Read Papantla Totonac Efesionan 3 Bible Online

Efesionan 3 - Papantla Totonac bible

Efesionan 3

¹Pa e motibu aki ami, Pablo, prizonero di Cristo Jesus pa motibu di boso, paganonan--

²si di berdat boso a tende di e mayordomia di e grasia di Dios ku a wordu duna na mi pa boso,

³kon pa medio di revelashon e misterio a wordu hasi konosi na mi (manera mi a skirbi en breve kaba,

⁴pa medio di kual, ora boso ta lesa esaki, boso por komprende mi konosementu di e misterio di Cristo),

⁵kual den otro generashonnan no a wordu hasi konosi na e yunan di hende, manera el a wordu revela awor na Su apostelnan i profetanan santu den Spiritu:

⁶ku e paganonan ta ko-erederonan i miembronan di e mesun kurpa, i ko-partisipantenan di e promesa den Cristo Jesus pa medio di e evangelio,

⁷di kual mi a wordu hasi un sirbido, segun e don di e grasia di Dios, ku a wordu duna na mi segun e obramentu di Su poder.

⁸Na ami, esun di mas menos entre tur e santunan, e grasia aki a wordu duna, pa predika na e paganonan e rikesa insondabel di Cristo,

⁹i pa trese na klaridat kiko ta e atministrashon di e misterio ku pa siglonan tabata skondi den Dios, Kende a krea tur kos;

¹⁰pa e sabiduria multiforme di Dios awor por bira konosi pa medio di e iglesia na e gobernantenan i outoridatnan den e luganan selestial.

¹¹Esaki tabata di akuerdo ku e proposito eterno ku El a kumpli kune den Cristo Jesus nos Senor,

¹²den Kende nos tin frankesa i entrada ku tur konfiansa pa medio di fe den djé.

¹³Pesei mi ta pidi boso pa no perde animo pa kousa di mi tribulashonnan pa boso motibu, pasobra nan ta boso gloria.

¹⁴Pa e motibu aki mi ta dobla mi rudia dilanti di e Tata,

¹⁵di Kende henter e famia den shelu i riba tera ta hana su nomber,

¹⁶pa E konsede boso, konforme e rikesa di Su gloria, pa wordu fortalesi ku poder pa medio di Su Spiritu den e hende interior;

¹⁷pa asina Cristo por biba den boso kurason pa medio di fe; i pa boso, teniendo rais bon pega i funda den amor,

¹⁸por komprende, huntu ku tur e santunan, kual ta e hanchura i largura i haltura i profundidat,

¹⁹i pa konose e amor di Cristo ku ta surpasa konosementu, pa boso wordu yena ku tur e plenitut di Dios.

²⁰Awor na Esun ku ta poderoso pa hasi tur kos muchu mas abundantemente di loke nos ta pidi of pensa, segun e poder ku ta obra den nos,

²¹na djé sea gloria den e iglesia i den Cristo Jesus den tur generashon pa semper i semper. Amen.