Read Papantla Totonac 2 Korintionan 9 Bible Online

2 Korintionan 9 - Papantla Totonac bible

2 Korintionan 9

¹Pasobra ta inesesario pa mi skirbi boso tokante di e ministerio aki pa e santunan;

²pasobra mi sa ku boso ta di bon boluntat, pa kual motibu mi ta gaba boso serka e masedonionan, esta, ku Akaya tabata prepara for di ana pasa, i boso zelo a anima mayoria di nan.

³Ma mi a manda e rumannan, pa nos gabamentu di boso den e kaso aki no ta en bano, pa, manera mi tabata bisa, boso por ta prepara,

⁴pa no sosode ku si algun masedonio bin ku mi i no hana boso prepara, nos--pa mi no bisa: boso tambe--wordu brongosa pa e konfiansa aki.

⁵Pesei mi a hana nesesario pa enkurasha e rumannan pa bai serka boso prome ku ami bai i prepara di antemano boso ofrenda generoso ku boso a priminti, pa esaki por ta prepara komo un ofrenda generoso, i no duna ku avarisia.

⁶Awor esaki mi ta bisa; esun ku sembra skars lo kosecha skars tambe; i esun ku sembra generosamente lo kosecha generosamente tambe.

⁷Laga kada un hasi manera el a propone den su kurason; no kontra su gustu of obliga; pasobra Dios ta stima esun ku ta duna ku alegria.

⁸I Dios ta poderoso pa hasi tur grasia abunda pa boso, asina ku teniendo semper sufisiente di tur kos, boso por tin abundansia pa tur bon obra;

⁹manera ta para skirbi: "Tur kaminda el a parti, el a duna e pobernan, Su hustisia ta permanese pa semper."

¹⁰Awor Esun ku ta provee simia pa e sembrado i pan pa kuminda lo provee i multiplika boso simia pa sembra, i lo oumenta e kosecha di boso hustisia;

¹¹boso lo wordu enrikesi den tur kos pa ta generoso na tur okashon, lokual pa medio di nos ta produsiendo gradisimentu na Dios.

¹²Pasobra e ministerio di e sirbishi aki no solamente ta provee kompletamente pa e nesesidatnan di e santunan, ma ta abunda tambe dor di hopi gradisimentu na Dios.

¹³Pa motibu di e prueba duna dor di e ministerio aki nan lo glorifika Dios pa e obedensia di boso konfeshon di e evangelio di Cristo, i pa e generosidat di boso kontribushon na nan i na tur,

¹⁴mientras ku, den nan orashon pa boso, nan kurason ta anhela na boso pa motibu di e grasia sobreabundante di Dios den boso.

¹⁵Grasia sea na Dios pa Su don ineksplikabel!