Read Papantla Totonac Galatanan 5 Bible Online

Galatanan 5 - Papantla Totonac bible

Galatanan 5

¹Ta pa libertat Cristo a hasi nos liber; pesei, keda para firme i no sea someti atrobe na un yugo di sklabitut.

²Mira, ami, Pablo, ta bisa boso ku si boso risibi sirkumsishon, Cristo lo no ta di ningun benefisio pa boso.

³I mi ta bolbe duna testimonio na kada homber ku risibi sirkumsishon, ku e ta obliga pa warda henter e Lei.

⁴Boso a wordu separa for di Cristo, boso ku ta buska pa wordu hustifika pa medio di lei; boso a kai for di grasia.

⁵Pasobra nos, dor di Spiritu, pa medio di fe, ta wardando riba e speransa di hustisia.

⁶Pasobra den Cristo Jesus ni sirkumsishon ni insirkumsishon no ta nifika nada, ma fe ku ta obra dor di amor.

⁷Boso tabata kore bon; ken a stroba boso di obedese e berdat?

⁸E konvikshon aki no a bin di Esun ku ta yama boso.

⁹Un tiki zurdeg ta hasi henter e mansa bira zur.

¹⁰Mi tin konfiansa den boso den Senor, ku boso lo no tuma ningun otro forma di pensa; ma esun ku ta trastorna boso lo karga su kondenashon, ken ku e ta.

¹¹Ma ami, rumannan, si ainda mi ta predika sirkumsishon, pakiko mi ta wordu persigui ainda? E ora ei e piedra-di-trompeka di e krus a wordu aboli.

¹²Ohala ku esnan ku ta trastorna boso por a mutila nan mes.

¹³Pasobra boso a wordu yama pa libertat, rumannan; solamente, no uza boso libertat komo un oportunidat pa e karni, ma laga un sirbi otro pa medio di amor.

¹⁴Pasobra henter e Lei ta keda kumpli den un solo palabra, esta: "Stima bo prohimo manera bo mes."

¹⁵Ma si boso ta morde i ta devora otro, mira pa boso no wordu destrui un dor di otro.

¹⁶Ma mi ta bisa, kana segun e Spiritu, i boso lo no kumpli ku deseo di e karni.

¹⁷Pasobra e karni ta pone su deseo kontra e Spiritu, i e Spiritu kontra e karni; pasobra esakinan ta kontrario na otro, pa boso no hasi e kosnan ku boso kier.

¹⁸Ma si boso ta wordu guia pa e Spiritu, boso no ta bou di Lei.

¹⁹Awor e obranan di karni ta evidente, kualnan ta: inmoralidat, impuresa, sensualidat,

²⁰idolatria, bruheria, hostilidat, bringamentu, yalursheit, rabiamentu, pleitamentu, desakuerdo, doktrina falsu,

²¹envidia, buracheria, parandiamentu, i kosnan asin'aki, di kualnan mi ta spierta boso di antemano, meskos ku mi a spierta boso kaba di antemano, ku esnan ku praktika sorto di kosnan asina lo no ereda e reino di Dios.

²²Ma fruta di e Spiritu ta amor, goso, pas, pasenshi, karino, bondat, fieldat,

²³mansedumbre, dominio propio; kontra kosnan asina no tin lei.

²⁴Awor esnan ku ta pertenese na Cristo Jesus a krusifika e karni ku su pashonnan i deseonan.

²⁵Si nos ta biba segun e Spiritu, laga nos kana tambe segun e Spiritu.

²⁶No laga nos bira hende gabado, probokando otro, kudishando otro.