Read Papantla Totonac Efesionan 2 Bible Online

Efesionan 2 - Papantla Totonac bible

Efesionan 2

¹I boso tabata morto den boso delitonan i pikanan,

²den kualnan boso tabata kana antes segun e kurso di e mundu aki, segun e prens di e poder di laira, di e spiritu ku ta obra awor den e yunan di desobedensia.

³Nos tur tambe tabata biba antes meimei di nan, den e pashonnan di nos karni, kumpliendo ku e deseonan di karni i di mente, i tabata di naturalesa yunan di furia, meskos ku e otronan.

⁴Ma Dios, siendo riku den miserikordia, pa motibu di Su gran amor ku kual El a stima nos,

⁵asta tempu ku nos tabata morto den nos transgreshonnan, a hasi nos bibu huntu ku Cristo (pa medio di grasia boso a wordu salba),

⁶i a lanta nos huntu kuné, i a hasi nos sinta huntu kuné den e luganan selestial, den Cristo Jesus,

⁷pa den e siglonan ku ta bin E por a mustra e rikesa sobresaliente di Su grasia den Su karino pa ku nos den Cristo Jesus.

⁸Pasobra pa medio di grasia boso a wordu salba dor di fe, i esei no di boso mes; e ta e don di Dios;

⁹no komo resultado di obranan, pa ni un hende no gaba.

¹⁰Pasobra nos ta e obra di Su man, krea den Cristo Jesus pa bon obranan, kualnan Dios a prepara di antemano, pa nos kana den nan.

¹¹Pesei, korda ku antes boso, e paganonan den karni, kendenan ta wordu yama "Insirkumsishon" dor di esnan yama "Sirkumsishon", lokual ta wordu hasi den karni dor di man di hende--

¹²korda ku den e tempu ei boso tabata separa di Cristo, eksklui for di e siudadania di Israel i stranhero pa ku e aliansanan di promesa, sin speransa i sin Dios den mundu.

¹³Ma awor den Cristo Jesus boso, kendenan antes tabata leu, a wordu tresi serka pa medio di e sanger di Cristo.

¹⁴Pasobra E mes ta nos pas, Kende a hasi tur dos grupo bira un, i a tumba e muraya meimei ku ta separa,

¹⁵dor di aboli den Su karni e enemistat, kual ta e Lei di mandamentunan konteni den e ordenansanan, pa den Su mes E hasi e dosnan bira un hende nobo, asina stablesiendo pas,

¹⁶i pa rekonsilia nan dos den un solo kurpa ku Dios dor di e krus, matando e enemistat pa medio di dje.

¹⁷I El a bin predika pas na boso ku tabata leu, i pas na esnan ku tabata serka;

¹⁸pasobra pa medio di djé nos tur dos tin nos entrada den un Spiritu serka e Tata.

¹⁹Asina anto, boso no ta stranhero ni hende deskonosi mas, ma boso ta konsiudadano huntu ku e santunan, i boso ta di e hendenan di e kas di Dios,

²⁰ku a wordu traha riba e fundeshi di e apostelnan i e profetanan, di kual Cristo Jesus mes ta e piedra-di-skina prinsipal,

²¹den Kende henter e edifisio, siendo bon hinka den otro, ta krese pa bira un tempel santu den Senor;

²²den Kende boso tambe ta wordu traha konhuntamente pa ta un luga-di-biba pa Dios den Spiritu.