Read Papantla Totonac Galatanan 1 Bible Online

Galatanan 1 - Papantla Totonac bible

Galatanan 1

¹Pablo, un apostel (no manda for di hende, ni dor di hende, ma dor di Jesu-Cristo, i Dios Tata, Kende a lant'E for di e mortonan),

²i tur e rumannan ku ta huntu ku mi, Na e iglesianan di Galasia:

³Grasia sea ku boso i pas di Dios nos Tata, i di Senor Jesu-Cristo,

⁴Kende a duna Su mes pa nos pikanan, pa E por a libra nos di e siglo malu djawor aki, konforme e boluntat di nos Dios i Tata,

⁵na Kende sea gloria pa semper i semper. Amen.

⁶Mi ta keda asombra ku asina lihe boso a bandona Esun ku a yama boso pa e grasia di Cristo, pa un evangelio diferente,

⁷ku realmente no ta un otro; solamente tin algun hende ku ta hasi boso bira intrankil i ku kier trose e evangelio di Cristo.

⁸Ma maske nos, of un angel for di shelu, lo a predika na boso un evangelio kontrario na esun ku nos a predika na boso, ku e sea maldishona.

⁹Manera nos a bisa kaba, asina mi ta bolbe bisa awor: si kualkier hende predika na boso un evangelio kontrario na esun ku boso a risibi, ku e sea maldishona.

¹⁰Pasobra ta fabor di hende mi ta buska awor, of di Dios? Of ta hende mi ta trata di agrada? Si ainda ta hende mi tabata trata di agrada, lo mi no tabata un sirbido di Cristo.

¹¹Pasobra mi kier pa boso sa, rumannan, ku e evangelio ku mi a predika no ta segun hende.

¹²Pasobra mi no a risibie for di hende, ni ningun hende no a sinami esaki, ma mi a risibie pa medio di un revelashon di Jesu-Cristo.

¹³Pasobra boso a tende di mi manera di biba di antes den hudaismo, kon mi tabata persigui e iglesia di Dios sin miserikordia i tabata trata di destruie;

¹⁴i mi tabata mas avansa den hudaismo ku hopi di mi kontemporaneonan entre mi paisanonan, siendo muchu mas zeloso pa e tradishonnan di mi antepasadonan.

¹⁵Ma ora ku a agrada Dios, Kende a apartami for di den barika di mi mama i a yamami pa medio di Su grasia,

¹⁶pa revela Su Yu den mi, pa mi predik'E entre e paganonan, mi no a konsulta mesora ku karni i sanger,

¹⁷ni mi no a bai Jerusalem serka esnan ku tabata apostel prome ku mi, ma mi a bai Arabia, i a bolbe atrobe na Damasko.

¹⁸Anto tres ana despues mi a bai Jerusalem pa sera konosi ku Pedro, i a keda diesinku dia serka dje.

¹⁹Ma mi no a mira ni un di e otro apostelnan ku eksepshon di Santiago, ruman homber di Senor.

²⁰(Awor tokante di e kosnan ku mi ta skirbi boso, mi ta sigura boso dilanti di Dios ku mi no ta gana.)

²¹Despues mi a bai den e regionnan di Siria i Silisia.

²²I ainda e iglesianan di Judea ku tabata den Cristo no tabata konosemi personalmente;

²³solamente nan a sigui tende: "Esun ku un tempu tabata persigui nos, awor ta predika e fe ku un tempu e tabata trata di destrui."

²⁴I nan tabata glorifika Dios pa mi motibu.