Read Papantla Totonac Efesionan 4 Bible Online

Efesionan 4 - Papantla Totonac bible

Efesionan 4

¹Pesei, ami, prizonero di Senor, ta roga boso pa kana na un manera digno di e yamada ku kual boso a wordu yama,

²ku tur umildat i suavidat, ku pasenshi, soportando un i otro den amor,

³siendo diligente pa preserva e unidat di e Spiritu den e vinkulo di pas.

⁴Tin un kurpa i un Spiritu, meskos ku boso tambe a wordu yama den un speransa di boso yamada;

⁵un Senor, un fe, un boutismo,

⁶un Dios i Tata di tur, Kende ta riba tur i dor di tur i den tur.

⁷Ma na kada un di nos grasia a wordu duna konforme e midi di e don di Cristo.

⁸Pesei ta wordu bisa: "Ora ku El a subi bai den haltura, El a hiba un ehersito di katibunan komo katibu, i El a duna donnan na hende."

⁹(Awor e ekspreshon aki: "El a subi," ta kiko esaki ta nifika, sino ku El a baha tambe den e partinan mas abou di tera?

¹⁰Esun ku a baha ta e Mesun tambe ku a subi bai muchu mas haltu ku tur e shelunan, pa E yena tur kos.)

¹¹I El a duna algun komo apostel, i algun komo profeta, i algun komo evangelista, i algun komo pastor i sinado,

¹²pa ekipa e santunan pa e trabou di sirbishi, pa edifika e kurpa di Cristo,

¹³te ora nos tur yega na e unidat di fe i di e konosementu di e Yu di Dios, na bira un homber madura, na e midi di e estatura di e plenitut di Cristo,

¹⁴pa nos no ta mucha mas, tira p'aki p'aya dor di olanan, i hiba dor di tur bientu di doktrina, dor di triki di hende, dor di astusia den trahamentu di plan enganoso;

¹⁵ma papiando e berdat den amor, nos tin di krese den tur aspekto den djé, Kende ta e kabes, esta, Cristo,

¹⁶for di Kende henter e kurpa, siendo bon hinka den otro i tern huntu pa medio di loke kada skarnir ta kontribui, konforme e obra efektivo di kada parti individual, ta kousa e kresementu di e kurpa pa edifikashon di su mes den amor.

¹⁷Esaki mi ta bisa anto i ta afirma huntu ku Senor, pa boso no kana mas meskos ku e paganonan tambe ta kana, den e banidat di nan mente,

¹⁸siendo tapa ku skuridat den nan komprendementu, eksklui di e bida di Dios pa motibu di e ignoransia ku ta den nan, pa motibu di e duresa di nan kurason;

¹⁹i nan, perdiendo tur heful, a entrega nan mes na sensualidat pa, ku golosidat, nan praktika tur klase di impuresa.

²⁰Ma no t'asina boso a sina konose Cristo,

²¹si di berdat boso a tend'E i a wordu sina den djé, meskos ku berdat ta den Jesus,

²²pa, enkuanto boso manera di biba di antes, boso pone un banda e hende bieu ku ta wordu korumpi konforme e pashonnan enganoso,

²³i pa boso wordu renoba den e spiritu di boso mente,

²⁴i pa boso bisti e hende nobo, ku a wordu krea segun Dios den hustisia i santidat berdadero.

²⁵Pesei, poniendo mentira un banda, kada un di boso papia berdat ku su prohimo, pasobra nos ta miembro di otro.

²⁶Rabia, ma no hasi pika; no laga solo baha riba boso rabia,

²⁷i no duna diabel oportunidat.

²⁸Laga esun ku ta horta, no horta mas; ma mas bien, lagu'e traha, hasiendo ku su mes mannan loke ta bon, pa e por tin algu pa komparti ku esun ku ta den nesesidat.

²⁹No laga ningun palabra danino sali for di boso boka, sino solamente palabra ku ta bon pa edifikashon, konforme e nesesidat di e momento, pa esaki por duna grasia na esnan ku ta tende.

³⁰I no hasi Spiritu Santu di Dios tristu, pa medio di Kende boso a wordu seya pa e dia di redenshon.

³¹Laga tur amargura, furia, rabia, griteria i kalumnia wordu kita for di boso, huntu ku tur malisia.

³²I sea karinoso ku otro, miserikordioso, pordonando otro, meskos ku Dios den Cristo tambe a pordona boso.