Read Papantla Totonac Efesionan 5 Bible Online

Efesionan 5 - Papantla Totonac bible

Efesionan 5

¹Pesei, sea imitadonan di Dios, manera yunan stima;

²i kana den amor, meskos ku Cristo tambe a stima boso, i a entrega Su mes pa nos, un ofrenda i un sakrifisio na Dios komo un holo dushi.

³Ma no laga inmoralidat of kualkier sorto di impuresa of golosidat ni wordu menta mes meimei di boso, manera ta pas pa santunan,

⁴ni sushedat, ni papiamentu di ko'i loko, ni chansanan bulgar, ku no ta pas, ma mas bien duna gradisimentu.

⁵Pasobra esaki boso sa ku siguridat, ku ningun fornikado, persona impuru of hende kudisioso, ku ta un adorado di dios falsu, no tin erensia den e reino di Cristo i Dios.

⁶No laga ni un hende gana boso ku palabra bano, pasobra ta pa motibu di e kosnan aki e furia di Dios ta bin riba e yunan di desobedensia.

⁷Pesei, no sea partisipante huntu ku nan.

⁸Pasobra antes boso tabata skuridat, ma awor boso ta lus den Senor; kana komo yunan di lus

⁹(pasobra e fruta di e lus ta konsisti di tur bondat i hustisia i berdat),

¹⁰tratando di sina loke ta agradabel na Senor.

¹¹I no partisipa den e obranan infruktifero di skuridat, sino mas bien ekspone nan;

¹²pasobra ta berguensa asta pa papia di e kosnan ku nan ta hasi na sekreto.

¹³Ma tur kos ta bira visibel ora nan wordu eksponi dor di lus, pasobra tur kos ku bira visibel ta lus.

¹⁴Pa e motibu aki ta wordu bisa: "Spierta, abo ku ta drumi, i lanta for di e mortonan, i Cristo lo lusa riba bo."

¹⁵Pesei, mira bon kon boso ta kana, no manera hende bobo, ma manera hende sabi,

¹⁶hasiendo bon uzo di boso tempu, pasobra e dianan ta malu.

¹⁷Pesei anto, no sea bobo, ma komprende kiko ta e boluntat di Senor.

¹⁸I no bebe bina bira burachi, pasobra esei ta libertinahe, ma sea yena ku e Spiritu,

¹⁹papiando ku otro den salmo i himno i kantika spiritual, kantando i hasiendo melodia na Senor den boso kurason,

²⁰semper dunando gradisimentu na Dios Tata pa tur kos den e nomber di nos Senor Jesu-Cristo;

²¹i sea sumiso na otro den e temor di Cristo.

²²Esposanan, sea sumiso na boso mes esposo, manera na Senor.

²³Pasobra e esposo ta kabes di e esposa, meskos ku Cristo tambe ta kabes di e iglesia, E mes siendo Salbador di e kurpa.

²⁴Ma meskos ku e iglesia ta sumiso na Cristo, asina tambe e esposanan mester ta sumiso na nan esposo den tur kos.

²⁵Esposonan, stima boso esposa, meskos ku Cristo tambe a stima e iglesia i a entrega Su mes p'e,

²⁶pa E santifik'e despues di a purifik'e pa medio di e labamentu di awa ku e palabra,

²⁷pa E presenta na Su mes e iglesia den tur su gloria, sin mancha ni ploi ni nada paresido, ma pa e por ta santu i sin kulpa.

²⁸Asina esposonan tambe mester stima nan esposa manera nan mes kurpa. Esun ku ta stima su esposa ta stima su mes;

²⁹pasobra nunka ni un hende no a odia su mes karni, ma ta aliment'e i ta kuid'e, meskos ku Cristo tambe ta hasi ku e iglesia,

³⁰pasobra nos ta miembronan di Su kurpa, di Su karni i di Su wesunan.

³¹Pesei un homber lo bandona su tata i su mama, i lo uni ku su esposa; i nan lo bira un karni.

³²E misterio aki ta grandi, ma mi ta papia tokante di Cristo i e iglesia.

³³Asina anto, laga kada un di boso tambe stima su esposa manera su mes; i e esposa perkura pa e respeta su esposo.