Read Papantla Totonac 2 Korintionan 7 Bible Online

2 Korintionan 7 - Papantla Totonac bible

2 Korintionan 7

¹Pesei, komo ku awor nos tin e promesanan aki, stimanan, laga nos purifika nos mes di tur impuresa di karni i spiritu, i asina perfekshona nos santidat den e temor di Dios.

²Traha luga pa nos den boso kurason; nos no a hasi dano na ningun hende, nos no a korumpi ningun hende, nos no a probecha di ningun hende.

³Mi no ta papia pa kondena boso; pasobra mi a bisa kaba ku boso ta den nos kurason, pa nos muri huntu i pa biba huntu.

⁴Grandi ta mi konfiansa den boso, grandi ta mi gabamentu tokante di boso; mi ta yen di konsuelo. Mi ta rebosa di goso den tur nos aflikshonnan.

⁵Pasobra ora nos a yega Masedonia nos karni no tabatin sosiegu, ma nos tabata wordu afligi di tur banda: di pafo konflikto, di paden temor.

⁶Ma Dios, Kende ta konsola esnan abati, a konsola nos ku e binida di Tito;

⁷i no solamente ku su binida, ma tambe ku e konsuelo ku kual el a wordu konsola serka boso, ora ku el a konta nos di boso anhelo, boso tristesa, boso zelo pa mi, asina ku mi a regosiha mas ainda.

⁸Pasobra maske mi karta a hasi boso tristu, esei no ta duel mi; maske ku a duel mi si--pasobra mi ta mira ku e karta ei a hasi boso tristu, ounke solamente pa un tempu--

⁹awor mi ta regosiha, no ku boso a bira tristu, ma ku boso a bira tristu te na e punto di repentimentu; pasobra boso a bira tristu segun e boluntat di Dios, pa boso no sufri ningun pierde pa nos motibu.

¹⁰Pasobra e tristesa ku ta segun e boluntat di Dios ta produsi un repentimentu ku ta hiba na salbashon, i kual no ta duel hende nunka; ma e tristesa di mundu ta produsi morto.

¹¹Pasobra mira ki seriedat e kos aki, e tristesa aki segun Dios, a produsi den boso: ki vindikashon di boso mes, ki indignashon, ki temor, ki anhelo, ki zelo, ki disiplina kontra maldat! Den tur kos boso a demostra di ta inosente den e asunto.

¹²Asina ku maske mi a skirbi boso, no tabata pa kousa di esun ku a ofende, ni pa kousa di esun ku a wordu ofendi, ma pa boso seriedat pa ku nos por wordu hasi konosi na boso den bista di Dios.

¹³Pa e motibu aki nos a wordu konsola. I ademas di nos konsuelo, nos a regosiha ainda muchu mas pa e goso di Tito, pasobra su spiritu a wordu refreska dor di boso tur.

¹⁴Pasobra si den kualkier kos mi a gaba boso serka dje, mi no a wordu brongosa; ma meskos ku nos a papia tur kos ku boso den berdat, asina tambe nos gabamentu ku Tito a resulta di ta berdat.

¹⁵I su karino ta abunda mas ainda pa ku boso, ora ku e korda e obedensia di boso tur, kon boso a risibie ku temor i temblamentu.

¹⁶Mi ta regosiha ku den tur kos mi tin konfiansa den boso.