Read Papantla Totonac 2 Korintionan 11 Bible Online

2 Korintionan 11 - Papantla Totonac bible

2 Korintionan 11

¹Mara boso por a tolera un poko lokura di mi; i di berdat boso ta tolera esaki tambe.

²Pasobra mi ta yalurs pa boso ku un yalursheit di Dios; pasobra mi a kompromete boso ku un esposo, pa mi por presenta boso na Cristo komo un birgen puru.

³Ma mi tin miedu ku, meskos ku e kolebra a gana Eva ku su astusia, boso mentenan lo wordu desvia for di e deboshon simpel i puru na Cristo.

⁴Pasobra si un hende bin i predika un otro Jesus ku nos no a predika, of boso risibi un otro spiritu ku boso no a risibi, of un otro evangelio ku boso no a asepta, anto boso ta tolera esaki hopi bon mes.

⁵Pasobra den nada-nada mi no ta konsidera mi mes inferior na e "super-apostelnan."

⁶Ma ounke mi no ta elokuente den palabra, den konosementu si mi ta; di tur manera nos a demostra boso esaki den tur kos.

⁷Of ta pika mi a komete dor di umiya mi mes pa boso por wordu halsa, pasobra mi a predika boso e evangelio di Dios sin kobra nada?

⁸Mi a roba otro iglesianan, tumando pago for di nan pa sirbi boso;

⁹i ora mi tabata serka boso i tabata den nesesidat, mi no tabata un karga pa ningun hende; pasobra ora ku e rumannan a bin for di Masedonia, nan a provee kompletamente den mi nesesidat, i den tur kos mi a warda mi mes di ta un karga pa boso, i lo mi sigui hasi esei.

¹⁰Mes sigur ku e berdat di Cristo ta den mi, ningun hende den e regionnan di Akaya lo no stop e gabamentu di mi aki.

¹¹Pakiko? Pasobra mi no ta stima boso? Dios sa ku mi ta stima boso!

¹²Ma loke mi ta hasi, lo mi sigui hasi, pa mi por kita oportunidat for di esnan ku ta desea un oportunidat pa wordu konsidera meskos ku nos den e asunto den kual nan ta gaba.

¹³Pasobra hombernan asina ta apostelnan falsu, trahadonan enganoso, kendenan ta disfrasa nan mes komo apostelnan di Cristo.

¹⁴I no ta nada strano, pasobra Satanas mes ta disfrasa su mes komo un angel di lus.

¹⁵Pesei no ta nada strano si su sirbidonan tambe ta disfrasa nan mes komo sirbidonan di hustisia, kende nan fin lo ta segun nan obranan.

¹⁶Atrobe mi ta bisa, no laga ni un hende tumami pa loko; ma si boso hasi esei, risibimi anto komo loko, pa mi tambe por gaba un poko.

¹⁷Loke mi ta papia, mi no ta papia manera Senor lo a papia, ma komo den lokura, den e konfiansa aki di gabamentu.

¹⁸Komo ku hopi ta gaba segun karni, ami tambe lo gaba.

¹⁹Pasobra boso, siendo asina sabi, ta tolera e bobonan ku muchu gustu.

²⁰Pasobra boso ta soporta si un hende hasi boso esklabu, si e devora boso, si e probecha di boso, si e halsa su mes, si e dal boso den kara.

²¹Pa mi berguensa mi mester bisa ku nos tabata demasiado debil pesei. Ma den kualkier sentido ku un otro hende tin tribilidat (ta den lokura mi ta papia), ami tambe tin e mesun tribilidat.

²²Nan ta hebreo? Ami tambe. Nan ta israelita? Ami tambe. Nan ta desendiente di Abraham? Ami tambe.

²³Nan ta sirbido di Cristo? (mi ta papia komo si fuera ta loko mi ta) Ami mas ainda: den hopi mas trabou duru, den prizon mas frekuentemente, suta masha hopi biaha mes, hopi biaha den peliger di morto.

²⁴Sinku biaha mi a risibi di e hudiunan trint'i nuebe sota.

²⁵Tres biaha mi a wordu suta ku bara, un biaha mi a wordu piedra, tres biaha mi a noufraga, un anochi i un dia mi a pasa riba laman grandi.

²⁶Tur ora bai mi tabata di biahe, den peliger riba riunan, den peliger di ladronnan, den peliger di mi paisanonan, den peliger di e paganonan, den peliger den stat, den peliger den desierto, den peliger riba laman, den peliger meimei di rumannan falsu;

²⁷mi a pasa den trabou duru i fatiga, den hopi nochinan sin por drumi, den hamber i set, hopi biaha sin kuminda, den friu i sunu.

²⁸Fuera di e kosnan eksterno aki, tin e preshon diario riba mi di e preokupashon pa tur e iglesianan.

²⁹Ken ta debil, sin ku ami ta debil? Ken ta kai den pika, sin ku ami ta preokupa intensamente?

³⁰Si mi mester gaba, lo mi gaba di e kosnan relashona ku mi debilidat.

³¹E Dios i Tata di Senor Jesus, Kende ta bendishona pa semper, sa ku mi no ta gana.

³²Na Damasko e gobernado ku ta bou di rei Aretas a pone warda na e stat di e damasenonan pa kohemi prezo,

³³i mi a wordu baha den un makutu dor di un bentana den muraya, i asina a skapa for di su man.