Read Papantla Totonac 2 Korintionan 3 Bible Online

2 Korintionan 3 - Papantla Totonac bible

2 Korintionan 3

¹Nos ta kuminsa rekomenda nos mes atrobe? Of t'asina ku, manera algun otronan, nos tin mester di kartanan di rekomendashon pa boso of for di boso?

²Boso ta nos karta, skirbi den nos kurason, konosi i lesa dor di tur hende,

³siendo manifesta ku boso ta un karta di Cristo, e resultado di nos ministerio, skirbi no ku enk, sino ku e Spiritu di e Dios bibu, no riba tablanan di piedra, sino riba tablanan di kurason di hende.

⁴I asina un konfiansa nos tin dor di Cristo pa ku Dios.

⁵No ku nos ta kompetente di nos mes pa pensa ku algu ta bin for di nos mes; ma nos kompetensia ta bin di Dios,

⁶Kende tambe a hasi nos kompetente pa ta sirbidonan di un aliansa nobo, no di e leter, sino di e Spiritu; pasobra e leter ta mata, ma e Spiritu ta duna bida.

⁷Ma si e ministerio di morto, graba ku leter riba piedra, a bin ku gloria, asina ku e yunan di Israel no por a fiha nan bista riba kara di Moises pa motibu di e gloria di su kara, ku poko-poko tabata disparse,

⁸kuantu mas glorioso e ministerio di e Spiritu lo no ta?

⁹Pasobra si e ministerio di kondenashon tin gloria, muchu mas e ministerio di hustisia ta abunda den gloria.

¹⁰Pasobra di berdat, loke tabatin gloria, den e kaso aki no tin gloria, pa motibu di e gloria ku ta surpas'e.

¹¹Pasobra si loke ta disparse poko-poko tabata glorioso, kuantu mas glorioso loke ta permanese ta.

¹²Teniendo anto un speransa asina, nos ta papia ku hopi frankesa,

¹³i nos no ta manera Moises, kende a tapa su kara ku velo, pa e yunan di Israel no keda wak e fin di e gloria ku tabata disparse.

¹⁴Ma nan mente a wordu enduresi; pasobra te dia dj awe, ora nan ta lesa Testament Bieu, e mesun velo ta keda sin wordu kita, pasobra ta den Cristo e ta wordu kita.

¹⁵Ma te dia djawe, ki ora ku Moises wordu lesa, tin un velo riba nan kurason,

¹⁶ma ki ora ku un hende komberti na Senor e velo ta wordu kita.

¹⁷Awor Senor ta e Spiritu; i kaminda e Spiritu di Senor ta, ei tin libertat.

¹⁸Ma nos tur, ku kara sin velo, mirando manera den un spil e gloria di Senor, ta wordu transforma den e mesun imagen di gloria pa gloria, manera dor di e Spiritu di Senor.