Read Papantla Totonac 2 Korintionan 8 Bible Online

2 Korintionan 8 - Papantla Totonac bible

2 Korintionan 8

¹Awor, rumannan, nos kier laga boso sa di e grasia di Dios ku a wordu duna den e iglesianan di Masedonia,

²ku den hopi prueba di aflikshon nan abundansia di goso i nan pobresa grandi a rebosa den e rikesa di nan generosidat.

³Pasobra mi ta duna testimonio ku segun nan tabata por, i mas ku nan tabata por, nan a duna boluntariamente,

⁴rogando nos ku masha suplika pa e privilegio di por partisipa den e manteneshon di e santunan,

⁵i esaki, no manera nos a spera, ma prome nan a duna nan mes na Senor i na nos, segun e boluntat di Dios.

⁶Pesei nos a roga Tito ku, meskos ku antes el a hasi un kuminsamentu, asina tambe e kompleta den boso e obra di grasia aki.

⁷Ma meskos ku boso ta abunda den tur kos, den fe i palabra i konosementu i den tur seriedat i den boso amor pa nos, mira pa boso abunda den e obra di grasia aki tambe.

⁸Mi no ta papia esaki komo un mandato, ma pa proba, dor di e seriedat di otronan, e sinseridat di boso amor tambe.

⁹Pasobra boso konose e grasia di nos Senor Jesu-Cristo, ku ounke E tabata riku, sinembargo pa boso motibu El a bira pober, pa boso dor di Su pobresa por a bira riku.

¹⁰I mi ta duna mi opinion den e asunto aki, pasobra esaki ta pa boso bentaha, kendenan tabata e promenan ku a kuminsa un ana pasa, no solamente pa hasi esaki, ma tambe pa desea di hasie.

¹¹Ma awor, kaba di hasie tambe, pa meskos ku boso tabata asina boluntario pa hasie, asina tambe e por wordu kumpli dor di e medionan ku boso tin.

¹²Pasobra si e boluntat t'ei, e ta aseptabel segun loke un hende tin, no segun loke e no tin.

¹³Pasobra esaki no ta pa fasilidat di otronan i pa boso aflikshon, ma pa tin igualdat--

¹⁴den e tempu presente aki boso abundansia ta un provishon den nan nesesidat, pa nan abundansia tambe por bira un provishon den boso nesesidat, pa por tin igualdat;

¹⁵manera ta para skirbi: "Esun ku a rekohe hopi no tabatin di mas, i esun ku a rekohe poko no tabata falta nada."

¹⁶Ma grasia sea na Dios, Kende ta pone e mesun preokupashon pa boso den kurason di Tito.

¹⁷Pasobra no solamente el a asepta nos petishon, ma komo ku e mes ta masha dedika, el a bai serka boso di su mes boluntat.

¹⁸I nos a manda huntu kune e ruman, kende su fama den e asuntonan di evangelio a plama den tur e iglesianan;

¹⁹i no solamente esaki, ma el a wordu skohi tambe dor di e iglesianan pa biaha huntu ku nos den e obra di grasia aki, kual ta wordu atministra dor di nos pa e gloria di Senor mes, i pa mustra nos boluntat,

²⁰tumando prekoushon pa ni un hende no desakredita nos den nos atministrashon di e ofrenda generoso aki;

²¹pasobra nos ta perkura pa hasi loke ta onorabel, no solamente den bista di Senor, ma tambe den bista di hende.

²²I nos a manda huntu ku nan nos ruman, kende nos a komproba hopi biaha i a han'e diligente den hopi kos, ma awor mas diligente ainda, pa motibu di su konfiansa grandi den boso.

²³Pa loke ta Tito, e ta mi kompanero i kolaborador meimei di boso; pa loke ta nos rumannan, nan ta mensaheronan di e iglesianan, un gloria pa Cristo.

²⁴Pesei publikamente, dilanti di e iglesianan, mustra nan e prueba di boso amor i di nos motibu pa gaba boso.