Read Papantla Totonac Galatanan 3 Bible Online

Galatanan 3 - Papantla Totonac bible

Galatanan 3

¹O galationan bobo! Ta ken a bruha boso kabes pa boso no obedese e berdat, boso, dilanti kende nan wowo Jesu-Cristo a wordu presenta klaramente komo krusifika?

²Esaki ta e uniko kos ku mi kier hana sa for di boso: ta pa medio di e obranan di Lei boso a risibi e Spiritu, of ta pa medio di tendementu ku fe?

³Ta asina bobo boso ta? Despues di a kuminsa den e Spiritu, boso ta bai kaba den karni awor?

⁴Ta en bano boso a sufri tantu kos asina--si di berdat tabata en bano?

⁵Akaso esun anto, kende ta duna boso e Spiritu i ta obra milagernan meimei di boso, ta hasi esaki pa medio di e obranan di Lei of pa medio di tendementu ku fe?

⁶Asina tambe Abraham "a kere Dios, i esaki a wordu konta komo hustisia p'e."

⁷Pesei, sea sigur ku ta esnan ku ta di fe ta yunan di Abraham.

⁸I Skritura, mirando di padilanti ku Dios lo hustifika e paganonan pa medio di fe, di antemano a predika e evangelio na Abraham, bisando: "Tur nashon lo ta bendishona den bo."

⁹Asina anto, esnan ku ta di fe ta bendishona huntu ku e kreyente Abraham.

¹⁰Pasobra tur esnan ku ta di e obranan di Lei ta bou di un maldishon; pasobra ta para skirbi: "Maldishona ta tur esnan ku no ta permanese den tur kos skirbi den e buki di Lei, pa kumpli ku nan."

¹¹Awor ku ni un hende no ta hustifika pa medio di Lei dilanti di Dios ta evidente; pasobra: "E hende hustu lo biba pa medio di fe."

¹²Sinembargo, Lei no ta pa fe; alkontrario: "Esun ku praktika nan lo biba pa medio di nan."

¹³Cristo a redimi nos di e maldishon di Lei, birando un maldishon pa nos--pasobra ta para skirbi: "Maldishona ta tur esnan ku ta kologa na un palu"--

¹⁴pa den Cristo Jesus e bendishon di Abraham por yega serka e paganonan, pa nos por risibi e promesa di e Spiritu dor di fe.

¹⁵Rumannan, mi ta papia den termino di relashonnan humano: ounke ta trata solamente di un aliansa di hende, tog ora ku el a wordu ratifika, ni un hende no ta pon'e un banda ni ta anadi kondishonnan na dje.

¹⁶Awor e promesanan a wordu hasi na Abraham i na su simia. E no ta bisa: "I na simianan," komo si fuera e ta referi na hopi, ma mas bien na un: "I na bo simia," esta, Cristo.

¹⁷Loke mi ta bisando ta esaki: e Lei, ku a bin kuater shent'i trinta ana despues, no ta hasi e aliansa ku a wordu ratifika pa Dios anteriormente perde su valides, pa asina anula e promesa.

¹⁸Pasobra si e erensia ta basa riba lei, e no ta basa mas riba un promesa; ma Dios a dun'e na Abraham pa medio di un promesa.

¹⁹Ta pakiko tin Lei anto? El a wordu anadi pa motibu di transgreshonnan, i a wordu ordena dor di angelnan pa medio di man di un mediador, te ora ku e simia lo a bin, na kende e promesa a wordu hasi.

²⁰Awor un mediador no ta pa un so; ma Dios ta un.

²¹Lei ta kontrario anto na e promesanan di Dios? Di ningun manera! Pasobra si a wordu duna un lei ku tabata por a duna bida, e ora ei di berdat hustisia lo a wordu basa riba lei.

²²Ma Skritura a sera tur hende bou di pika, pa e promesa pa medio di fe den Jesu-Cristo por a wordu duna na esnan ku ta kere.

²³Ma prome ku fe a bin nos tabata warda bou di guardia di lei, warda pa e fe ku lo a wordu revela despues.

²⁴Pesei Lei a bira nos tutor pa guia nos na Cristo, pa nos por wordu hustifika pa medio di fe.

²⁵Ma awor ku fe a bin, nos no ta bou di un tutor mas.

²⁶Pasobra boso tur ta yunan di Dios dor di fe den Cristo Jesus.

²⁷Pasobra boso tur, ku a wordu batisa den Cristo, a bisti boso mes ku Cristo.

²⁸Awor no tin ni hudiu ni griego, no tin ni esklabu ni hende liber, no tin ni homber ni muhe; pasobra boso tur ta un den Cristo Jesus.

²⁹I si boso ta pertenese na Cristo, e ora ei boso ta desendiente di Abraham, erederonan segun promesa.