Read Papantla Totonac 2 Korintionan 6 Bible Online

2 Korintionan 6 - Papantla Totonac bible

2 Korintionan 6

¹I trahando huntu kuné nos tambe ta roga boso pa no risibi e grasia di Dios en bano--

²pasobra E ta bisa: "Den e tempu aseptabel Mi a skuchabo, i riba e dia di salbashon Mi a yudabo"; mira, awor ta "e tempu aseptabel," mira, awor ta "e dia di salbashon."

³Nos no ta duna motibu di ofensa den nada, pa e ministerio no wordu desakredita,

⁴ma den tur kos nos ta rekomenda nos mes komo sirbidonan di Dios, den hopi perseveransia, den aflikshon, den fatiga, den angustia,

⁵den sota, den prizon, den lantamentunan di pueblo, den trabou duru, den perdementu di sono, den hamber,

⁶den puresa, den konosementu, den pasenshi, den karino, den Spiritu Santu, den amor berdadero,

⁷den e palabra di berdat, den e poder di Dios; pa medio di e armanan di hustisia pa e man drechi i pa e man robes,

⁸pa medio di gloria i desonor, pa medio di mal fama i bon fama; komo ganadonan i tog berdadero;

⁹komo deskonosi i tog bon konosi, komo muriendo i tog, ata nos ta biba; komo kastiga i tog nos no a wordu mata,

¹⁰komo tristu i tog semper regosihando, komo pober i tog hasiendo hopi hende bira riku, komo teniendo nada i tog teniendo tur kos.

¹¹Nos boka a papia frankamente ku boso, O korintionan, nos kurason ta hanchu habri.

¹²Boso no ta wordu limita dor di nos, ma boso ta wordu limita dor di boso mes sintimentunan.

¹³Awor di e mesun manera--mi ta papia manera ku mucha--habri boso kurason hanchu pa nos tambe.

¹⁴No uni boso mes den yugo desigual ku inkredulonan, pasobra ki kompanerismo hustisia tin ku inhustisia, i ki komunion lus tin ku skuridat?

¹⁵Of ki harmonia Cristo tin ku Belial, of kiko un kreyente tin komun ku un inkredulo?

¹⁶Of ki kombenio e tempel di Dios tin ku idolo? Pasobra nos ta e tempel di e Dios bibu, manera Dios a bisa: "Lo mi biba den nan i kana meimei di nan; I lo Mi ta nan Dios, i nan lo ta Mi pueblo."

¹⁷"Pesei, sali for di meimei di nan i separa boso mes, SENOR ta bisa. I no mishi ku loke ta impuru; i lo Mi risibi boso."

¹⁸"I lo Mi ta un Tata pa boso, i boso lo ta yu hombernan i yu muhenan pa Mi, e SENOR Todopoderoso ta bisa."