Read Papantla Totonac Galatanan 2 Bible Online

Galatanan 2 - Papantla Totonac bible

Galatanan 2

¹Anto, despues di un periodo di dieskuater ana, mi a bolbe bai Jerusalem ku Barnabas, i a hiba Tito tambe huntu ku mi.

²I ta pa motibu di un revelashon mi a bai; i mi a komunika na nan e evangelio ku mi ta predika entre e paganonan, ma mi a hasi esaki den priva na esnan ku tabata hende di influensia, pa miedu ku lo mi tabata kore, of a kore, en bano.

³Ma ni Tito mes, kende tabata huntu ku mi, no a wordu obliga pa wordu sirkumsida, ounke ku e tabata un griego.

⁴Ma tabata pa kousa di e rumannan falsu ku a sluip drenta pa spiona nos libertat ku nos tin den Cristo Jesus, pa trese nos na sklabitut.

⁵Ma nos no a somete nos na nan ni pa un ora so, pa e berdat di evangelio por keda serka boso.

⁶Ma di esnan ku tabata di gran influensia (kiko nan tabata no ta hasi ningun diferensia pa mi; Dios no ta hasi distinshon di persona)--pasobra esnan di influensia no a kontribui nada na mi.

⁷Ma alkontrario, mirando ku mi a wordu konfia ku e evangelio na esnan insirkumsida, meskos ku Pedro a wordu konfia ku e evangelio na esnan sirkumsida,

⁸(pasobra Esun ku a traha efektivamente pa Pedro den su apostolado pa esnan sirkumsida, a traha efektivamente pa mi tambe pa e paganonan),

⁹i ora Santiago, Sefas i Juan, kendenan a wordu konsidera di ta pilaman, a rekonose e grasia ku a wordu duna na mi, nan a duna ami i Barnabas e man drechi di komunion, pa nos bai serka e paganonan i nan serka esnan sirkumsida.

¹⁰Solamente, nan a pidi nos pa korda riba e pobernan, presisamente loke mi tambe tabata ansioso pa hasi.

¹¹Ma ora Pedro a bin Antiokia mi a opon'e abiertamente, pasobra e tabata robes.

¹²Pasobra prome ku e binida di algun hende di parti di Santiago, e tabatin kustumber di kome ku e paganonan; ma ora nan a bin, el a kuminsa retira i distansia su mes, pa miedu di esnan ku tabata di sirkumsishon.

¹³I e restu di e hudiunan a uni nan mes kune den hipokresia, ku e resultado ku asta Barnabas a wordu desvia dor di nan hipokresia.

¹⁴Ma ora mi a mira ku nan no tabata franko tokante di e berdat di e evangelio, mi a bisa Pedro den presensia di tur hende: "Si abo, siendo hudiu, ta biba manera e paganonan i no manera e hudiunan, di kon bo ta obliga e paganonan biba manera hudiu?

¹⁵"Nos ta hudiu di nasementu, i no pekado for di entre e paganonan;

¹⁶sinembargo, sabiendo ku un hende no ta wordu hustifika pa medio di e obranan di Lei ma dor di fe den Cristo Jesus, nos tambe a kere den Cristo Jesus, pa nos por wordu hustifika pa medio di fe den Cristo, i no pa medio di e obranan di Lei; komo ku pa medio di e obranan di Lei ningun hende lo no wordu hustifika.

¹⁷"Ma si mientras ku nos ta buska pa wordu hustifika den Cristo, nos mes tambe a wordu hana di ta pekado, anto ta un sirbido di pika Cristo ta? Di ningun manera!

¹⁸Pasobra si mi bolbe traha loke mi a destrui, mi ta proba ku mi mes ta un transgresor.

¹⁹Pasobra dor di Lei mi a muri pa Lei, pa mi por biba pa Dios.

²⁰Mi a wordu krusifika ku Cristo; i no ta ami ta biba mas, ma Cristo ta biba den mi; i e bida ku mi ta biba awor den karni, mi ta biba pa medio di fe den e Yu di Dios, Kende a stimami, i a entrega Su mes pa mi.

²¹Mi no ta anula e grasia di Dios; pasobra si hustisia ta bin dor di Lei, e ora ei ta en bano Cristo a muri."