Read Papantla Totonac 2 Korintionan 4 Bible Online

2 Korintionan 4 - Papantla Totonac bible

2 Korintionan 4

¹Pesei, komo ku nos tin e ministerio aki, segun e miserikordia ku nos a risibi, nos no ta perde animo,

²ma nos a renunsia e kosnan skondi pa motibu di berguensa i no ta kana ku astusia ni ta uza e palabra di Dios ku engano, ma pa medio di e manifestashon di berdat nos ta rekomenda nos mes na e konsenshi di tur hende den bista di Dios.

³I asta si nos evangelio ta tapa ku velo, e ta tapa pa esnan ku ta bai perdi,

⁴den kende nan kaso e dios di e mundu aki a siega mente di esnan ku no ta kere, pa nan no mira e lus di e evangelio di e gloria di Cristo, Kende ta e imagen di Dios.

⁵Pasobra nos no ta predika nos mes, ma Cristo Jesus komo Senor, i nos mes komo boso sirbidonan pa motibu di Jesus.

⁶Pasobra Dios, Kende a bisa: "Lus lo resplandese for di skuridat," ta Esun ku a resplandese den nos kurason pa duna e lus di e konosementu di e gloria di Dios den kara di Cristo.

⁷Ma nos tin e tesoro aki den pochi di klei, pa e ekselensia di e poder por ta di Dios i no di nos mes;

⁸nos ta wordu primi di tur banda, ma nos no ta keda plecha; nos no ta mira salida, ma no ta desespera;

⁹nos ta wordu persigui, ma no ta keda desampara; nos ta wordu tumba abou, ma no destrui;

¹⁰hibando semper den nos kurpa e morto di Jesus, pa e bida di Jesus tambe por wordu manifesta den nos kurpa.

¹¹Pasobra nos ku ta biba ta wordu entrega konstantemente na morto pa motibu di Jesus, pa e bida di Jesus tambe por wordu manifesta den nos karni mortal.

¹²Asina morto ta obra den nos, ma bida den boso.

¹³Ma teniendo e mesun spiritu di fe, segun loke ta para skirbi: "Mi a kere, pesei mi a papia," nos tambe ta kere, pesei nos tambe ta papia,

¹⁴sabiendo ku Esun ku a lanta Senor Jesus lo lanta nos tambe huntu ku Jesus, i lo presenta nos huntu ku boso.

¹⁵Pasobra tur kos ta pa boso kousa, pa e grasia ku ta alkansa mas i mas hende por hasi ku e dunamentu di gradisimentu ta abunda pa e gloria di Dios.

¹⁶Pesei nos no ta perde animo, ma maske nos hende eksterior ta degenera, tog nos hende interior ta wordu renoba dia pa dia.

¹⁷Pasobra nos aflikshon leve, ku ta pa un momento so, ta obra pa nos un peso di gloria muchu mas grandi i eterno,

¹⁸mientras ku nos no ta wak e kosnan ku ta wordu mira, ma e kosnan ku no ta wordu mira. Pasobra e kosnan ku ta wordu mira ta temporal, ma e kosnan ku no ta wordu mira ta eterno.