no tabata si i no, sino si den djé.

²⁰Pasobra tur e promesanan di Dios den djé ta si, i den djé ta Amen, pa e gloria di Dios dor di nos.

²¹Awor Esun ku ta stablese nos huntu ku boso den Cristo i a ungi nos ta Dios,

²²Kende tambe a seya nos i a duna nos e Spiritu den nos kurason komo garantia.

²³Ma mi ta yama Dios komo testigu di mi alma, ku pa spar boso mi no a bin Korinto mas.

²⁴No ku nos tin dominio riba boso fe, ma nos ta trahado huntu ku boso pa boso goso; pasobra den boso fe boso ta para firme.