Read Papantla Totonac Galatanan 4 Bible Online

Galatanan 4 - Papantla Totonac bible

Galatanan 4

¹Awor mi ta bisa, tanten ku e eredero ta un mucha, den nada e no ta diferente for di un esklabu, ounke ku e ta dono di tur kos,

²ma e ta bou di vogtnan i mayordomonan te na e fecha fiha pa e tata.

³Asina nos tambe, tempu nos tabata mucha, tabata wordu teni den sklabitut bou di e kosnan elemental di mundu.

⁴Ma ora ku e plenitut di e tempu a yega, Dios a manda Su Yu, nasi di un muhe, nasi bou di Lei,

⁵pa E por a redimi esnan ku tabata bou di Lei, pa nos por a risibi e adopshon komo yu.

⁶I pasobra boso ta yu, Dios a manda e Spiritu di Su Yu den nos kurason, sklamando: "Abba! Tata!"

⁷Asina bo no ta esklabu mas, sino yu; i si bo ta yu, e ora ei bo ta eredero tambe dor di Dios.

⁸Sinembargo na e tempu ei, tempu ku boso no tabata konose Dios, boso tabata esklabu di esnan ku pa naturalesa no ta dios.

⁹Ma awor ku boso a yega na konose Dios, of mas bien, ta konosi pa Dios, kon anto boso ta bolbe atrobe na e prinsipionan debil i miserabel, na kualnan boso kier bolbe esklabisa boso mes tur di nobo?

¹⁰Boso ta warda dianan i lunanan i temporadanan i ananan.

¹¹Mi ta teme pa boso, ku kisas mi a traha mata kurpa pa boso en bano.

¹²Mi ta roga boso, rumannan, bira manera ami, pasobra ami tambe a bira manera boso. Boso no a ofendemi den nada;

¹³ma boso sa ku tabata pa motibu di un enfermedat di kurpa ku mi a predika e evangelio na boso e prome biaha;

¹⁴i loke tabata un prueba pa boso pa motibu di e kondishon di mi kurpa, boso no a despresi'e ni tabatin asko di dje, ma boso a risibimi manera un angel di Dios, manera Cristo Jesus mes.

¹⁵Kiko a para anto di e bendishon ei ku un tempu boso tabatin? Pasobra mi ta duna testimonio di boso, ku si tabata posibel, boso lo a saka boso mes wowonan i dunami nan.

¹⁶Mi a bira boso enemigu anto dor di bisa boso e berdat?

¹⁷Nan ta buska boso ku afan, no pa nada bon, ma nan kier eksklui boso, pa boso buska nan.

¹⁸Ma ta bon pa semper wordu buska ku afan na un bon manera, i no solamente ora mi ta presente ku boso.

¹⁹Mi yunan, pa kualnan mi tin dolo di parto atrobe te ora ku Cristo wordu forma den boso--

²⁰kuantu lo mi a desea di ta presente serka boso awor i di kambia mi tono, pasobra mi tin duda den boso.

²¹Bisami, boso ku kier ta bou di lei, boso no ta skucha na lei?

²²Pasobra ta para skirbi ku Abraham tabatin dos yu homber, un ku e muhe esklabu i un ku e muhe liber.

²³Ma e yu homber di e muhe esklabu a nase segun karni, i e yu homber di e muhe liber dor di promesa.

²⁴Esaki ta bisa simbolikamente, pasobra e muhenan aki ta dos aliansa, un prosedente di Seru Sinai, ku ta hana yu pa sklabitut; esaki ta Hagar.

²⁵Awor e Hagar aki ta Seru Sinai na Arabia, i ta koresponde na e Jerusalem djawor, pasobra e ta den sklabitut ku su yunan.

²⁶Ma e Jerusalem djariba ta liber; e ta nos mama.

²⁷Pasobra ta para skirbi: "Regosiha, muhe steril ku no ta hana yu; dal gritu di hubilo, abo ku no ta den dolo di parto; pasobra mas hopi ta e yunan di esun desola ku di esun ku tin un esposo."

²⁸I boso, rumannan, meskos ku Isaak, ta yunan di promesa.

²⁹Ma meskos ku den e tempunan aya esun ku a nase segun karni a persigui esun ku a nase segun Spiritu, asina ta awor tambe.

³⁰Ma kiko Skritura ta bisa? "Tira e muhe esklabu i su yu afo, pasobra yu di e muhe esklabu lo no ta eredero huntu ku yu di e muhe liber."

³¹Asina anto, rumannan, nos no ta yu di un muhe esklabu, ma di e muhe liber.