Read Papantla Totonac 2 Korintionan 10 Bible Online

2 Korintionan 10 - Papantla Totonac bible

2 Korintionan 10

¹Awor ami, Pablo, personalmente ta roga boso pa medio di e suavidat i ternura di Cristo--ami ku ta suave ora mi ta kara-kara ku boso, ma for di un distansia masha fuerte mes pa ku boso.

²Mi ta roga boso pa ora mi ta presente mi no tin mester di ta fuerte den e konfiansa ku kual mi tin intenshon di enfrenta algun hende ku ta kere ku nos ta kana segun karni.

³Pasobra maske nos ta kana den karni, nos no ta bataya segun karni,

⁴pasobra e armanan ku nos ta bataya kune no ta karnal, ma poderoso den Dios pa basha e fortinan abou,

⁵i pa destrui spekulashonnan i tur arogansia ku ta wordu lanta kontra e konosementu di Dios, hibando den koutiverio tur pensamentu, pa hasi nan obedesido na Cristo,

⁶i nos ta kla pa kastiga tur desobedensia, unabes ku boso obedensia ta kompleto.

⁷Boso ta wak kosnan segun nan aparensia. Si un hende ta konvensi den su mes ku e ta di Cristo, lagu'e bolbe konsidera esaki den su mes, ku meskos ku e ta di Cristo, nos tambe ta.

⁸Pasobra maske mi gaba un poko mas di nos outoridat, ku Senor a duna pa edifika boso i no pa destrui boso, lo mi no keda brongosa,

⁹pasobra mi no kier parse komo si fuera mi kier spanta boso ku mi kartanan.

¹⁰Pasobra nan ta bisa: "Su kartanan ta duru i fuerte, ma su presensia personal no ta impreshona, i su manera di papia ta despresiabel."

¹¹Laga tal persona konsidera esaki, ku loke nos ta den palabra pa medio di karta ora nos ta ousente, nos ta tambe den echo ora nos ta presente.

¹²Pasobra nos no ta tribi di konta of kompara nos mes ku algun di esnan ku ta rekomenda nan mes; ma ora nan midi nan mes ku nan mes, i kompara nan mes ku nan mes, nan ta sin komprendementu.

¹³Ma nos no kier gaba fuera di midi, sino denter di e midi di e teritorio ku Dios a duna nos komo midi, esta, pa yega te serka boso.

¹⁴Pasobra nos no ta pasa nos limite, komo si fuera nos no a alkansa boso, pasobra ta nos tabata e promenan ku a yega te serka boso ku e evangelio di Cristo;

¹⁵sin gaba di kosnan fuera di midi, esta, den e obranan di otro hende, ma ku e speransa, ku segun ku boso fe a krese, nos lo wordu engrandese mas ainda serka boso den nos mes teritorio,

¹⁶pa predika e evangelio den e regionnan mas leu di boso, i pa no gaba den loke a wordu kumpli riba teritorio di otro hende.

¹⁷Ma esun ku ta gaba, lagu'e gaba den Senor.

¹⁸Pasobra no t'esun ku ta rekomenda su mes ta keda aproba, ma esun ku Senor ta rekomenda.