Read Papantla Totonac 2 Korintionan 5 Bible Online

2 Korintionan 5 - Papantla Totonac bible

2 Korintionan 5

¹Pasobra nos sa ku si e tent terenal, ku ta nos kas, wordu basha abou, nos tin un edifisio di Dios, un kas no traha ku man, eterno den e shelunan.

²Pasobra di berdat nos ta suspira den e kas aki, anhelando pa wordu bisti ku nos habitashon for di shelu,

³asina ku, dor di bistie, nos lo no wordu hana sunu.

⁴Pasobra di berdat, mientras ku nos ta den e tent aki, nos ta suspira, siendo karga, pasobra nos no kier ta sin pana bisti, ma nos kier ta bisti, pa asina loke ta mortal por wordu traga dor di bida.

⁵Awor Esun ku a prepara nos pa e proposito aki ta Dios, Kende a duna nos e Spiritu komo garantia.

⁶Pesei, siendo semper yen di bon animo, i sabiendo ku mientras nos ta na kas den e kurpa nos ta ousente di Senor--

⁷pasobra nos ta kana pa medio di fe, no pa medio di bista--

⁸nos ta yen di bon animo, mi ta bisa, i ta prefera mas bien di ta ousente di e kurpa i na kas serka Senor.

⁹Pesei nos ta hasi esaki nos meta, sea na kas of ousente, pa ta agradabel na djé.

¹⁰Pasobra nos tur mester parese dilanti di e tribunal di Cristo, pa kada un wordu rekompensa pa su echonan den e kurpa, segun loke el a hasi, sea bon of malu.

¹¹Pesei, konosiendo e temor di Senor, nos ta konvense hende, ma nos motibunan ta bon kla pa Dios; i mi ta spera ku nos motibunan ta bon kla tambe pa boso konsenshi.

¹²Nos no ta rekomenda nos mes atrobe na boso, ma ta duna boso un oportunidat pa ta orguyoso di nos, pa boso por tin un kontesta pa esnan ku ta gaba den aparensia i no den kurason.

¹³Pasobra si nos ta loko, ta pa Dios nos ta loko, i si nos ta di sano huisio, ta pa boso nos ta di sano huisio.

¹⁴Pasobra e amor di Cristo ta obliga nos, yegando na e konklushon aki, ku un a muri pa tur, pesei tur a muri;

¹⁵i El a muri pa tur, pa esnan ku ta biba no biba mas pa nan mes, ma pa Esun ku a muri i ku a resusita pa nan motibu.

¹⁶Pesei, for di awor nos no ta rekonose ningun hende segun karni; maske nos tabata konose Cristo segun karni, awor si nos no konos'E asina mas.

¹⁷Pesei, si un hende ta den Cristo, ta un kriatura nobo e ta; e kosnan bieu a pasa kaba; ata, tur kos a bira nobo.

¹⁸Awor tur e kosnan aki ta bin di Dios, Kende a rekonsilia nos ku Su mes dor di Cristo, i a duna nos e ministerio di rekonsiliashon,

¹⁹esta, ku Dios den Cristo tabata rekonsiliando e mundu ku Su mes, sin tuma nan pikanan na kuenta, i El a enkarga nos ku e palabra di rekonsiliashon.

²⁰Pesei nos ta embahadornan pa Cristo, komo si fuera Dios tabata spierta dor di nos; nos ta roga boso den e nomber di Cristo, sea rekonsilia ku Dios.

²¹El a hasi Esun, Kende no tabata konose pika, bira pika pa nos, pa nos por bira e hustisia di Dios den djé.