Read Papantla Totonac Filipensenan 1 Bible Online

Filipensenan 1 - Papantla Totonac bible

Filipensenan 1

¹Pablo i Timoteo, sirbidonan di Cristo Jesus, Na tur e santunan den Cristo Jesus ku ta na Filipos, huntu ku e ansianonan i diakononan:

²Grasia sea ku boso i pas di Dios nos Tata i di Senor Jesu-Cristo.

³Mi ta gradisi mi Dios kada bes ku mi korda riba boso,

⁴pidiendo semper ku goso den tur mi orashonnan pa boso tur,

⁵pa motibu di boso partisipashon den e evangelio for di e prome dia te awor.

⁶Pasobra mi ta sigur di esaki, ku Esun ku a kuminsa un bon obra den boso lo perfekshon'e te na e dia di Cristo Jesus.

⁷Pasobra ta mas ku hustu pa mi pa sinti asina tokante di boso tur, pasobra mi tin boso den mi kurason, ya ku tantu den prizon komo den mi defensa i konfirmashon di e evangelio, boso tur ta partisipante di grasia huntu ku mi.

⁸Pasobra Dios ta mi testigu, kon mi ta anhela na boso tur ku e amor di Cristo Jesus.

⁹I esaki ta mi orashon, ku boso amor por abunda mas i mas ainda den konosementu berdadero i tur disernimentu,

¹⁰pa boso por aproba e kosnan ku ta ekselente, pa ta sinsero i sin kulpa te na e dia di Cristo,

¹¹siendo yena ku e fruta di hustisia ku ta bin dor di Jesu-Cristo, pa e gloria i alabansa di Dios.

¹²Awor mi kier pa boso sa, rumannan, ku loke a sosode ku mi a resulta mas bien pa progreso di evangelio,

¹³asina ku mi kadenanan pa e kousa di Cristo a bira bon konosi den henter e guardia di palasio i na tur otro hende,

¹⁴i ku mayoria di e rumannan, konfiando den Senor pa motibu di mi kadenanan, tin muchu mas kurashi pa papia e palabra di Dios sin miedu.

¹⁵Algun, di berdat, ta predika Cristo pa motibu di envidia i pleitu, ma algun tambe for di bon boluntat;

¹⁶e ultimonan aki ta hasie ku tur amor, sabiendo ku mi a wordu poni pa defensa di evangelio;

¹⁷e promenan ta proklama Cristo pa motibu di interes personal i no ku sinseridat, i ta pensa di hasi mi kadenanan mas pisa.

¹⁸Kiko anto? Solamente ku di tur manera, sea pa pretenshon of den berdat, Cristo ta wordu proklama; i den esaki mi ta regosiha. Si, lo mi sigui regosiha,

¹⁹pasobra mi sa ku esaki lo resulta den mi liberashon pa medio di boso orashonnan i e provishon di e Spiritu di Jesu-Cristo,

²⁰konforme mi anhelo ferviente i speransa, ku lo mi no wordu brongosa den nada, ma ku tur frankesa Cristo awor tambe, manera semper, lo wordu glorifika den mi kurpa, sea ku mi biba of ku mi muri.

²¹Pasobra pa mi, biba ta Cristo, i muri ta ganashi.

²²Ma si mi mester sigui biba den karni, pa mi esaki lo nifika trabou ku ta duna fruta; i mi no sa kual pa skohe.

²³Ma mi ta wordu hala di tur dos banda: mi ta desea di bai i di ta huntu ku Cristo, pasobra esei ta muchu mas miho;

²⁴sinembargo, pa keda den karni ta mas nesesario pa boso kousa.

²⁵I konvensi di esaki, mi sa ku lo mi keda i sigui ku boso tur pa boso progreso i goso den e fe,

²⁶pa boso alegria pa mi motibu por ta mas abundante den Cristo Jesus ora mi bin serka boso atrobe.

²⁷Solamente, komporta boso na un manera digno di e evangelio di Cristo; pa sea ku mi bin serka boso of mi keda ousente, mi por tende di boso ku boso ta para firme den un spiritu, di un akuerdo, luchando huntu pa e fe di evangelio,

²⁸sin ningun sorto di miedu di esnan ku ta opone boso--kual ta un senal di destrukshon pa nan, ma di salbashon pa boso, i esei for di Dios.

²⁹Pasobra na boso esaki a wordu duna pa kousa di Cristo, no solamente pa kere den djé, ma tambe pa sufri pa Su motibu,

³⁰ya ku boso ta pasando dor di e mesun lucha ku boso a mira den mi, i awor ta tende ku ta den mi.