Read Papantla Totonac Efesionan 1 Bible Online

Efesionan 1 - Papantla Totonac bible

Efesionan 1

¹Pablo, un apostel di Cristo Jesus pa e boluntat di Dios, Na e santunan ku ta na Efeso i kendenan ta fiel den Cristo Jesus:

²Grasia sea ku boso i pas di Dios nos Tata i di Senor Jesu-Cristo.

³Bendishona sea e Dios i Tata di nos Senor Jesu-Cristo, Kende a bendishona nos ku tur bendishon spiritual den e luganan selestial den Cristo,

⁴meskos ku El a skohe nos den djé prome ku fundashon di mundu, pa nos por ta santu i sin kulpa dilanti di djé.

⁵Den amor El a predestina nos pa wordu adopta komo Su yunan pa medio di Jesu-Cristo, segun e bon intenshon di Su boluntat,

⁶pa e alabansa di e gloria di Su grasia, ku El a duna nos na abundansia den Esun stima.

⁷Den djé nos tin redenshon pa medio di Su sanger, e pordon di nos pikanan, segun e rikesa di Su grasia,

⁸ku El a drama na abundansia riba nos. Den tur sabiduria i prudensia

⁹El a hasi konosi na nos e misterio di Su boluntat, segun Su bon intenshon ku El a propone den Su mes,

¹⁰pa, komo preparashon di e kumplimentu di e tempunan, E reuni huntu tur kos den Cristo, tantu loke ta den e shelunan komo loke ta riba tera. Den djé

¹¹tambe nos a optene un erensia, siendo predestina konforme e proposito di Esun ku ta obra tur kos segun e konseho di Su boluntat,

¹²pa nos ku a konfia den Cristo prome por ta pa e alabansa di Su gloria.

¹³Den djé boso a konfia tambe, despues di a tende e mensahe di berdat, e evangelio di boso salbashon; den Kende tambe, despues di a kere, boso a wordu seya ku e Spiritu Santu di promesa,

¹⁴Kende ta e garantia di nos erensia, te na e redenshon di e poseshon di Dios, pa e alabansa di Su gloria.

¹⁵Pa e motibu aki ami tambe, despues di a tende di e fe den Senor Jesus ku tin meimei di boso, i boso amor pa tur e santunan,

¹⁶no ta stop di duna gradisimentu pa boso, kordando boso den mi orashonnan;

¹⁷pa e Dios di nos Senor Jesu-Cristo, e Tata di gloria, por duna boso un spiritu di sabiduria i di revelashon den e konosementu di djé.

¹⁸Pa e wowonan di boso kurason wordu ilumina, pa asina boso por sa kual ta e speransa di Su yamada, kiko ta e rikesa di e gloria di Su erensia den e santunan,

¹⁹i kual ta e grandesa sobresaliente di Su poder pa ku nos ku ta kere, segun e obramentu di e forsa di Su poder

²⁰ku El a eherse den Cristo, ora ku El a lant'E for di e mortonan, i a hasié sinta na Su man drechi den e luganan selestial,

²¹muchu mas haltu ku tur gobierno i outoridat i poder i dominio, i tur nomber ku ta wordu menta, no solamente den e siglo aki, ma tambe den esun ku ta bin.

²²I El a somete tur kos bou di Su pianan, i a duna E komo kabes riba tur kos na e iglesia,

²³kual ta Su kurpa, e plenitut di Esun ku ta yena tur den tur.